Jăt ồng Lê Thiết Cương, cau chài wăc rùp, cau jăt sền mờ săc rwah rùp đơs, bơr geh gơtha is ồn mờ 11 nơm phan ne ờ geh. Rùp hin Bơs gơ rềp ngan mờ Yàng Phờk, bơta mờng duh khuai bơs là dồ bơta pin dờn bơh rài yau bơh cau Yoan dê bal mờ bàr jơnau gơtha tờm là phan duh khuai bơh rài yau mờ yàng dà. Ờ mìng cèng jơnau bè pin dờn lơm, cau chài wăc rùp gam đơs là jơi phan do cèng tus dồ jơnau gơtha ndai: “Nam Ất Tỵ 2025, nam bơs là rùp pơrya, là phan geh hwềng geh jơnau niam bè do, nhai dùl là nhai klìu, nhai bàr là nhai mèo, nhai pe là nhai  Đăng grài mờ nhai 4 là nhai bơs. Hơ̆ là bơta lơi, tàm 8 gai triang jơnau tàm kơlwàng trồ, den gai triang bơh sơnrờp gơtha là trồ, là nhai 4, nhai bơs. Trồ tàm do ală bơyô gĭt là Cau crơng mòn, crơng gơs, kung ngan là dồ rùp pơrya sơl, dồ bơta kơ̆p kờñ, dồ jơnau nting bơr chờ hờp tus mờ jơh tơl nă cau chài là nam bơs neh tus rao, bơsram tĕ nùs nhơm bơh trồ tiah dê, nùs nhơm niam bơh cau crơng mòn dê nàng geh ală rùp pa rlau, geh gơlòt krơi tĕ”.

Tơnggŏ ală rùp hin li la bè bơs, ală cau chài wăc rùp neh ngui ală phan krơi is bè rùp ƀòk dà sơng, chế pơ àr, trah dơm chi, acrylic, sơng zờu, sơng tồl, ală rùp mòn mờ ù buh, rùp mòn mờ lòs…Dilah bè ồng Lê Thiết Cương wăc rùp tàm phan lơh mờ ù buh bal mờ rùp hin 2 nơm bơs tàm kuar ai jơnau lồi dŭt bơh Sră Bồ tơnggoh gĭt wă jrô Yàng Phờk dê den ồng Nguyễn Hồng Quang kung tơnggŏ rùp bơs pràn kơldang phan mờ phan ngui lơh là ù buh Hương Canh.

Mờ đah sền bơceh lơh, ală cau chài wăc rùp ờ mìng lơh tơngguh tai bơta hàng niam bơh jơi phan do dê mờ gam ơn pơyua ală jơnau đơs klŏ jrô bè rài kis. Mò Hoàng Phương Liên, là cau chài wăc rùp pà gĭt: “Ală cau chài wăc rùp tàm ràng tơlik bol hi dê, geh cau tơnggŏ mờ sơng zờu, geh cau tơnggŏ bơh pang rùp sơng tồl mơya jơh ală ndrờm tơnggŏ geh rùp să bơh dồ nơm bơs lơbơn niam mờ gơdan kờñ ngan. Rùp añ dê là mờ pang rùp chế pơ àr, dồ bơta rùp is ồn ngan. Añ kờñ pơyua tus tơl nă cau in rùp hin bơs geh bơceh pa, pang rùp hìu bơnhă bơs añ dê geh mè bèp mờ pe nă kòn. Añ kờñ tơnggŏ bơs lơbơn niam ngan, dồ hìu bơnhă ram mhŭ, nàng ală cau sền in ờ gŏ gơlơh rơngòt gơ wèt mờ bơs”.

Bal mờ ală jơnau yal tơnggĭt pa krơi bè rùp hin bơs, tàm ràng tơlik Sa tềp nam Bơs 2025”, jơi phan do gơgơs lơbơn lơmư, lơbơn niam ngan mờ rềp mềl rlau mờ cau sền. Ngọc Hân, Ùr hàng, cau rơndăp lơh rùp, pà gĭt: “Lài do, tơl nă cau sùm rơngòt bơs den tàng bè hơ̆ ală cau chài wăc rùp đơs bal kung ờ khin sơl bơceh wăc rùp bè bơs. Mơya mờ ràng tơlik Sa tềp nam Bơs 2025 do, bol he gơtùi gŏ uă ngan ală rùp să, ală jơnau kơlôi đơs krơi is bơh bơs dê mờ anih lơi hơ̆ bol he rơ̆p gŏ ală rùp hin gơ niam ngan, ală rùp hin bềng rùp să, sơnam pa ngan mờ nam pa. Să tờm Ngọc Hân kung là cau bơsram wăc mòn rùp sơl, là dồ nă cau rơndăp mòn chờ hờp ngan tŭ gơtùi ngui pang rùp bơh Lê Thiết Cương dê nàng bơceh lơh geh ală phan jòi tơrgùm àu tiang”.

Ồng Vương Đức là dồ nă cau pơlam lơh lơma, yal: “Kơlôi sơnơng tĕ hơ̆ là dồ rùp pơrya, bè tŭ jiơ gam gơ lòt, uă ngan tiah ală hìu duh khuai hìu yàng phờk duh khuai bơs, bol he pal kơlôi tĕ tus ală bơta bơtuah bơtuài hơ̆. Añ kơlôi ală cau chài wăc rùp nam do kờñ tơnggo nùs nhơm bơh he dê tềng đăp tŭ jiơ gam gơ lòt, pang rùp “Rài kis jŏ” wăc 2 nơm bơs rơklồn bal să gơgơs dồ rùp lơmpòng, 1 rùp wil, bal mờ hơ̆ là ală nha mờ is ồn là bàr nơm măt pràn ngan, đơs bè bơta ờ tŭ lơi chơ̆t bơh rài kis dê, bơta gam sùm bơh rài kis dê”.

Ờ mìng geh ală rùp bè bơs lơm, ràng tơlik gam cèng tus dồ cơldŭ rùp gơklŏ gơcrà rơ̆ ru ală pang rùp tàm uă tơngume krơi is. Bơh ƀòn lơgar lơngăp lơngai bơh ồng Nguyễn Thanh Quang dê wăc, ală pang rùp ờ gơ wañ, bơkàu pa gam kis gơklŏ gơcrà bơh Bình Nhi dê wăc; cau sền gơlơh bè hŭi tĕ he tàm ù tiah bơkàu mai, bơkàu mận tiah jơnhoa bơh Vương Linh dê wă, chờ hờp chờ hờn lòt nhơl chờ bồ nam pa bal mờ cau chài wăc rùp là Việt Anh mờ Hoàng Phương Liên…lơh gơs rùp să bồ sơnam pa bềng lìu tàm ală ngai bồ nam pa 2025.