Anak bruk jit COVID-19 daok rah tabiak khang, srau kadau di dom tỉnh, ban, Mintri Pato Megru brei peih mbang pakacah tamat THPT thun 2020 jeng 2 mbang. Dom tỉnh, ban peih bruk pa-atah di gauk tui Sarak ka 16/ di Thủ tướng Rajaei brei kadun harei peih pakacah di tuk lagaih, tuk jit ruak hu pacang. Dom tỉnh ban daok veik peih pakacah tui bruk ba tabiak, nan lac meng harei 8 tal harei 10/8/2020. Dom jalan ngak piah khik hu salamat bruk pacang caga jit, thau cambaih dom saih pakacah daok hu dom tỉnh, ban sami samar peih ngak. Kadha vak di Đặng Chung angaok mbáo điện tử Lao động hu ndom tal bruk ini:

Dom tỉnh ban halei njauk hu urang njom brei atah di gauk 

Ba tabiak bruk glaong di abih pamaong tal siam mekre salamat ka mbang pakacah saong ka prein yava di saih pakacah, urak ini dom tỉnh ban daok samar pasang iek tui tacei pato di Mintri Pato Megru, oh caik ka anek saih F1, F2 dalam taneh ia (meyah hu) tame pakacah di mbang 1, bo brei pakacah haong harei pakacah di dom tỉnh ban daok hu bruk pa-atah di gauk.

Ong Hà Thanh Quốc, Yam ndok Sở Pato Megru Quảng Nam brei thau, taong abih anek saih pakacah di ban sit Hội An, ban sit Điện Bàn, huyện Đại Lộc, huyện Quế Sơn, huyện Duy Xuyên saong huyện Thăng Bình hu kadun harei pakacah tamat THPT 2020 di tukvak lagaih kayua lac daok hu bruk pa-atah di gauk. Dom anek saih di dom labik daok veik hu pakacah mbang 1 haong dom tỉnh ban karei meng harei 8 tal harei 10/8.

Di Đắk Lắk, lingiu di njom COVID-19, daok hu rilo menuac njauk ruak bạch hầu. Saong mbang pakacah thun ini rah tabiak njauk di tuk tabung glaong bilan hajan di Tây Nguyên. Sở Pato Megru Đắk Lắk hu ieu pataom menuac piah ka mbang pakacah meda peih tabiak hu di mbang 1, khik hu salamat saong hu jalan daong saih pakacah dalam bilan hajan ia sua. Daok dom saih pakacah hu sang daok di dom labik njauk pacang veik oh brei tame tabiak, Sở daok pasang iek, parabha kapul F1, F2 saong brei pakacah di mbang hadei.

Urak ini dom tỉnh ban jeng thau hu dom saih pakacah lac F1, F2. Tui ong Nguyễn Đắc Phu – Yam ndok Sở Pato Megru Quảng Ngãi, tapa yaok pataom, urak ini dalam Quảng Ngãi hu 2 saih pakacah lac F1. Quảng Ngãi brei dom saih ini pakacah di mbang 2, lac mbang pakacah haong dom saih di Đà Nẵng haong Quảng Nam.

Lac labik hu anek saih tame pakacah tamat THPT thun 2020 rilo abih dalam negar, Hà Nội haong TPHCM daok samar pasang iek, parabha saih pakacah. Dalam nan, Hà Nội brei padang labik pakacah di labik brei daok karei di Sang bac Cao đẳng chất lượng glaong ban ine ka dom anek saih njauk brei daok karei, piah khik salamat ka dom saih pakacah karei karei.

Piah daong palagaih ka dom anek saih di Đà Nẵng saong dom tỉnh ban daok hu bruk pa-atah di gauk nan ye oh tame pakacah hu dalam mbang 1, rilo sang bac đại học brei thau, meda hu dom rami ramik veik ka nyu lagaih. PGS.TS Nguyễn Ngọc Vũ - Giám đốc ĐH Đà Nẵng brei thau, lac sang bac ĐH bhum saong hu anek saih di Đà Nẵng, Quảng Nam tut angan pilih ruah biak praong, sang bac hu dom rami ramik veik piah khik kajap quyền lợi ka saih pakacah di dom palei njauk pakacah hadei.

Ong Lê Trường Tùng - Chủ tịch Hội đồng quản trị Sang bac ĐH FPT brei thau, sang bac meda caik tabiak 10% tanut pilih ruah ka dom anek saih Đà Nẵng, Quảng Nam njauk pakacah di mbang 2. Kayua yau nan ye, dom anek saih daok brei pa-atah jhui suh sah, jhui duh hatai, bo njauk sangka khik caga prein yava khang kajap piah cang tal harei pakacah hu siam mekre di abih.

Thứ trưởng Mintri Pato Megru Nguyễn Hữu Độ jeng ndom lac, anek saih tame pakacah hadei di harei 10/8 meyah hu hatai caong pandar bruk pakacah tamat THPT piah pilih ruah tame đại học, Mintri Pato Megru meda tacei pato dom labik pato đại học pasang iek pilih ruah tui tanut ba tabiak saong jalan pilih ruah ka nyu lagaih piah khik kajap quyền lợi ka saih pakacah, tui jalan tự chủ đại học./.

Urang lang: Mousaphuong -8/8 

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân