“Ơruh pơnu tus bal prăp gàr, ngui bơta niam chài krơi is jơi bơtiàn Việt Nam dê tơngai bơh nam 2024 tus 2029” là dùl tàm bàr rơndăp broă lơh bơh Mpồl tam klăc ơruh pơnu Việt Nam dê geh ai tàm tơngai lơh broă dơ̆ IX. Nàng prăp gàr phan lời wơl niam chài cing mồng tàm rài kis mpồl bơtiàn jơi bơtiàn ờ gal cau dê, nam pa do, gah lơh broă geh gơnoar tàm càr Kon Tum neh bơyai lơh pờ uă ơdŭ bơto bè jơnau git wă, bơta chài dròng cing, mồng, tamya xoang mờ ală jơnau dròng cing ờs mờng ai ơruh pơnu in.

Cau chài kơnòm să A Huyền là klau pơnu kòn cau Sơdàng neh bơto 30 nă cau bơsram tàm ƀòn drà dềt Đăk Tô bè bơta git, bơta chài dròng cing mồng, tamya xoang mờ ală jơnau dròng cing ờs mờng kòn cau Sơdàng dê. “Tài añ gŏ tŭ do rơnàng cau dờng git uh, teh phan kòn cau dê ờ gam gal tai, den tàng añ kơlôi là pal pơn jăt tai bơto ală rơnàng kơnòm să in, bơto rơnàng kơnòm să in git do là phan uh, phan teh ờs mờng kòn cau añ dê, añ pal bơtàu tơnguh phan do, nàng bơyô tàm lơgar mờ lơgar bơdìh in git uă rơlao tai bè bơhiàn bơh kòn cau añ dê, phan uh, phan teh jơi bơtiàn añ dê”.

Tơnơ̆ mờ jơh tơngai bơto bal mờ broă lòt bơsram gah lơh phan soh tàm lơgar Malaysia dê, bi K’ Jô Na, kòn cau K’ Ho neh rê mờ ƀòn lơgar mờ tus bal tàm broă lơh phan soh, lơh geh uă bơta phan bơh ồi yau tàm ƀòn dờng Dà Làc, càr Lâm Đồng dê. Bi K’ Jô Na pà git: “Añ là cau kòn ƀòn lơgar K’ Ho dê, den tàng añ gơboh kờñ mờ pơnyờ să ngan mờ bơta niam chài ờs mờng kòn cau añ dê. Tàm hơ̆, ồi yau là phan niam chài pơgồp bal nền nòn mò7 rài kis añ dê bơh dềt tŭ mò añ, mè añ nggui tàñ. Tŭ dờng den añ kờñ ai phan ồi yau do nàng yal tus uă cau ndai in rơlao, uă tiah rơlao. Añ kung kơ̆p kờñ mờ ală phan geh lơh añ dê, den phan ồi yau làng bol Tây Nguyên dê gơtùi tus rềp mờ jơh ală cau, niam bơnĕ rơlao, pa rơlao nàng dong kờl ală cau in gơboh kờñ rơlao mờ bơta niam chài jơi bơtiàn rơlao”.