Lac urang bangsa Khmer, ndih tapui tabiak saong praong tagok di bhum palei Sóc Trăng daok rilo kan kandah, min sa-ai Sơn Thái Vĩnh, Bác sĩ Chuyên khoa I, Phó kaok Khoa Ngoại Sang iek ruak Quận 4, Ban raya HCM biak kham merat yam tapa dom kan kandah, oh padeih bac megru biak ka naih joi. Urak ini, dom caong khin di sa-ai hu jeng biak tuk sa-ai rik daong preih di drei tame piah iek glang prein yawa ka bhap bini.

Bs Sơn Thái Vĩnh abih hatai saong urang ruak

 

Thun 2011, hadei di tuk bac tamat Đại học Tây Nguyên - khoa Y Dược,  sa-ai Sơn Thái Vĩnh caong khin jeng bác sĩ iek gah ruak ngoại khoa. Hadei di nan,  sa-ai likau mai ngak bruk di Sang iek ruak Quận 4, Ban raya HCM. Hu bruk tacei pato abih hatai di urang bác sĩ ngak bruk dahlau saong kham merat bac megru, bhian  duah thau ka khaw tin y học, abih di nyu lac gah talang, khớp, sa-ai dak harei dak hu paglong ilamu ngak bruk. Jiak 10 thun ngak bruk, bác sĩ Vĩnh jeng ngak siam bruk di drei, tui jalan diukrai di urang gru jru, abih hatai ka bruk daong ka urang ruak.

Sa-ai Vĩnh khan lac: “ Yaok mbang gaok kan kandah dalam bruk ngak, dalam raidiuk, dahlak jeng hadar tal panuac pato di Wa Ho lac: “Gru jru yau amaik ame” piah pachreih drei kham merat  yam tapa, brei ka urang ruak jia tame”. Nan ye, ngan saong sa-ai bruk bac megru saong ngak tui jalan hadah krah siam mekre  di Wa Ho lac meng dom bruk biak sit yaok harei, nan lac tuk halei jeng caik hatai tui pang, klah rabha dom caong khin di urang ruak, tacei pato tani tanat, pachreih urang ruak jeng yau grauk gar di ruak, daong ka urang sahanang hatai ndih iek ruak.

Tui jalan ngak lac “Iek urang ruak yau gauk gar di drei”, ngan saong yaok urang ruak hu drei tui iek, tuk lahaiy, sa-ai Vĩnh tame rivang, tui iek laka pandik ka urang. Sa-ai Nguyễn Thị Huệ hu bác sĩ Vĩnh iek ruak  tuk jaoh 1/3 talang pha gah hanuk brei thau: “ Bác sĩ Vĩnh bhian mai rivang, tangi sua prein yawa yau habar, laka pandik yau halei ye, blaoh kakei mbang huak khik caga prein yawa saong menyum jru njauk tukvak. Oh ta-eng dahlak, bo rilo urang ruak karei mboh njauk hatai  ngan saong bruk iek ruak di dom urang y bac sĩ di sang iek ruak dalam nan hu bác sĩ Vĩnh”. Hu thau, ini lac urang ruak njauk blaic raih talang pha biak kan, bác sĩ Vĩnh saong dom y, bác sĩ sang iek ruak hu ba ilamu bac megru hu tapa bruk ngak tame blaic raih hu siam, urang ruak jia tame saong sahanang hatai iek ruak di sang iek ruak tuyến quận.  

Langiu tukvak ngak bruk di sang iek ruak, bác sĩ Vĩnh daok tui dom kapol urang iek ruak brei saoh ka urang kan kathaot di bhum atah bayah, atau nao tal sang piah rao laka ka dom urang ruak umo taha, urang bangsa takik hu raidiuk kan kandah. Hu dom harei oh lac harei drei hu mbaok, min tul hu urang ruak birau ba tame atau urang ruak trak, hadei di 20 minit, bác sĩ Vĩnh hu mbaok di sang iek ruak.

Meng thun 2019 mbaih tal inio, bác sĩ Vĩnh hu urang ngak praong di Sang iek ruak pok ngak Phó akaok khoa Ngoại. Meng bruk ngak birau, sa-ai tuk halei jeng ba akaok nao dahlau piah ka dom y bác sỹ ranaih umo pasram patia jalan diukrai, bhian kakei urang ndem meyai bingi pang saong urang ruak. Sa-ai daok lac urang gru jru tuk halei jeng abih hatai patoa veik dom ilamu dalam bruk ngak, ba mbuan lagiah ka dom y bác sĩ ranaih umo dalam khoa tui dom tal bac, paglong ilamu, duah dom jalan iek ruak hu siam di abih piah duh ka urang ruak. 

Meng dom kham merat oh padeih dalam bruk ngak, hu ayut sahabat saong urang ruak anit ranam, bác sĩ Vĩnh rilo mbang hu taduan harak meyaom di sang iek ruak, di Sở Y tế Ban raya HCM ka bruk rik prein daong tame bruk iek ruak. Yau nan min, ngan saong bác sĩ Sơn Thái Vĩnh, pandap alin hu manak plaong glong abih nan lac bruk sa-ai saong ayut sahabat hu daong ka urang ruak thit abih ruak./.

Urang lang: A.Nghiêm - 18/5/2020

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân