VOV4.Xơ Đăng - Tơdroăng hơ’muăn ‘’Apía, H’Lŭi ƀă Rui kong’’ dêi kuăn ngo Jarai cho tơdroăng hơ’muăn ton rôh nah ki pơxá inâi tíu tơring Sông Hinh, kong pơlê Phú Yên, ki achê ƀă kong pơlê Dak Lak. Tơdroăng hơ’muăn ‘na prế nâ o Apía, H’Lŭi kuăn tê ôh tá ai nôu pâ, prế pâ dêi rơpó khât, hlối lĕm rơduăng má môi tung kơpong mê, hên mâu rơtăm vâ tơbriât xo prế. La ôh tá mơhúa, o H’Lŭi thế xo môi ngế hmâ tong ki vâi ô eăng tro xeăng djâ vêh, klêi mê pơxêh pro gá chiâng Rui chu a rŏng tơnêi vâ ngăn kong ngo Ea Ly troh Phước Sơn ƀă mơ’nui gá hlối hlâ. Tơdroăng hơ’muăn mê vâ tối ti lâi chiâng ai hmốu kân um kleăng vông hnhâ dêi mơná rơdâ bê châ hding môi pâ kơdung ngo Čư̆ M’Kuy.