Bruk jum pataom, pambuak talei rohim haong gauk nan lac jalan diukrai siam mekre meng kan mai di bhap bini Cam daok di tỉnh An Giang. Dalam bruk padang ngak palei pala bahrau, bruk jum pataom nan dak hu khang jang, glaong jang tuk yaok urang, yaok baoh sang, yaok puk palei Cam jeng hu mbaok tame ba gauk ngak ka puk palei hadah mekre jang. Tapa nan hu daong khik ramik, dak padang saong pakhang bruk jum pataom dalam palei.

Urang Cam “Jak gauk ngak siam di palei Cam”

 

Tỉnh An Giang urak ini hu 9 palei Cam daok dalam 9 xã, phường saong hu jaik 5 rabau sang, labaih 17 rabau menuac, daok rilo di ban sit Tân Châu saong huyện An Phú.

Dom thun jaik ini, tapa peih ngak dom sarak di T.Ư, di tỉnh An Giang saong di puk palei, mikva Cam di An Phú hu ginup meda tagok biak rilo. Urak ini, nao tapa palei urang Cam meda mboh hu 1 palei pala bahrau daok hu padang tagok tapa dom baoh sang bê-tông khang kajap daok tamuh tagok biak rilo, dom urang kham merat ngak kaya meda dalam bhap bini Cam dak harei dak rilo, anek kamuan urang Cam harei ini hu dom menuac ngak bác sĩ, kỹ sư. Ong Aly, hakim jamaah Cam Islam xã Khánh Bình, huyện An Phú bui sambai anak bruk salih bahrau di puk palei drei: “Palei Cam ini dahlau daih lac palei kan kathaot di abih dalam huyện, takik menuac hu bac da-a yau harei ini. Hu Đảng bo raidiuk mikva tani tanat jang dahlau. Bahrau ini, dalam danak dak padang ngak palei pala bahrau, dom sang urang Cam kan kathaot hu Karja brei taneh ngak sang, brei mesraiy phun jien ngak mbang, hu pato bruk ngak piah duah hu bruk ngak, pachreih ba mikva ngak kinh tế. Meng nan mikva yam tagok tabiak truh kan kathaot, kham merat ngak kaya meda”.

Ong Nguyễn Văn Trí, Phó Chủ tịch UBND xã Khánh Bình brei thau, Khánh Bình lac xã biên giới di huyện An Phú, labik hu 3 palei daok jaik Campuchia, 1 palei daok dalam bhum biak kan kandah. Xã hu jiak 200 sang bhap bini Cam gam saong labaih 1 ribau menuac oh hu taneh pala drak, labik daok sit sot, rilo meng ngak mbang pah, trah ikan, pablei salih sit tui bilan. Min meng sarak daong ba di Đảng saong Karja, gam saong bruk jak ba, pathau khan di karja palei, mikva rilo meng yam tagok tabiak truh kan kathaot khang kajap. Meng hatai thau daong gauk, dom sang Cam kaya meda tuk halei jeng halan hatian daong ka dom sang kan kandah oh hu phun jien, tacei pato ilamu piah ba gauk ngak mbang kaya meda.

Meng thau jak ba, patagok pren khang di bruk jum pataom bangsa dalam bhap bini piah patagok kinh tế, xã hội, raidiuk mikva Cam di Khánh Bình dak harei dak glaong. Taong abih dom sang Cam jeng mek hu angan Bao sang Ilamu, dalam nan hu 8 sang ilamu hadah krah di abih.

Gam haong bruk daong gauk ngak kinh tế, mikva Cam dalam tỉnh An Giang thau paglaong hatai sahneng khik caga môi trường, khik ramik, patagok ilamu bangsa, adat cambat tanarakun dalam bhap bini, hu mbaok tame khik caga siam mekre tani tanat puk palei…Bruk peih ngak adat palei hu bhap bini abih hatai pachreih tui. Xã Đa Phước, huyện An Phú lac akaok meti peih bruk “Jak gauk ngak siam di palei Cam”. Hu peih tabiak ngak meng kreh thun 2016, tal urak ini bruk nan daok ba mai rilo kein laba ka bhap bini Cam saong brei mboh talei rohim jum pataom gauk dalam puk palei. Tap nan, bruk “Bhap bini khik caga an ninh palei negar” dalam huyện hu glaong tagok. Gah công an hu pathau khan rilo asal kadha ka bruk an ninh trật tự, peih bruk bhap bini khik caga an ninh palei negar, ieu bhap bini brei thau, tacei tabiak kol tội phạm, tệ nạn xã hội dalam puk palei di drei… ngak jeng talei pambuak bruk khang kajap di gah công an, karja palei haong bhap bini Cam jeng yau di urang Cam haong bangsa karei daok dalam palei. Ong Phạm Tấn Thời, Phó Chủ tịch UBND xã Đa Phước brei thau, kuhria meng di tuk peih bruk padang ngak palei pala bahrau, mikva pachreih tui, abih hatai hu mbaok tame dom bruk yau pasiam sang taik tahak ka palei di drei, daong padang cảnh quan, gom hadah jalan palei, pasiam jalan mbak saong rilo bruk ngak pahla karei karei.

Dom palei Cam An Phú, tỉnh An Giang urak ini yau daok cuk tagok rup blah ao bahrau: jalan puk, jalan palei hacih sa-at, siam mekre, kinh tế patagok, raidiuk di bhap bini dak harei dak trei sir, ginup meda. Saong mikva Cam dak harei dak thau khik ramik, patagok ilamu siam mekre meng kan, kak kajap talei jum pataom oh lac dalam bruk padang ngak palei pala bahrau, bo dalam dom bruk ngak karei, rik daong dak padang puk paga, palei negar siam mekre, kaya meda./.  

Urang lang: M.Phương -17/11

HỆ PAPAR SAP BANGSA VOV4 BHUM BAN RAYA HCM

Labik daok: 75 Trần Nhân Tôn, Phường 9, Quận 5, TP.Hồ Chí Minh
Yam ndok : Trần Văn Thao
Phaok yam ndok: Cao Thị Thoa, Trần Xuân Thân