Thun bac bahrau daok mai tal haong anek saih bhum krong ribong taneran krong CL. Thun ni, ia ndik mai avar, ia tagok samar song glaong. Yaok ribau anek saih di dom huyện dalam tỉnh Đồng Tháp njauk nao đò, glaih glar tapa kraong piah nao tal sang bac. Kadha vak di  Thanh Tùng, urang vak di rayo sap ndom VN daok di bhum taneran kraong CL brei thau dom glaih glar angaok jalan nao bac da-a di dom adei dalam bilan ia ndik praong ini di xã biên giới Thường Phước 1, huyện Hồng Ngự..

 

Bahrau tapa pakat cấp trung học cơ sở, tal tuk tame thun bac bahrau jeng lac tuk ia daok ndik tagok, adei anek saih kathaot angan  Trần Thị Ngọc tal bac 6/5 sang bac THCS Thường Phước 1 oh thau nao tal sang bac meng jalan halei. Labik jalan atah jiak 5 km meng sang tal sang bac urak ni ia dauk abih. Bilan ia ndik praong pacang cakak di rilo labik, jalan palei nao tal sang bac jeng dauk dalam ia ngak ka dom adei oh nao tal sang bac hu. Biak patuah, sang bac song karja xã hu jak ba dom urang ngak pahla mek đò pajeng ba anek saih . Yaok harei 4 mbang, jiak 20 adei annek saih di palei Giồng Bàng  hu nao tal sang bac yau dom ayut karei karei.  Adei Trần Thị Ngọc drut droi lac:

 

Anek oh sahaneng lac anek hu pajeng ba yau ni. Meyah oh hu pajeng ba ye anek oh nao bac  hu. Kayua  sang oh hu thei ba anek nao hu. Ong muk jar var haong bruk raong lanung, mek baoh bao, daok amaik ame nao ngak bruk di Bei gon.

 

Yaok harei 4 mbang, mesup, beir harei, boh đò sit ba dom adei anek saih  buhm ia ndik  Hồng Ngự nao bac akhar haroh. Taduan ia tuh mai meng akaok krong, palei Giồng Bàng lac labik njauk ia dauk oh nao mai hu tuk ia ndik mai. Ia nduac khang, bruk khik caga siam mekre ka dom adei tuk halei jeng hu po đò iek prong di abih. Ong Nguyễn Văn Lịch, Phó Chủ tịch Ubbhpa bini xã Thường Phước 1 brei thau:

Dahlau di abih lac khik kajap ka dom adei nao mai, plaih mblung ia, hu aow phao, pambuak bruk song amaik ame pataom dom adei di sa labik, piah pajeng ba  hu siam mekre dalam bilan ia ndik .

Tui Jabat pato pakai  huyện Hồng Ngự, dalam huyện hu  2 labik  sang bac Giồng Bàng song Thường Thới Hậu A njauk ia sua pacang cakak nan ye anek saih nao bac hu pajeng ba. Tong abih dom adei dok bac pakat trung học cơ sở, dok veik lac pakat tiểu học. Ong Nguyễn Hữu Tiến, urang dang akaok jabat pato megru huyện Hồng Ngự brei thau:

Jalan ngak di Jabat lac khik hu ginup anek saih nao bac, saong khik caga siam mekre ka dom adei tuk nao tal sang bac.  Jabat jeng hu pathau khan  jak ba dom urang ngak pahla, piah ba dom adei nao tal sang bac hu siam mekre  .

Nao bac tuk bahrau tame thun bac bahrau dalam bilan ia ndik mbuan ba tal metai lihik ka dom adei anek saih, abih di nyu nan lac dom adei sit, oh thau caluai. Min ngan song dom adei anek saih di bhum atah bayah, bhum tapen negar dok gaok rilo kan kandah, yaom lac glaih glar, ye yam tapa kan kandah piah nao tal sang bac lac bruk bui sambai song haniem phol prong./.

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân