-Niam să Ka Thuân yơ, oh gơlơh hàng bơnĕ ngan tàm phan soh geh mai bơh ồi kòn cau he dê tàm bồ nam pa. Dan nting bơr chờ gờm ùr Ƀí thư Ci Đoàn neh lơh geh Khà Bàr tàm Dơ̆ pơrlòng Sơnđờm mŭt lơh broă Tam gơl pa bơceh lơh càr Lâm Đồng dê tàm nam 2024 pa do!

Ka Thuân: “Ơi, oh dan ưn ngài, oh dan geh bàr pe jơnau pơyua tus jơh tơl nă oh mi cau tàm ùr tàm lơgar kung bè oh mi cau ùr he ơm tàm lơgar ndai jơnau nting bơr kơ̆p kờñ pràn kơldang, gĭt kơlôi mờ sền gròi kơlôi rơcăng lơh sa pơgồp bơnah tam gơl rài kis hìu bơnhă in”.

- Di dơ̆ bồ nam pa Ất Tỵ, Ka Thuân gơtùi yal bè jơnau mờ oh sơnđờm mŭt lơh broă bal mờ broă lơh ồi kòn cau bè lơi?

Ka Thuân: “Să tờm añ gơboh kờñ ngan ồi kòn cau he dê. Tàm nam ơdŭ 5, añ neh geh jơnau kơ̆p kờñ là tơnơ̆ do tŭ dờng rơ̆p lơh dồ nơm hìu nàng tăc ồi aò kòn cau he dê…Tus nam 2009, tŭ niam neh gơtus mờ oh. Añ neh geh lài dồ êt bơta chài koh mai phan tàm kông ty mờ lài do neh lơh broă. Bal mờ lài do añ kung neh geh tŭ bơsram mai phan bơh bi ùr añ dê. Tŭ hơ̆, añ jòi lơh is ală broă bè jă măy mai, đo, was koh biài sang geh lài tàm hìu nàng lơh jơnau kơlôi do…Bơh hơ̆, ală phan bơna bơh sơnrờp añ dê neh lơh geh. Añ soh añ mbơn ală ồi aò kòn cau hơ̆ tàm ală dơ̆ ñô bau tàm ƀòn. Bơh hơ̆, añ blơi phan rê nàng tăc online, uă ngan cau blơi, geh uă năc cau blơi sùm. Añ sơnơng ñchi gơlơh he ờ gŏ mai nàng tăc mờ năc in taih?

- Sơnđờm mŭt lơh broă bơh tàm ƀòn lơgar tờm he dê tơn, bơh phan bơna pơnrơ is bơh jơi bơtiàn he dê tơn, bi neh tìp ală bơta ƀươn mờ kal ke lơi?

Ka Thuân. “Bơh chờm tŭ añ kờñ pờ hìu mai, añ bơtuah geh bơklau dồ nùs bal, mơya bơklau kung gơlơh pin sơl mờ geh lùp sơl oh là lơh bè hơ̆ den geh sơl cau blơi hala ờ dô hă? Mơya añ đơs mờ bơklau añ dê là he lơh lài ih rơhời gơ rơ̆p geh năc gơ. Tơnơ̆ hơ̆ ùr bơklau añ lòt càn priă anih priă jền dê, pơgồp tai priă tềm pềr geh nàng tơm jơh ală bơnah dồs ndai. Tơnơ̆ hơ̆ añ lơh hìu mai phan jơh rlau 36 tơlak đong mờ blơi tai măy mŏk, phan ngui ai hìu mai in…jơh pơgăp rlau 80 tơlak đong. Añ sơnđờm broă lơh he dê mờ sơnđờm geh năc blơi..mờ tus tŭ do neh 5 nam. Pah nam añ lơh geh 130 tơlak đong”.

- Tàm kă bro, drà kă bro mờ năc blơi phan là kwơmàng ngan. Mờ bơta phan mùl gŏ is là phan soh pa geh mai bơh ồi, bi lơh geh jơnau kờñ bơh năc dê bè lơi hah bi?

Ka Thuân: “Añ ờ gŏ mai lài phan ờ, tŭ lơi geh năc dan blơi den hơ̆ sồng mai. Dilah geh jơng kah biài den añ mai lài mờ ai năc in apah. Añ sùm tăc phan bơh ală pang internet dê bè zalo, facebook, mờ tiktok…Bơh nam lài, añ geh uă ngan năc dan blơi, añ ờ jai lơh jơh, geh tŭ añ guh tus 1, 2 jiơ àng drim nàng mai gơ in thàn ai năc in. Pa do, añ geh tus bal dơ̆ pơrlòng sơnđờm mŭt lơh broă mờ lơh geh khà jờng. Bơh hơ̆, añ geh tai bơta gơn kơnờm pal tam gơl broă rơndăp lơh nàng prăp gàr mờ bơtàu tơngguh broă lơh ờs mờng bơh yau do bơh ồng pà he dê lời wơl. Bơh hơ̆ añ jà ală oh mi gùt dar ƀòn lơgar tus lơh bal, cau lơi gơboh kờñ broă do den lơh bal mờ añ, añ tŭ lơi kung kờñ lơm bơto pơlam mờ pà priă apah ai oh mi in”.

- Nam pa Ất Tỵ 2025 neh sơnđờm, làm gùt ală ƀòn lơgar rềp ngài, cau lơi kung săc rwah ai he in ală phan ngui soh niam bơnĕ ngan rlau jơh nàng lòt nhơl bồ sơnam pa, tàm hơ̆ geh rùp să bơh ồi kòn cau K’Ho dê. Ka Thuân neh geh broă rơndăp lơh nam pa bè lơi gơ wèt mờ phan bơna do taih?

Ka Thuân. “Tàm bồ nam pa añ neh ơn tơngai lơh broă, pơnyơu bè broă lơh sươn lơh mìr tàm dồ nam geh 3 dơ̆ lòt lơh broă sươn mìr, añ rơ̆p apah cau lơh, ai broă Đoàn ơruh pơnu den neh geh ơn tơngai lài. Añ rơndăp tăp sèng broă lơh mờ tus bal wil tơl…ai dilah tŭ geh năc cau dan blơi phan den añ rơ̆p mai tàm trồ mang. Añ kung geh sơl broă rơndăp lơh rơ̆p bơcri priă nàng bơsram tañ is, mờ bè tŭ do gam pah apah cau tàñ lơm hờ bơdìh. Ngan tài bè hơ̆, añ gam kơ̆p kờñ ngan geh priă jền nàng bơsram tàñ is, bơh hơ̆ nàng lơh ơnàng wơl hìu mai phan, blơi tai măy mŏk ai oh mi in bơsram mai phan. Añ kung neh lơh rơndăp broă lơh cèng phan bơna do lòt tăc tàm lơgar ndai, ngan tài bè hơ̆ mờ añ kơ̆p kờñ ngan ală oh mi tàm hìu mai phan do tơrgùm bal pràn dồ nùs bal mờ añ nàng lơh”.

Ơi, dan ưn ngài Ka Thuân yơ!