Di nam pa, rơcang wă rò Satềp jơi bơtiàn dê, tàm tiah Tây Nguyên geh bơyai lơh uă broă lơh chờ niam chài krơi is. Do kung là dơ̆ nàng Rùp să phan soh bơh ală jơi bơtiàn dê geh tơngŏ bal mờ săp dròng cing, tamya xoang. Lŏ H’ Blim kis tàm ƀòn Ja Rah, sàh Nâm Nung, càr Lâm Đồng bal mờ bơklao mờ ală kòn ndrờm soh phan kòn cau M’nông tus bal lơh chờ “Tăm Blang m’prang bon” pà git: “Kòn cau M’nông geh phan soh niam bơnĕ ngan bal mờ ală săp dròng cing, tamya niam bơnĕ ngan mờ phan soh ờs mờng, tàñ is, jơnau dròng cing gơboh kờñ mờ jơnau lơi den bơsram tàp mờ jơnau hơ̆, geh dơ̆ den dròng tamya nàng jà ală oh mi in sền, gam rơcang jơnau dròng cing lơi nàng di pal mờ săp tamya, bơta niam chài ờs mờng do chờ hờp ngan, añ kung bơto sồr kòn bao tus bal nàng chờ”.

Bơta niam Rùp să phan soh kòn cau ờ mìng là phan soh nàng lòt lơh chờ, mờ neh gơs bơta niam chài tàm mpồl bơtiàn ală jơi bơtiàn tàm Tây Nguyên dê. Mò Ka Thu, kis tàm sàh Hoà Ninh, càr Lâm Đồng pà git, phan soh kòn cau neh đềt mềr mờ kòn cau K’ Ho bơh tŭ deh tus tàm tŭ chơ̆t, rê mờ mò pàng tơn: “Añ sồr kòn, bŭ lah tŭ do geh uă biày tàm drà tăc, mơya gơwèt mờ jơi bơtiàn he dê den phan kòn cau he pal prăp gàr, bañ lời roh, tài tus dŭt ndơl, di lah ờ geh 1 pang ồs yau den bàs sìl ngan mờ oh mi ƀòn lơgar, mờ mò pàng. Pal geh pang ồs yau hơ̆ sồng re mờ mò pàng niam, chờ hờp, den tàng pal geh”.

Geh bơh jơnau kờñ tàm rài kis dê, tŭ do tàm ală pang internet mpồl bơtiàn dê, bơh ală pang internet cau dùl nă să tus mờ ală hìu lơh, mpồl lơh broă bal… kung àng gơcrà rùp să phan soh kòn cau bơh ală jơi bơtiàn tàm Tây Nguyên dê. Pa do ngan, tàm Mpồl lơh broă bal Tàñ ồi yau Tơng Bông, Anih duh broă làng bol sơnah ƀòn Ea Kao, càr Dăk Lăk kung bơyai lơh broă lơh livestream mờ tơngu me “Ƀòn Tơng Jŭ – Ea Kao niam să”, pờ tơlik tơn tàm ală pang internet mpồl bơtiàn bè Facebook, Zalo OA, TikTok.

Broă lơh do nàng yal phan neh tàñ gơs bơh ồi yau ờs mờng dê mờ yal broă lòt nhơl mpồl bơtiàn ƀòn Tơng Jŭ dê, mờ ală phan phan geh pơnrơ ngan bè phan soh ờs mờng kòn cau klao, cau ùr kòn cau Rơđê dê, phan soh kơnòm dềt, ào kăp, ồs mbơn, kơroăt, chèo dă kơƀàng mờ ală phan soh pa. Bơh broă lơh livestream, sơnah ƀòn do neh yal jơh ù tiah geh is niam gùt dar, bơta niam chài tàm rài kis bơh sơnah ƀòn Ea Kao dê pơgồp bal mờ rài kis lơh broă sa bơh làng bol dê, tàm hơ̆ uă ngan là làng bol jơi bơtiàn ờ gal cau.

Tàm càr Gia Lai geh uă anih tus lòt nhơl mpồl bơtiàn niam bơnĕ ngan bè Plei Ôp, sơnah ƀòn Pleiku, ƀòn Lòt nhơl Mpồl bơtiàn Ia Mơ Nông, sàh Ya Ly, ha là homestay Đinh A Ngưi tàm sàh Tơ Tung… Kòn cau Jrai mờ Bơnhàr ndrờm bal bơyai lơh bơta niam chài ờs mờng bơh yau, tàñ ồi yau, iăt sền dròng cing, sền nàng git bè ñô sa chờ, phan sa mờ rài kis niam tiah bơnơm dê, ai geh rài kis broă lơh broă sa kơl jăp, pơgồp bal mờ prăp gàr phan lời wơl niam chài.