Bơh àng drim gờñ, lŏ Ngân neh rơcang ală phe mbar bơkah ngan geh cau tàm hìu lơh gơs nàng lơh piang ding. Lŏ yal, do là dùl broă lơh yàng kwơ màng ƀòn dê, den tàng pal rơcang nền nòn ngan. Phe mbar geh rơcoah kloh, tram nền tus tàm tŭ phe bà hơ̆ sồng tơmơl tàm ding đơr, buh tềng bơnhă ồs. “Añ kung chờ hờp ngan geh bal mờ ală cau tàm ƀòn trŭ ală phan sa ờs mờng nàng ñô sa chờ bal. Nam pa tus kung kơ̆p kờñ làng bol ndrờm pràn kơl dang nàng lơh broă sa hơ̆ sồng tus nam tơnơ̆ tai geh tus bal chờ gờm nam pa tai. Nam do broă lơh sa geh tơnhaò uă, phan tăc gơguh priă den tàng làng bol chờ hờp ngan”.

Hìu nhă mò Tah kung ndrờm bè ală hìu nhă ndai sơl, ờ mìng rơcang piang ding mờ poăc buh, mờ gam geh dùl bơta phan sa krơi is ngan hơ̆ là poăc đe brê. Mò Tah pà git, jăt bơhiàn kòn cau Sơdàng dê, đe là phan jơi mờng sa kòi, mờng lơh aniai kàl lơh sa. Den tàng đe pal kŭp nàng lơh poăc pơdơng yàng in, nàng yàng sền gàr kàl lơh sa ờ gơtìp aniai tai. “Geh iar den peh iar, geh ka den buh ka, geh đe den peh đe lơh poăc tài nam pa sa ka den tìp bơtoah tài ka niam kis tàm dà, tus nam tìp uă bơta bơtoah. Đe den mờng sa kòi, he sa poăc đe den nam tơnơ̆ đe ờ khin sa kòi tai”.

Tơnơ̆ mờ tŭ neh lơh gơs broă rơcang phan pơdơng, broă lơh yàng geh bơyai lơh niam bơnĕ ngan tàm hìu pơrjum ƀòn, mờ broă tus bal bơh kra ƀòn mờ kwang atbồ ƀòn. Ală phan sa bè piang ding, poăc iar buh, tơrnờm… geh pơdơng yàng in. Ồng Vi Voan, atbồ ƀòn Kon H’ring pà git: “Nam pa chờ hờp ngan, làng bol kung ngoh rơngăc ngan wă rò ngai do tơnơ̆ mờ 1 nam lơh broă glar bòl, ngai do ơm rơlô ing lơh broă nàng tus bal tềng do, cau lơi geh phan lơi den tă phan hơ̆ tàm nùs nhơm lơh yàng là ngai bơh să tờm he dê, bơh tŭ hơ̆ prăp gàr bơta niam chài kòn cau Sơdàng dê bơh rơnàng mò ồng lời wơl”.

Tơnơ̆ mờ tŭ duh khoai yàng, ală cau tàm ƀòn geh tơrgùm bal tềng hìu pơrjum ƀòn, do là tiah sơlào piang geh tam pà bal bơh kra ƀòn tus mờ kơnòm dềt. Sơlào piang pơdơng yàng in tŭ do neh gơs phan sa bal bơh ală cau tàm ƀòn dê, mờ ală phan sa ờs mờng bè piang ding, poăc buh, biăp brê, jơh ală geh lơh bơh kòi pa mờ phan geh jòi bơh tàm brê bơnơm Tây Nguyên dê. Cau năc tus bal bè mò Phạm Kerstin, cau lơgar Đức kung gơlơh ngoh rơngăc ngan tềng đăp mờ nùs nhơm chờ bơh broă lơh yàng krơi is do: “Lơh yàng krơi is ngan, lơh nùs nhơm añ gơlơh gơboh kờñ ngan. Añ kờñ sền rài kis bơh jơi bơtiàn tàm do dê. Nùs nhơm chờ hờp ngan, rài kis tàm do mùl màl niam bơnĕ ngan”.

Lơh yàng kòi pa tàm ƀòn Kon H’ring ờ mìng là dùl dơ̆ sào, mờ gam là dơ̆ nàng tơl nă làng bol tơlik nùs nhơm chờ hờp mờ cau năc, nùs nhơm tam klăc bal bal mờ broă tam pà bal. Ală phan sa ờ mìng là phan geh lơh bơh kàl lơh sa dê, mờ gam là cơng tàng pà gŏ broă tơriang tơriồng, lơh broă sùm bal mờ ală bơta kwơ niam chài jŏ bơh yau mpồl bơtiàn dê. Lŏ Nguyễn Thị Yên, kis tàm ƀòn Sang, sàh H’ Đing yal: “Hìu añ rềp tàm do, mơya do là dơ̆ sơnrờp añ geh tus bal lơh yàng. Geh uă ngan jơnau nhơl mờ lơh yàng kung krơi is ngan den tàng chờ hờp tŭ geh tus bal mờ broă lơh yàng bơh dùl ƀòn bè do dê”.

Mò H’ Lúi Niê, Phó Ƀí thư Đảng ủy sàh Ea H’ Đing pà git, lơh yàng kòi pa ờ mìng là dùl broă lơh yàng ƀòn lơgar dê, mờ gam là dơ̆ nàng yal bơta niam chài ờs mờng bơh kòn cau Sơdàng dê tus mờ cau năc bal mờ ală tiah ndai in. Gơnoar atbồ sàh sền kwơ ngan tus broă prăp gàr ală broă lơh yàng do, tài do là ală bơta geh kwơ tờm ngan dong kờl tơrbŏ bal mpồl bơtiàn mờ lơh geh dùl bơta niam chài krơi is bơh ù tiah Tây Nguyên dê. “Lơh yàng do mìng là làng bol kòn cau Sơdàng lơh, mơya hòi jà gal ngan làng bol bơh ală ƀòn rềp tus bal mờ broă lơh yàng do. Do kung là lơh yàng geh bơyai lơh pah nam geh anih duh broă làng bol kơnhoàl, sàh sền gròi, dong kờl nàng làng bol geh bơyai lơh yàng geh cồng nha. Kờñ ngui bơta niam chài jơi bơtiàn dê, tàm nam 2025 do pơn jăt tai lơh geh wơl ală broă lơh yàng”.