Tiô Khu xiâm ngăn pơkeăng pơlât, nôkố kơxô̆ mơngế tâ COVID-19 tơkŭm hên a kơpong peăng Kơnhŏng dé a rôh kong prâi pơ’lêh rơnó ƀă kơxô̆ mơngế tâ tú hên tiô tối tung 10 hâi hdrối kố nah tâk 4,2 hdrôh tâng vâ pơchông ƀă hdrối mê. Pakĭng mê, tơdroăng truâ kên pâng môh cho kal drêng prôk drô troăng, ối a tíu pú hên, a hngêi pơkeăng pơlât ai drêng ‘nâ tíu ki mê ôh tá tơniăn.

A tơnêi têa pin, pơreăng ki nếo pơ’lêh chiâng biến thể XBB.1.5 hlo ai sap khế 1/2023 ƀă châ Khu xiâm ngăn pơkeăng pơlât tối tơbleăng hdrối, pơreăng ki pro rơ-iô mê tâ tú rĕng tâ mâu pơreăng ki kơ-o châi krôk, kơchêi, lo têa môh ƀă hên ki ê...

Nôkố xuân ai ki nếo ki pơ’lêh mê a mâu ngế châi tamo. Mơhé kơxô̆ mơngế tâ tâk tâng vâ pơchông ƀă măng tĭng hdrối, la tiô Yăo sư - Tiê̆n sih Phan Trọng Lân, Ngế xiâm ngăn pơkeăng  hbrâ mơdât pơreăng, Khu xiâm ngăn pơkeăng pơlât tối, ƀă tơdroăng ki tâ tú môi tiah nôkố, pơreăng xuân ối a  râ má 1, tơkéa vâ tối ối a kơlo ngiât kơlo tơniăn:

“Ƀă a râ pơreăng mê tơkéa vâ tối cho a râ cheăm, bêng, vâ tối pin kô rĕng châ ‘nâi, hdró kơpong mê pôi tá ăm tơdjâk troh mâu tơdroăng cheăng ki ê, ƀă mơdât pơreăng ing xiâm, mê cho mơdât ki tro má môi vâ pôi tơdjâk troh mơnhông cheăng kâ, rêh ối, tơdroăng mê ngăn a hên tơdroăng ki veăng tơmâng pêi pro  rĕng mơdât dêi mâu cheăm bêng, ing mê kô kâi ví tơdroăng xâu rơ-iô, ki tơngôu dêi kuăn pơlê”.

Mơhé nôkố kơxô̆ mơngế ki râ ó  tung tâi tâng kơxô̆ mơngế ki tâ pơreăng ôh tá tâk hên, la Yăo sư - Tiê̆n sih Phan Trọng Lân,  xuân tối pơchân, tung pơla nôkố,  thế séa ngăn nhên mâu kơxô̆. Mâu kong pơlê, pơlê kong kơdrâm, pơlê kong kân pêi kơtăng hnoăng cheăng séa ngăn ‘na pơreăng tâ tú, klêi mê tơbleăng mâu tơdroăng ăm kuăn pơlê ‘nâi ƀă hbrâ mơdât, malối ki tơ’lêi tâ tú pơreăng troh dâng lâi, vâ rĕng kâi mơdât troh dâng mê:

“Nôkố  pin hlo tiah kố ki tơ’lêi tâ tú troh dâng lâi, séa ngăn mơdât troh dâng mê tơkéa vâ tối pin oh tá mơdât mâu tơdroăng cheăng pêi ki lâi mê cho tơdroăng pơkâ ki má môi dêi pin; pâk vaccine  ăm tâi tâng mâu mâu ngế sap kŭn troh kân pâk tŭm kô kơdroh mâu tơdroăng tơdjâk.

Tiah mê ki tơ’lêi tâ tú ai la ngăn tiô tơdroăng, la ôh tá mơdât tâi tâng mâu tơdroăng cheăng pêi ki lâi dêi pơlê pơla drêng ối a râ ki tơniăn, tơkéa vâ tối câp độ ki ôh tá luâ’’.

Tiô mâu ngế rơkê tối, kơxô̆ mơngế tâ COVID-19 a tơnêi têa pin tâk rĕng tung 10 hâi hdrối kố nah, mơni xua tung châ dêi mơngế klêi kơ’nâi pâk vaccine lơ mơngế ki hdrối nah hiăng tro pơreăng mê hiăng kơdroh la vêh tâ tú nếo. Tơdroăng kuăn pơlê mơdêk trâm tơpui tơno, prôk lăm xuân pro tơ’lêi ăm pơreăng châ tâ tú.

