Drim lồi poh, tàm hìu mpồl bơtiàn ƀòn Puăn, sàh Ea Phê, càr Dăk Lăk, săp cing mpong bơrlŭ bal mờ dờ bơto pơlam bơh cau chài dê. Dồ đah hìu mpồl bơtiàn là ală oh dềt dơ̆ sơnrờp ià pơrnờng bơtê dròng (tur) cing. Đah gam wơl là ală cau chài tàm ƀòn gam bơsram wơl ală jơnau cing ờs mờng bơh yau nàng dròng ntas di rlau, wil tơl rlau.

Dồ đah là săp cing bơh ală mpàng tê gam ờ chài dê, geh tŭ ntas ờ di. Tàm dồ đah ndai, ală cau chài uă nam đềt mềr mờ cing mpồng kung gam sơnđờm wơl ală jơnau cing mờng kwèng. Ồng Y Cư Ayun, rlau 50 sơnam, tàm ƀòn Puăn, yal:

“Lài do añ kung ờ gĭt, kung dròng sơl cing mơya ờ hềt dròng di ngan, bơtê den jòi bơsram is mờ gơ̆p bơyô lơm. Ngai do, añ bơtê wơl, oh mi tàm bơsram wơl gơ in di ngan, nàng gơ in wă wờng uă rlau nàng dilah mờ đah sàh kờñ den he lòt tìp măt lơh kwèng đơs crih tam ya, cing, mồng, tam ya yau, lòt lơh ai cau in sền. Hơ̆ là bơhiàn mờng kwèng cau Rơđê he dê, he pal lời prăp wơl tơnơ̆ do in gơtìp hŭi roh tĕ”.

Cau bơto ơdŭ do là Cau mờng chài Jak ngan Y Phôn Ksor. Hìu tàm sơnah ƀòn Buôn Ma Thuột, mơya tŭ geh gah niam chài jà, ồng ờ gŏ ngàm gơl gùng jòng rlau 40 kơi sồ tus hờ hìu mpồl bơtiàn ƀòn Puăn, sàh Ea Phê tàm pah dơ̆ lồi poh, bơto yal wơl ală bơta lơi he neh geh bơta mờng chài nàng sền gàr bơta kwơ bơh bèp ồng dê. Cau mờng chài Jak Y Phôn Ksor đơs, ồng kơlôi rơcăng ngan là bơta tìs ờ di tàm prăp gàr săp cing ờ geh bơto yal wơl di gùng.

“Do là dùl tŭ niam nàng he bơto yal wơl jơh ală tàm tŭ gam tơl pràn, tài bơh tơl ƀòn ndrờm geh dùl broă dròng is, broă tam gơl săp ntas krơi is mơya añ gam kơ̆p kờñ là bơta tờm ngan cau lơi kung pal gĭt bal. Tŭ neh bơto, bơto yal wơl cing mồng ai rơnàng kơnòm in, ngan là pal tơl bòr, geh bal bòr cing Knah, geh bal bòr sơngơr, geh bal bòr cing C’har nàng jơh ală sau, ală oh, ală cau chài in ndrờm gĭt jơh lơm”.

Ơdŭ bơsram tàm ƀòn Puăn geh pơgăp 30 nă cau bơsram là ơruh pơnu kơnòm pa tàu mờ cau chài cau Rơđê. Tàm 25 ƀùi, bơdìh mờ bơtê dròng, cau bơsram gam cih wơl tàm sră, kŭp video, lơh sồ ală jơnau cing ờs mờng bơh yau. Do là dùl tàm pe ơdŭ bơto yal wơl cing, mồng geh Sờh Niam chài, Tàp pràn să jan mờ Lòt nhơl càr Dăk Lăk dê bơyai lơh tàm dơ̆ kàl rlô bơkăng nam do nàng kờñ ai broă lơh prăp gàr wơl rê wơl tàm mpồl bơtiàn; kung là broă gah niam chài ƀòn lơgar lam lơh nàng kờñ lơh loh làng ală kơnòl broă bơh Jơnau lơh nền tàm pơrjum 80 dê bơh ală broă lơh prăp gàr bơh kâp hơđơm tơn.

Jăt ồng Trần Hồng Tiến, Kwang Lam bồ Sờh Niam chài, Tàp pràn să jan mờ Lòt nhơl càr Dăk Lăk đơs, tơnơ̆ tŭ càr ai lơh jăt Jơnau lơh nền tàm pơrjum sồ 03 bè gùng dà broă lơh dong kờl sền gàr mờ ngui niam bơta kwơ Ù tiah niam chài cing mồng, gah niam chài gam pơlam ală ƀòn lơgar rơcăng lài geh broă rơndăp lơh, rơndăp ai priă jền nàng ai ală gùng dà broă lơh gơlòt mŭt tàm mùl màl.

“Sờh kung dan mờ Anih duh broă Làng bol càr in bè Broă rơndăp lơh lam lơh jăt tơngume jơnau lơh nền tàm pơrjum, geh sră nggal pơlam ai ală ƀòn lơgar geh gơrềng tus ală tơngume, ală gùng dà broă lơh geh cih tàm jơnau lơh nền tàm pơrjum in pal dan gờñ nàng geh pơlam gùng mờ dan ai tơmŭt tàm kờp dŭ lài priă tă lơh tàm nam 2027. Bal bal mờ hơ̆ kung dan nàng lam lơh jăt Jơnau lơh nền tàm pơrjum prăp gàr mờ ngui niam bơta kwơ niam chài Bài chòi. Do là bàr phan lời wơl dà lơgar lơh jăt jăt Broă lơh lơh broă sồ 14 càr dê”.

Bơh broă dong kờl bơto yal wơl cing, mồng, lam lơh prăp gàr jơnau đơs crih Bài chòi tus lơh sră nggal ală phan lời wơl pa, Dăk Lăk gam rơhời ai ală broă lơh prăp gàr niam chài ờs mờng bơh yau wơl rê wơl mờ mpồl bơtiàn. Jơnau kờñ ờ ơm wơl tàm broă lời prăp phan lời wơl, mờ ai tơl bơta nàng ală bơta kwơ niam chài in pơn jăt tai geh lam lơh ngan ngồn mờ jàu pơrdờn tàm rài kis.

Bulah bè hơ̆, broă prăp gàr niam chài ờs mờng bơh yau ờ gơtùi kơ̆p tơmăng tàm bàr pe ơdŭ bơto yal wơl halà ală rơndăp broă lơh lơyah ngai. Do là ală broă lơh jŏ jòng, gơ sồr bơta lòt bal bơh jơh ală anih lơh broă chính trị dê, bơh lơh sir kơrnoăt boh lam, gùng dà broă lơh tus rơndăp ai priă jền mờ lam lơh jăt. Ồng Y Nhuân Byă, Phó Chủ tịch Anih duh broă Làng bol càr Dăk Lăk đơs là, Jơnau lơh nền tàm pơrjum 80 Dà lơgar dê là bơnàng jă kwơmàng nàng ƀòn lơgar in geh broă rơndăp lơh mờ ai lài priă jền ai broă lơh prăp gàr niam chài bơh kâp hơđơm in.

“Jơnau lơh nền tàm pơrjum 80 là Jơnau lơh nền tàm pơrjum tờm ngan, loh làng ngan nàng bol he lơh jăt broă sền gàr bơhiàn niam chài is tàm ală phan lời wơl ờ di phan bơna bè cing mồng mờ bàr pe broă ndai. Tơngume do kờñ pal ai lài kờp dŭ, geh broă rơndăp lơh lam lơh ngan ngồn, tam pà ai ală mpồl lơh broă in”.

Jơnau lơh nền tàm pơrjum 80 neh lơh gơlik geh tơngume nàng ală ƀòn lơgar in bơ̆t bơtàu ală gùng dà broă rơndăp lơh dipal mờ mùl màl. Mờ càr Dăk Lăk, lơh loh làng Jơnau lơh nền tàm pơrjum 80 ờ mìng là lam lơh ală kơnòl broă prăp gàr, mờ gam ai tơl bơta nàng tơl nơm ƀòn, tơl nă cau chài mờ rơnàng kơnòm să gơgơs bal cau tờm bơh ală broă lơh sền gàr bơhiàn niam chài is, ai tai bơta nàng phan lời wơl geh sền gàr bơh mpồl bơtiàn tơn.