VOV4.Xơ Đăng - Hâk phiu kâ báu nếo cho môi tung mâu tơdroăng po mơdĭng rơtế ƀă tơdroăng rêh ối pêi cheăng kâ dêi mâu hdroâng kuăn ngo Tây Nguyên sap ing ton nah troh nôkố. Drêng rơnó xuâ báu hiăng tâi, báu hiăng châ tâ pêng kơxâk, châ ‘măn pêng tung hnôu dêi tơrêm rơpŏng hngêi, mê vâi krâ-nhŏng o hbrâ dêi mâu í, drôu xiâm, tơxông prông, hmê châ pế ing báu nếo. Kố cho tơdroăng po mơdĭng vâ mơnê kơ khu xeăng báu ƀă mâu xeăng hiăng kum pro ăm kong mêi tro, tô ‘ló, báu, loăng plâi xông chiâng dâi lĕm, kơpâu hên, hlối rơkâu pâ ivá mo xêi tơdroăng rêh ối ai hmê kâ phâi tơtô, rêh ối hơniâp ro. Pro pơro kơ’nâi kố, ngin ai tối ‘na tơdroăng po tĭng kâ báu nếo.