Sươn bal phan dơlam ù Phú Yên geh tơnggơs bơh nam 2024, ơnàng mờr 2 rbô kơi sồ vuông ù gờl mờ pơgăp 1 rbô kơi sồ vuông tiah dà lềng, gơ ơm tàm 22 sàh, sơnah ƀòn đah măt tơngai Lik càr Dăk Lăk dê. Pơnrơ mờ bơta tam tìp bal đah ù gờl mờ dà lềng dờng, sươn bal geh ală ù tiah brê bơnơm krơi is ngan bè kơlhuk Ô Loan, kơlhuk Cù Mông, pòt dà lềng Xuân Đài, Nhất Tự Sơn, Hòn Yến…bal mờ ală tềl lời wơl phan dơlam ù geh sơnam pơgăp 65 tơlak nam. Mờ tiah do kung gam ơn prăp ală phan lời wơl niam chài li la bal mờ 3 tiah tềl lời wơl dà lơgar is ồn, 19 tiah tềl lời wơl dà lơgar, rlau 80 tiah tềl lời wơl kâp càr mờ 4 phan lời wơl niam chài ờ di phan bơna dà lơgar dê.

Bơta tam tìp bal đah phan dơlam ù, dà lềng bồt bơlào, niam chài mờ jơnau kah yau neh lơh gơlik gơs bơta krơi niam bơnĕ is ngan bơh Sươn bal Phan dơlam ù Phú Yên dê. Jăt cau gĭt wă jrô phan dơlam ù là ồng Trần Tân Văn, do là ală bơta geh bơh sơnrờp kwơmàng nàng Dăk Lăk kơlôi tus bơ̆t bơtàu Sươn bal Phan dơlam ù gùt plai ù UNESCO.

"Sươn bal phan dơlam ù gùt plai ù bơh UNESCO dê là dùl broă lơh tơrlòng lài bơtàu tơngguh lơh sa – mpồl bơtiàn kơnhăp jŏ, geh gơdờp uă ngan tus tơl broă lơh bơh ƀòn lơgar dê. Broă lơh tơrlòng lài do sền dờng màng, prăp gàr mờ ngui niam bơta kwơ bơh jơh ală bơta phan lời wơl dê, tàm hơ̆ bơta kwơ phan lời wơl phan dơlam ù là tờm ngan, is ồn sền dờng màng bơta gơrềng bal đah ală bơta kwơ phan lời wơl phan dơlam ù mờ ală bơta kwơ phan lời wơl ndai”.

Bulah Sươn bal phan dơlam ù Phú Yên geh uă bơta pràn nàng bơtàu tơngguh lòt nhơl mơya tŭ do bơta kwơ phan lời wơl ờ hềt jòi lơh ndrờm pal. Tàm bàr pe anih phan lời wơl, phan bơna bơ̆t bơtàu drơng năc lòt nhơl ngài in gam ờ hềt pràn jak. Broă jòi lơh lòt nhơl kung ờ hềt ndrờm bal sơl, tàm tŭ ală jơnau yal bè phan dơlam ù, jơnau kah yau mờ niam chài ờ hềt geh yal wơl dùl bă lơh gơkờñ nàng năc lòt nhơl ngài in gơtùi gĭt wă jrô rlau bè bă ù. Do ngan là bơta siơ̆u kờñ pal geh bơtơl dilah kờñ Sươn bal phan dơlam ù Phú Yên ờ mìng geh dùl măt hòi lơm mờ mùl màl gơgơs dùl broă lơh tơrlòng lài bơtàu tơngguh kơnhăp jŏ. Bơh mùl màl lam lơh, ồng Hoàng Xuân Đôn, Lam bồ Mpồl Ătbồ Sươn bal phan dơlam ù gùt plai ù UNESCO Dơng bơnơm lŭ Đồng Văn, càr Tuyên Quang, đơs: Phú Yên geh phan kwơ geh is phan lời wơl li la, gùng lòt ƀươn, bal mờ uă broă lơh ờs mờng bơh yau mờ geh uă ù tiah bơtàu tơngguh lòt nhơl, jơnau là broă lơh bè lơi gơ in dipal.

"Sươn bal phan dơlam ù Phú Yên geh wil tơl ală jơnau bơta pràn bè phan lời wơl nàng bơtàu tơngguh, geh bơta pràn nàng bơtàu tơngguh tàm tiah hơ̆ tơn bơh cau ƀòn lơgar dê, tài cau ƀòn lơgar mờ ai cau ƀòn lơgar in. Jơnau tŭ do là broă lơh, càr kung pal lơh gơlik bơta pal geh bơh sơnrờp là kòn bơnus mờ priă jền”.

