Meng hu sarak daong phun jien saong ba bruk ngak ka bhap bini bangsa takik di Ban raya HCM, sang sa-ai Trương Thị Kim Chi, bangsa Khmer, daok di P.26, quận Bình Thạnh, meng sa baoh sang kan kathaot hu jeng baoh sang ngak mbang hu labaih. Jien duah tame di sang sa-ai meng bruk ngak chả ikan saong uak mbuk. Langiu di bruk daong phun jien saong ba bruk ngak mbang di ban raya, quận Bình Thạnh daok hu daong ka sa-ai Chi labaih 60 triệu đồng piah padang sang daok. Gam haong jien patak pataom hu, bilan 07 meng blaoh, sa-ai padang hu sang birau abih jien jaik 200 triệu đồng. Sa-ai Kim Chi khan lac: “Dahlak hu karja, kapol nyaom di ban, quan daong brei mesriay phun jien, pato bruk ngak oh mek jien. Dua urang anek di dahlak nao bac jeng oh abih jien, daok hu brei paok jien bac…Meng bruk daong rilo gah dalam sa tukvak nan ye dahlak samar tabiak truh kan kathaot.” 

Sang sa-ai Maria daok di labik 111/28 Huỳnh Văn Bánh,  Phường 17, quận Phú Nhuận lac sa dalam dom baoh sang bangsa Cam yam tabiak truh kan kathaot meng bruk pablei salih. Meng phun jien mesraiy di kadung jien patruh iek patrun kathaot tuk camemeip lac 20 trieu dong, sa-ai peih kuan pablei pandap mbang, pablei khan ao, duah jien tame yaok pluh trieu dong yaok thun.

Bruk ngak tui sarak daong parilo bruk ngak mbang, daong sang daok, bruk ngak di Ban raya HCM hu daong ka bhap bini bangsa takik trun kathaot khang kajap, rilo sang mbiah yam tagok ngak kaya meda. Meng thun 2014 tal ini, Ub bhap bini Ban raya HCM hu buh rilo prein yava ka bruk patrun kathaot, patagok baoh sang mbiah ginup, paglaong raidiuk mbang ngui di urang bangsa takik. Labaih 30 danak dak pakat ban raya daong ka urang bangsa takik hu peih ngak yau ye: oh mek jien bac di anek saih bangsa Khmer saong Cam meng tal bac mẫu giáo tal abih pakat bac PTTH. Mban Bangsa Ban raya hu brei rilo pandap saong paok jien bac, kuhria abih tih labaih 9 tỷ đồng ka bhap bini kathaot saong anek saih bangsa takik; brei ka 50 sinh viên bangsa Cam nao bac di dom taneh ia langiu yau Indonesia, Malaysia, dalam nan hu 32 sinh viên bac tamat blaoh gilac veik mai negar ngak bruk; daong ka tuan pato sap bangsa abih tih labaih 2 tỷ đồng; daong 30% jien blei thẻ BHYT ka urang sang jaik kan kathaot. Ong Trần Chí Vỹ, Chánh văn phòng - Mban Bangsa Ban raya HCM brei thau: “ Kham merat tal puac thun 2020, baoh sang bangsa kan kathaot trun 1% sa thun, baoh sang jaik kathaot trun 2%. Piah ngak hu bruk nan, tukvak tapa, Mban bangsa Ban raya hu rilo jalan ngak, yau : jak ba, peih ngak sarak bangsa, daong phun jien…Tukvak anak tal, ban daok peih ngak sarak karei bo Ban raya hu brei ngak blaoh.”

Meng dom bruk ngak siam lagaih nan, tal urak ini, baoh sang urang bangsa takik kan kathaot dalam ban raya trun daok 1.300 baoh, meblah 0,07% dom sang dalam ban. Quận Bình Thạnh lac sa dalam dom quan di Ban raya HCM ngak siam bruk trun kathaot khang kajap. Urak ini, Bình Thạnh oh daok sang kathaot tui tanut chuan di Ban raya vaktu 2016 -2020, baoh sang jaik kathaot daok labaih 1.000, meblah 0,83% dut saong bhap bini dalam quận. Piah jhul pakhang bruk patrun kathaot hu khang kajap di quận Bình Thạnh, muk Nguyễn Thị Hiếu, Phó akaok jabat LĐTB saong XH quan Bình Thạnh brei thau: “Quận daok peih ngak dom sarak sangka daong ka sang jaik kathaot, bhap bini bangsa takik dalam nan hu bangsa Cam piah daong ka urang tabiak truh kan kathaot khang kajap; pato bruk ngak, duah bruk ngak; daong phun jien laba lap meng kadung jien Patruh iek patrun kathaot, Kadung jien duah bruk ngak ka dom baoh sang jaik kathaot, baoh sang birau tabiak truh kathaot.”

Dom thun tapa, gam saong sarak daong pagrap tanat raidiuk, Ban raya HCM daok hu sangka patagok ilamu siam gheih di dom bangsa. Dom rija roya yau: Harei Nguyên Tiêu, Chôl Chnăm Thmây, Ramadan hu khik ramik, patagok hu daong paglong raidiuk ilamu, jalan sahaneng ka bhap bini. Tal urak ini, jaik abih dom khu phố bhap bini daok hu sangmegik, hu surao, baha piah hu labik ka mikva ngak adat cambat; pasak bac megru di bhap bini hu buh jien padang ngak…Meng hu yau nan, raidiuk bhap bini dom bangsa takik di Ban raya HCM dak harei dak hu salih birau saong glaong tagok./.

Urang lang: Ái Nghiêm -11/10/2020

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân