Tàm nhơm trồ mrềt dồ êt mùl gŏ, dơng bơnơm Măng Đen niam bơnĕ gơklŏ gơcrà tàm gùl brê bơnơm dờng tơlir niam ngan. Trồ tiah rơngơm mrềt sàng goh ngan, sơlơ lơh mpờl gŏ uă ngan rùp bơkàu añ đào lì lơh gơkờñ ngan cau, lơh gơlik geh ù tiah lơh chờ ram mhŭ, bềng nùs nhơm ngoh rơngăc bơh ală ngai bồ sơnam pa tơn. Măng Đen bơh jŏ geh pơnyơu bè dùl “đăng trồ tơlir”, tiah ù mờ trồ tìp bal, nhơm tă bơh brê kra bơrlŭ bal mờ rài kis lơngăp lơngai. Nam 2025, Măng Đen pơn jăt tai đơs nền anih ơm là dùl tàm ală anih tus lơh gơkờñ ngan cau bơh Việt Nam dê tŭ wă mờr 2 tơlak nă năc, tàm kờp jơh khà pơgăp 5 tơlak nă năc tus Quảng Ngãi, tă pơgồp kwơmàng tàm kờp jơh priă lơh geh bơh kă bro lòt nhơl rlau 3 rbô 700 tơmàn đong bơh jơh gùt càr dê.

Tàm dơ̆ sơnđờm mŭt lơh Tơngleh Niam chài – Lòt nhơl Măng Đen 2026, mò Y Ngọc, Phó Củ tịc Duh broă sùm Anih duh broă Làng bol càr Quảng Ngãi pà gĭt, càr kĭ hơ lơh sir, lơh niam wơl tiah bơcri priă lòt nhơl; ngui geh cồng nha ală bơta pràn, jơh nùs lơh ngan bơ̆t bơtàu Măng Đen gơgơs anih tus lòt nhơl ƀòn brê bơnơm, ơm rlô pràn să tiơng pơnrơ ngan, bơtàu tơngguh kơnhăp jŏ, ndrờm pal mờ măt sơnđan là gar đèk kwơ bơh kơnhoàl ù tiah do mờ ală lơgar dê: “Măng Đen ngai do ờ gam là dùl anih tus is tai mờ neh gơgơs anih tàm tơrbŏ, tiah tìp bal tàm ală lơh bal Brê mờ Dà lềng càr Quảng Ngãi pa dê. Tàm tơrbŏ bơta mrềt dồ êt bơh brê bơnơm dờng ơning ơnàng Măng Đen dê mờ càl bơtiết boh bơh dà lềng bồt bơlào Lý Sơn, Mỹ Khê dê; tàm tơrbŏ ù tiah niam chài cing mồng yal yau bal mờ ală phan lời wơl niam chài Sa Huỳnh”.

Broă lơh đơs crih tam ya geh rơndăp lơh roh uă ngan tŭ jiơ, tam pà gơs 3 tăp: “Tiah trồ mờ ù tàm tìp bal”, “Rùp să ƀô thồm brê bơnơm dờng ơning ơnàng dê” mờ “Kah hồr ngan ƀòn tàm bơta mpao”. Ală jơnau đơs crih tam ya niam bơnĕ is ngan bè: Jơnau yal yau Măng Đen, Rùp să bơkà đào Măng Đen, Jơnau đơs crih bơta tàm kờñ Măng Đen, Măng chờ cing mồng, Cồng ồs dơng bơnơm…lơh tơnggŏ wơl dồ bă ngan ngồn bơta niam brê bơnơm geh is, niam chài mờ kòn bơnus Măng Đen dê, cèng tus cau năc lòt nhơl in dùl gùng lòt nùs nhơm ngoh rơngăc bềng nùs nhơm brê bơnơm dờng ơning ơnàng dê. Ồng Dương Tấn Nhựt, làng bol tiah is ồn Lý Sơn, càr Quảng Ngãi tus lòt nhơl tàm Măng Đen, gĭt gŏ bè do: “Dơ̆ ơm rlô chờ, dơ̆ sa tềp nam pa dê, añ gŏ broă lơh đơs crih tam ya gơlơh gơdan gơkờñ ngan, chờ hờp ngan. Bơh hơ̆ lơh gơrề, pơgồp bơnah lơh pràn niam chài, lòt nhơl càr Quảng Ngãi dê. Quảng Ngãi mờ Kon Tum pa tơmŭt bal, den tàng làng bol kung geh bơta lùp bơsram, tìp măt lơh kwèng bal niam chài bàr tiah đah măt tơngai Lik, mờ Mŭt bơh càr Quảng Ngãi dê”.

Tơngleh Niam chài – Lòt nhơl Măng Đen nam 2026 bal mờ uă broă lơh li la, bè: Lơh chờ Plai nhơm par, broă lơh đơs crih tam ya “Măng Đen ngai pa”, pơrjum drà phan sa OCOP, dar drà phan lơh gơs bơh sươn sre –phan lơh sơnơm, ală broă lơh tàp pràn să jan – lòt sền gŏ mờ dơ̆ lòt nhơl ƀòn brê bơnơm, cèng tus năc lòt nhơl in ală dơ̆ lòt sền gŏ niam bơnĕ is ngan, kal ke ngan hŭi tàm bă ù dơng bơnơm Măng Đen.