Dom harei ini, di dom gilang caik pandap di siêu thị Co.op mart Phan Thiết tuk halei jeng hu rilo radaih pajeng pandaptame tabiak. Urang khik iek gilang di sieu thi  Co.op mart Phan Thiết brei thau, dom gilang hu khik, caga labaih 70% pandap pablei Tết, 15 harei tra brei ba tame gilang dom janih pandap yau giò, chả, dom janih rilo…

          Muk Nguyễn Thị Hồng Loan – Yam ndoc siêu thị Co.op mart Phan Thiết brei thau lac hu caga blaoh dom pandap panda pandar yaok harei piah pablei tuk Tết yaom abih tih labaih 150 tỷ đồng, dut saong thun 2020 jeng oh tagok rilo. Dalam nan, brei caga dahlau 9 nyaom pandap pablei khik yaom nan lac: brah, saradang, menyak, rilo pabui, rilo manuk, baoh manuk ada, njam patam, baoh karaoh, kaya ikan dalam ia…Langiu di nan daok hu rilo danak dak pablei trun yaom dom nyaom pandap yau pandap mbang, pandap pandar dalam sang, khan ao angui cuh…, piah klak rabha kan kandah saong bhap bini.

          “ Hu biak rilo janih pandap pablei tui danak dak trun yaom, pachreih urang blei. Saong thun ini jeng lac thun jit ruak kan kandah nan ye dom urang pabak pandap jeng kuhria tal bruk pablei salih dalam bilan Tết, abih di nyu lac dom janih pandap pandar yaok harei oh tagok yaom dut saong thun blaoh piah ka mikva sahanang hatai blei pandar.”

          Di Pasak pablei salih Lotte Việt Nam - Dhar Bình Thuận, Dhar Công ty CP Pablei salih Bách Hóa Xanh di Bình Thuận, Công ty TNHH Pablei salih Dịch vụ Tùng Loan…,pandap pablei Tết hu caga ginup, pandap siam, rilo janih.

          Sa-ai Nguyễn Minh Tuấn – Yam ndoc Pasak pablei salih Lotte Phan Thiết brei thau, kuhria mboh dahlau bruk blei pandap tuk Tết Nguyên đán ini meda tagok nan ye đơn vị blei pandap pataom tame gilang yaom labaih 50 tỷ đồng. Langiu di nan, piah pachreih urang blei pandap, dom doanh nghiep hu peih ngak gam gam dom bruk pachrei pablei salih, trun yaom ka tuia damuai tapa rilo jalan ngak yau: blei pandap alin pandap, suak sam alin pandap…

          “Lotte Mart oh tagok yaom tuk Tết. Nan lac panuac sanya di khol dahlak ngan saong urang blei. Hu biak rilo labik pabak pandap pambuak saong khol dahlak piah trun yaom saong ba tabiak  rilo danak dak biak siam tuk Tết ini.”

 

          Lac labik pabak pandap duh ka Tết Padai (ia bulan bilan mat bak baoh ) saong Tết Nguyên đán ka bhap bini bhum ceik tỉnh Bình Thuận dalam rilo thun tapa, Pasak Dịch vụ bhum ceik (di Ban Bangsa tỉnh) jeng hu ba pandap tal dom labik pablei, cửa hàng di dom xã bhum ceik, yaom abih tih jaik 2 tỷ đồng. Tui sa-ai Nguyễn Văn Chi – Yam ndoc Pasak Dịch vụ bhum ceik tỉnh Bình Thuận, tuk Tết mikva bhum ceik khin blei ralo dom janih pandap yau: Brah, ndiuk, rilo dom janih, menyek mbang, mì gói, sara Iốt…

          “ Piah duh ka Tết padai di 4 xã bhum ceik di huyen Bắc Bình, pasak hu ba tabiak jalan ngak  gam pajeng pandap tal dom cửa hàng, đại lý gam  pajeng pandap nao pablei di dom xã piah mikva blei hu mbuan lagaih di abih”.

          Piah pabak pandap pablei tabiak darak pasar hu rilo, yaom kaom tani tanat oh luai brei kuhrang pandap, tagok yaom, UB bhap bini tỉnh Bình Thuận hu mbaoh tangin tame harak brei buh tabiak 113 tỷ đồng daong ka dom doanh nghiệp blei khik piah pandap pandar yaok harei piah khik yaom tani tanat tuk dahlau, dalam saong hadei Tết thun anek sak Kubao 2021. Bruk khik iek darak pasar, pacang caga pandap ja, pandap ngak mblah tui jeng hu jhul khang. Abih di nyu lac, caik hatai tal dom pandap mbang, menyum, pandap pandar oh siam ngak khat lahik jien, kan kandah tal raidiuk bhap bini; abih di nyu lac dom janih pandap duh ka bruk pacang caga jit Covid-19./.

 

Urang lang: Aí Nghiêm  11/1/2021

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân