Tàm hìu sơmăng pa lơh niam bơnĕ ngan, kờp priă rlau dồ tơmàn đong, ồng Dà Cắt Tư lời cơldŭ năc niam ngan nàng tĕp rùp Wa Hồ, sră jờng rơ, sră prơ cih dờp cồng nha lơh geh bơh ală cau tàm hìu bơnhă dê tàm ală tŭ bơsram mờ lơh broă. Tùh ƀuffet ơn tàm cơldŭ năc, rơndăp ơn uă phan ngui dờng màng, tàm hơ̆ geh ală pang sră bè adăt bơhiàn mờ niam chài cau M’Nông dê. Is ồn, pang sră “Jơnau cih niam chài rài yau jơi bơtiàn M’Nông dê bơh ồng Dà Cắt Tư dê cih dơrcoh mờ măy tàm nam 2013; tơrgùm cih uă bơta, bè: jơnau đơs tòng sơh, adăt bơhiàn, jơnau pơnđik...

Ồng yal wơl ală tŭ bơsram, lơh broă mờ ală bơta ồng gơlơh kờñ ngan bè pang sră mờ ồng neh lời uă ngan tŭ jiơ nùs nhơm bồ tơngoh jòi tơrgùm mờ cih:          

“Bơh dềt añ geh lòt bơsram uă tiah. Tŭ dờng, añ geh tŭ bơsram đại họk tàm Ƀòn dờng Hồ Chí Minh. Kơnờm bè hơ̆, añ gĭt loh rlau bơta kwơ dờng ngan bơh adăt bơhiàn jơi bơtiàn M’Nông dê, bè tòng, pơ̆t, ntòng sơh mờ ală jơnau đơs pơnđik, adăt bơhiàn bơh jơi bơtiàn he dê. Tơnơ̆ neh jơh bơsram, añ rê wơl hờ ƀòn lơgar, sơnđờm jòi tơrgùm mờ cih dơrcoh wơl mờ măy ală jơnau đơs pơnđik jơi bơtiàn he dê gơgơs pang sră. Dùl bơta gơ tam gơl dờng gơ wèt mờ añ là dơ̆ lòt tus Hà Nội mờ geh tìp Tổng Ƀí thư Nguyễn Phú Trọng. Wa nting tơngkah là ală cau geh bơngă pin dờn tàm mpồl bơtiàn pal lơh gơrề uă nùs nhơm sền gàr mờ prăp gàr niam chài jơi bơtiàn he dê. Bơh hơ̆ añ sơlơ jơh nùs lơh ngan lời tŭ jiơ jòi tơrgùm, prăp gàr wơl ală jơnau pơnđik, adăt bơhiàn, jơnau yal yau jơi bơtiàn M’Nông dê, bal mờ kơ̆p kờñ lời wơl ai rơnàng tơnơ̆ do in”.

Lời jơh nùs tồr mờ broă lơh prăp gàr mờ ngui niam ală bơta kwơ niam chài ờs mờng bơh yau jơi bơtiàn dê, geh bơta sồr lơh bơh kâp ủy, gơnoar ătbồ ƀòn lơgar dê, nam 2023, ồng Dà Cắt Tư neh tơnggơs ală mpồl cing tàm thôn Liêng Trang 1 mờ thôn Dà Nhinh 1 mờ Dà Nhinh 2. Tus tŭ do, ală mpồl cing do gam lơh broă sùm tàm ƀòn lơgar mờ ngai sơlơ bơtàu tơngguh; ală mpồl cing neh uă dơ̆ lòt pơrlòng niam chài mờ ală ƀòn lơgar tàm càr Lâm Đồng bè Đơn Dương, Dà Oai, Dà Teh, Dam Rong…Bơh broă lơh bơh mpồl cing dê, ală cau chài dờng sơnam neh bơto yal wơl bơta chài dròng cing ai rơnàng kơnòm să in. Bi Dà Cắt Ha Tiên là cau kơnòm să bơh mpồl cing do dê, đơs:

“Añ là cau tàm mpồl dròng cing. Añ gŏ ồng mò he dê neh lời wơl ai bol hi in dùl bơhiàn niam chài kwơmàng ngan. Den tàng bè hơ̆, bol hi pal lơh ngan lùp bơsram mờ sền gàr nàng ờ lơh roh hŭi tĕ bơhiàn niam chài jơi bơtiàn he dê. Mpồl cing bol hi dê sùm lòt tàm pơrlòng mờ lơh geh uă khà jờng. Bơh hơ̆, bol hi sơlơ wă wờng ngan rlau bơta kwơmàng bơh broă prăp gàr niam chài ờs mờng bơh yau bơh ală jơi bơtiàn Tây Nguyên dê bè M’Nông, K’Ho”.

Nàng pơgồp bơnah prăp gàr mờ ngui niam bơta kwơ niam chài ờs mờng bơh yau ală jơi bơtiàn dê, pa do, gơnoar ătbồ ƀòn lơgar neh pà tai 2 bòr cing ai ală mpồl dròng cing in. Ồng Liêng Hót Ngát, cau mờng lơh broă tàm Cơldŭ Niam chài sàh Dam Rong 4, càr Lâm Đồng pà gĭt, tàm tơngai tus, ƀòn lơgar rơ̆p pơn jăt tai bơtàu tơngguh ală mpồl cing mồng tàm jơh ală thôn, ƀòn. Mờ ồng, Dà Cắt Tư là cau jơh nùs jơh tồr, mờ geh dà kơlhề dờng tàm broă bơto bơtê, prăp gàr mờ ngui niam bơta kwơ niam chài ờs mờng bơh yau đơs bal, cing mồng đơs is, gah lơh broă geh gơnoar gam sền swì sră nggal dan Dà lơgar dờn dờp là cau chài jak.           

“Bơh tŭ Đảng ủy ai lơh jăt Jơnau lơh nền tàm pơrjum bè prăp gàr niam chài ờs mờng bơh yau, cau chài Dà Cắt Tư neh tơnggơs ală mpồl cing mồng tàm thôn Dà Nhinh 1, Dà Nhinh 2 mờ thôn Liêng Trang 1. Ồng neh bơtòm tơrgùm uă cau chài dờng sơnam nàng bơto wơl bơta chài dròng cing ai rơnàng kơnòm să in. Ală mpồl do sùm geh jà lòt dròng tàm ală tiah lòt nhơl mờ tus bal uă dơ̆ pơrlòng niam chài, lơh geh cồng nha uă ngan, pơgồp bơnah lơh geh tai đau priă jền ai ală cau tàm mpồl in. Tàm sàh ờ huan ngan geh cau jơh nùs jơh tồr bè ồng. Kơnờm bơta tàm tơrbŏ bal mờ hòi jà bơh ồng dê mờ niam chài cing mồng cau M’Nông, K’Ho tàm do geh lơh wơl, prăp gàr mờ bơtàu tơnguh bè ngai do”.

Nam do neh rlau 75 sơnam, ồng Dà Cắt Tư tàm sàh Dam Rong 4, càr Lâm Đồng kung gam ngềt ngơ̆t jòi cih tơl jơnau ntòng sơh, jơnau dròng cing, jơnau yal yau bè gàr tĕ hwềng nùs jơi bơtiàn he dê. Bơh ală pang sră bơh mpàng tê ồng dê cih dơrcoh mờ măy tus ală mpồl cing mồng ồng dê tơnggơs, bơto wơl ai rơnàng kơnòm să in là bơta tàm pơn jăt gam sùm bơh dùl gùng lòt niam chài dê. Kơnờm bơta jơh nùs jơh tồr mờ jak chài bè ồng Dà Cắt Tư, niam chài jơi bơtiàn M’Nông ờ mìng geh prăp gàr lơm mờ gam geh bơta pràn kis pa, lơh gơrề tàm jơnau tàm pơn jăt rài kis pa ngai do.