VOV4.Xơ Đăng - Tung mâu hơnăm hdrối mê hía nah, luât pơkâ mơhá liăn ăm hnoăng rak ngăn kong tung kong pơlê Kon Tum châ tơbleăng pêi ai pơxúa tơƀrê khât hiăng kum kuăn pơlê hlê plĕng tung rak ngăn, kring vế ƀă mơnhông pêt kong dêi mâu ngế pơkuâ rak kong ƀă mâu rơpŏng kuăn pơlê xo rak ngăn kong chôa mơdêk hlê plĕng. Kuăn pơlê hlê plĕng tâ tung pêi pro hnoăng cheăng rak ngăn ƀă mơnhông pêt kong a pơlê cheăm hlối hlê nhên ki pơxúa, hnoăng cheăng pêi dêi tơná. Pro pơro hâi kố pơxá “Mơhá liăn ăm hnoăng rak ngăn kong - Ki pơxúa krá ton” tối ki pơ’lêh hlê plĕng dêi kuăn pơlê tung tơdroăng xo rak ngăn kong, veăng mơdêk ki pơxúa a rak ngăn, mơnhông pêt kong a tơnêi kong.