Ti tăng plĕng hdrê pêt, mơnăn păn vâ mơdêk pêi lo liăn, lối 4 hơnăm hdrối, đảng viên hơnăm ối nếo Lý Seo Lử ối a thôn tơkăng kong Lũng Pô, cheăm A Mú Sung, tơring Bát Xát hiăng rôe 100 xiâm hdrê loăng plâi nong pêt a tơnêi kơdrum ngo dêi rơpŏng. Ngoh xuân mơhnhôk vâi krâ kuăn pơlê tung thôn rơtế pêt vâ mơjiâng kơpong pêt tơmeăm tê mơdró. Ngoh Lý Seo Lử, ối a thôn Lũng Pô, cheăm A Mú Sung, tơring Bát Xát tối:

“Pêt priât mê hmâ tro ôa hdrong kâ ‘nhê, pêt pôm loăng hên hơnăm mê pro ‘nhê tơnêi xua mê á pêt plâi kâ, a kố cho mâu plâi nong. Apoăng loăng ối kŭn pin thế rak ngăn, laga sap hơnăm má 3 loăng hiăng ai plâi ăm châ hên liăn ngân’’.

Pôa Ma Seo Lằng, Kăn pơkuâ hnê ngăn Chi ƀô̆ thôn Lũng Pô, cheăm A Mú Sung tối ăm ‘nâi, tâi tâng ƀăng deăng pêt plâi nong a thôn cho 4 ha. Tung mê, ai hên ƀăng deăng pơxiâm krí plâi hơnăm má môi, má 2 ƀă plâi nong cho loăng plâi ki xiâm vâ mơnhông cheăng kâ dêi thôn.

“Châ tơmâng tŏng kum dêi cheăm djâ loăng plâi nong Lũng Pô tung OCOP dêi cheăm A Mú Sung. Tiô á, kố xuân cho môi loăng plâi xăm kơklêa kơdroh kơtiê a thôn Lũng Pô’’.

Rơtế ƀă tơdroăng pói vâ mơjiâng mâu troăng châ tơƀrê tung mơnhông mơdêk cheăng kâ a thôn pơlê, 2 hơnăm hdrối, ngoh Chảo Láo Tả, Kăn phŏ hnê ngăn Khu pơkuâ kuăn pơlê pêi chiâk deăng cheăm Dền Sáng cho 1 tung 10 rơpŏng apoăng veăng tơdroăng tơkêa bro pêt krui kơxái. Troh nôkố, krui kơxái hiăng kum rơpŏng ngoh Tả ai tơ’nôm pêi liăn.

“Djâ troăng ahdrối ƀă mơnúa pêt 40 xiâm krui kơxái. Apoăng pêi lo liăn vâ chê 10 rơtuh liăn. Xuân pói vâ vâi krâ kuăn pơlê tung cheăm ƀă a mâu cheăm ki ê tâng kong prâi tơtro mê plâi ki kố cho plâi ki xiâm vâ xăm kơklêa kơdroh kơtiê, mơnhông mơdêk krá tơniăn’’.

Ngoh Tẩn Láo Tả, thôn Nậm Giàng, cheăm Dền Sáng, tơring Bát Xát xuân vâ hriâm troăng pêi kố vâ rôe pêt nếo mơdêk kơxô̆ xiâm krui kơxái, mơdêk pêi lo liăn ăm rơpŏng hngêi:

“Rơpŏng á mê roh kố xuân kĭ pêt laga pêt iâ. Roh kố xuân pói vâ lăm ngăn mâu rơpŏng pêt hên mê rak ngăn loăng plâi môi tiah lâi, mê á xuân pói vâ vêh a hngêi rơpŏng á pêt tơ’nôm dâng 300- 400 xiâm nếo vâ pêi lo tơ’nôm liăn ngân ăm rơpŏng’’.

A Bát Xát, pakĭng mơhnhôk mơjiâng tơdroăng cheăng kâ, xăm kơklêa, kơdroh kơtiê, mâu đảng viên xuân djâ troăng ahdrối tung pơtâng tối mơhnhôk, veăng tơlo liăn vâ mơjiâng thôn pơlê nếo. Môi tiah kum rơpŏng kơtiê mơjiâng pro hngêi trăng, hngêi mơdrah lơ kum thôn pro troăng kân ƀă hía hé. Pôa Lầu A Páo, Kăn pơkuâ hnê ngăn cheăng Đảng cheăm Trình Tường tối hiăng ƀă dế veăng kum djâ tơdroăng mơjiâng thôn pơlê nếo a tíu kố ai tơdroăng ki châ tơƀrê nhên. Nâ Tẩn Lở Mẩy ối a thôn Nà Đoong hơ’muăn:

“Hngêi ton á o a peăng tá gá hiăng tơ‘nhê kơchoh tâi. Ai ngoh Páo troh ngăn hlo hngêi á tơ’nhê tâi tâng xua mê pâ ăm á o môi to hngêi kŭn tê. Á o phiu ro ‘nâng’’.

Pôa Giàng A Sáo ƀă nâ Tẩn Lở Mẩy a thôn Nà Đoong bu cho péa tung kơxô̆ mâu rơpŏng kơtiê tung cheăm Trịnh Tường châ kum hngêi ối nếo. Ƀă vâ chiâng pêi pro tơdroăng mê, pôa Lầu A Páo, Kăn pơkuâ hnê ngăn cheăng Đảng cheăm ai hên tơdroăng veăng kum.

“Á rơtế mâu khu pú kăn ƀô̆ cheăm lo lăm séa ngăn nhên mâu rơpŏng kơtiê vâ ai um, tơdroăng ki khât ‘na tơdroăng rêh ối dêi vâi krâ kuăn pơlê, ing mê kơnôm tơdroăng tŏng kum dêi mâu khu tơrŭm cheăng, khu tê mơdró kum mơjiâng pro rơnêu hngêi trăng ăm kuăn pơlê’’.

Hlê plĕng tơdroăng cheăng kâ dêi hên ngế kuăn pơlê tung cheăm ối pá puât, tơdroăng mơjiâng châ môi toăng hngêi krá kâk vâ ối, lơ pro môi troăng kân vâ châ prôk lăm tơ’lêi mê cho ôh tá hlâu. Pôa Lầu A Páo hiăng djâ troăng ahdrối, prôk hdrối tung tơlo liăn, mơhnhôk mâu tíu cheăng khu tê mơdró veăng tơlo mơjiâng thôn pơlê nếo. Ngoh Lý Xá Xe, Kăn phŏ Khu mơhnhôk kuăn pơlê cheăm Trịnh Trường, tơring Bát Xát mơnhên:

“Ƀă mâu rơpŏng pá puât ‘na cheăng kâ, mê pôa Páo hiăng mơhnhôk khu mơngế ai hiâm mơno hơ-ui kum, kơ koan khu tê mơdró tung cheăm ƀă pa kong kum mâu rơpŏng kuăn pơlê mơjiâng hngêi trăng kân lĕm rơdâ, châ tiô pơkâ thôn pơlê nếo’’.

Mơnhông mơdêk hnoăng djâ troăng ahdrối, mâu đảng viên dêi Đảng bô̆ Bát Xát châ khât cho mâu ngế “mơhnhôk” thăm pêi pro tơdroăng pơ’lêh tung pêi cheăng kâ a tơring. 4.440 ngế đảng viên tung tâi tâng Đảng kô cho khu ki xiâm vâ pêi pro mâu pơkâ kân dêi tơring tung hơnăm 2022 ƀă ăm plâ hneăng.