Ki khât, kơxô̆ mơngế tâ COVID-19 ối hên tâ khu xiâm ngăn pơkeăng tơbleăng rêm hâi, xua ai hên ngế tro la vâi ôh tá lăm tôe ngăn têa môh, vâi tôe ngăn dêi a hngêi ƀă pơlât dêi a hngêi. Tối kơxô̆ mơngế tâ COVID-19 tâk ôh tá xê tơdroăng ki ôh tá hmâ hlo, Tiĕn sih Nguyễn Lương Tâm, Ngế Phŏ Khu xiâm ngăn pơkeăng hbrâ mơdât pơreăng (Khu xiâm ngăn pơkeăng pơlât) ăm ‘nâi,  tung lâp plâi tơnêi xuân ai rôh pơreăng tâ tú hên, ƀă rôh tâ tú iâ:

“Pin pôi tá préa vâ séa ngăn mơdât pơreăng. A kong têa Nhuk, Hàn Quốc, Mih ƀă mâu kong têa ki ê kơxô̆ mơngế tâ COVID-19 tâk hên klêi mê chu ƀă hiăng chiâng pơreăng ki hmâ tâ tú. Pin pôi tá préa, pêi pro tro 2K, pâk vaccine mơdât pơreăng. Mâu kong pơlê ki lâi kơxô̆ mơngế pâk hâi tŭm thế pơtối  tơbleăng pâk nếo’’.

Mơhé kơxô̆ mơngế tâ COVID-19 tung mâu hâi achê kố tâk hên la vâ chê 4 khế hdrối lâp tơnêi têa ôh tá hlo ai ngế ki lâi hlâ. Tiô tối tơbleăng kơxô̆ mơngế kô pơtối tâ tú hên la kô ôh tá pro hâ ho mơngế pơlât a hngêi pơkeăng, xua mâu ngế ki tâ tú mê ôh tá râ. La ga, mâu ngế ki tơ’lêi tâ tú, mê cho: Mâu hơnăm hiăng krâ, mâu ngế ki lâi tung châ hiăng ai tơdroăng châi ki kố ki mê... pôi tá tơngôu thế đi đo hbrâ rơnáu xua pơreăng kô pro hên tâ tú.

Tiô tối tơbleăng dêi Khu xiâm ngăn pơkeăng pơlât, kên pâng môh rơkong, xếo kŏng ƀă kơƀŏng xếo ƀă têa pơkeăng cho tơdroăng pêi pro ki tro má môi vâ hbrâ mơdât pơreăng COVID-19. Ngế phŏ ngăn pơkeăng pơlât Nguyễn Thị Liên Hương ăm ‘nâi, rêm măng tĭng mâu tíu pêi cheăng khu râ kơvâ cheăng dêi khu xiâm xuân tơkŭm hôp mơ’no tơdrêng tiô troăng hyôh ƀă mâu ngế rơkê dêi Khu xiâm ngăn pơkeăng pơlât lâp plâi tơnêi ƀă CDC Mih vâ tối nhên, tối tơdroăng pơreăng tâ tú a Việt Nam, hlối tơbleăng ki nếo ai mê xuân môi tiah ki tơdjâk dêi virus pro chiâng pơreăng tơ ê nếo:

“Nôkố mâu ngế tro tâ COVID-19 tâk la ôh tá hlâ, kơxô̆ mơngế tâ tú chiâng râ ó tâk iâ. Mơhé ti mê, pin xuân thế hbrâ rơnáu đi đo vâ ai troăng ki mơdât teăm tơdrêng  ƀă COVID-19 xuân môi tiah mâu pơreăng ki ê mê cho tơngê lo mơheăm. Mâu kong pơlê, pơlê kong kân thế mơjiâng pơkâ tơbleăng mâu tơdroăng pêi pro ăm tơtro ƀă xoăng kơxô̆ liăn vâ pêi cheăng hbrâ mơdât pơreăng. Ƀă ki xiâm vaccine hbrâ mơdât COVID-19, Viện vệ sinh dịch tể xiâm tơnêi têa ƀă Khu xiâm ngăn pơkeăng hbrâ mơdât pơreăng pâ thế rôe lơ pâ tŏng kum kơxô̆ ki hên ngăn tiô tơdroăng pâ dêi mâu kong pơlê, pơlê kong kân.