Bè hơ̆, broă lơh ờ mìng là bơcri phan bơna bơ̆t bơtàu halà bơ̆t bơtàu phan bơna lòt nhơl. Kwơmàng rlau là gơgơs mpồl cau tơl pràn jak nàng đal gŏ, prăp gàr, mblàng bơsong mờ yal jơnau phan lời wơl; mơkung dong làng bol in wă là phan lời wơl hơ̆ ngan là bơta pràn bơtàu tơngguh mpồl bơtiàn dê. Ồng Trịnh Hải Sơn, Chủ tịch Mpồl dềt mìng broă bè Sươn bal phan dơlam ù gùt plai ù Việt Nam đơs là, Dăk Lăk kờñ pal lam lơh ndrờm bal bơh lơh sir sră nggal jak chài tus prăp gàr phan lời wơl mờ tơngguh uă gĭt wă mpồl bơtiàn:

 "Lài ngan là rơ̆p pal rơcăng sră nggal tơl niam bal mờ bơta tus bal bơh ală cau gĭt wă jrô bơto pơlam. Dơ̆ bàr là broă hòi jà prăp gàr ală bơta kwơ phan lời wơl, is ồn là phan lời wơl phan dơlam ù tàm kơnhoàl ù tiah sươn bal, tơngguh uă gĭt wă tàm mpồl bơtiàn nàng kơlôi tus tơnơ̆ do gơtùi bơtàu tơngguh lòt nhơl. Mờ pal geh broă rơndăp lơh tàm bơta tam gơl nhơm trồ tiah nàng bơtàu tơngguh kơnhăp jŏ Sươn bal phan dơlam ù do”.

Do kung là gùng lòt mờ càr Dăk Lăk gam gĭt nền tàm ală tŭ bơ̆t bơtàu Sươn bal phan dơlam ù Phú Yên. Jơnau kờñ gơ ai tơlik là bơ̆t bơtàu broă lơh tơrlòng lài bơtàu tơngguh ngan ngồn, ai prăp gàr lơh bơnàng jă mờ mpồl bơtiàn lơh anih tờm. Jăt tàm bơta hơ̆, ƀòn lơgar rơ̆p gơgơs ală gùng lòt nhơl phan dơlam ù, lòt nhơl sền gŏ, lòt nhơl mpồl bơtiàn, bơto bơtê mờ kơlôi sơnơng; tàm tơrbŏ phan lời wơl phan dơlam ù mờ niam chài, phan sa, ƀòn broă lơh mờ broă lơh sa sươn sre nàng gơgơs ală phan bơna geh bơta kwơ gơguh tai. Ồng Huỳnh Vĩnh Ngọc, Kwang Lam bồ Mpồl Ătbồ Sươn bal phan dơlam ù Phú Yên, pà gĭt, mpồl gam lam lơh jăt Ală jơnau neh lơh nền bal mờ 12 kơnòl broă tờm kwơmàng:

"Bol hi gam tơrgùm tàm broă lam lơh lòt sền, sền swì tơl làm wơl ală phan lời wơl phan dơlam ù kung bè li la phan kis tàm tiah sươn bal phan dơlam ù nàng lơh cơng tàng jơnau yal jak chài. Bơh hơ̆ geh ală cơng tàng bè jak chài den bol hi rơ̆p bơyai lơh ală dơ̆ pơrjum cribơyai jak chài ală lơgar kung bè lơh kơ̆ kơl jăp wơl mờ lơh sir sră nggal nàng pơyua UNESCO in tàm nam 2027”.

Măt sơnđan UNESCO mìng geh kwơ tŭ phan lời wơl geh prăp gàr mờ gơgơs ală bơta pràn tàm mpồl bơtiàn. Tŭ làng bol geh dờp kwơ bơh phan lời wơl ƀòn tờm dê tơn, khi kung rơ̆p gơgơs ală cau sền gàr phan lời wơl niam ngan. Hơ̆ là bơnàng jă nàng Sươn bal phan dơlam ù Phú Yên lơh geh măt hòi ală lơgar, mơkung gơgơs bơta pràn gơn kơnờm bơtàu tơngguh kơnhăp jŏ.