Bilan thu thun ni dui atah, ia di dom danao, binek dalam tỉnh Bà Rịa – Vũng Tàu daok takik, ngak ka rilo phun pala thu lagu kayua kurang ia pruh, ngak kan kandah oh sit tal bruk pala drak, tui nan meda hu rilo taneh phun pala mbuan lahik abih.

Bilan thu thun ni dui atah, ia di dom danao, binek dalam tỉnh Bà Rịa – Vũng Tàu daok takik

Rilo urang nong di xã Bông Trang, huyện Xuyên Mộc brei thau, kayua oh hu ia yau nan ye labaih 1 bilan ni mai dom  jamriek njuk ia daong ka bruk mek ia meng danao Sông Hỏa mai dom ribaong piah ba ia pruh ka phun pala njauk brei padeih. Bruk thu lagu daok ngak ka urang ngak nong duh hatai

Labaih 3 bilan ni mai, ong Nguyễn Đình Nhung daok di xã Hòa Hội, huyện Xuyên Mộc njauk caik ka 7 sào amariek kalu kurang ia pruh saong urak ni nyu thu lagu, jaik matai thu. Sang ong Nhung hu 3 bingun kuac dalam 15-16m min bilan thu thun ini jeng thu ia abih nan ye kan dong hu ka bein amariak kalu. Dom harei tal, mayah oh hu hajan ye bein amariak kalu sang ong oh mek hu hagait: “Thun ni langik pandiak bhang biak trak ka bruk ngak nong, abih di nyu nan lac pala am mariak kalu yau dalak. Năng suất meda trun takik, khol dalak urang kuac ribaong, urang kuac bingun bo ia oh hu, njauk pruh hasit ka am mariak kalu min”.

Daok di huyện Long Điền saong huyện Đất Đỏ, yaok ribau ha padai Hè thu saong phun mbang baoh daok cang ia meng dom ribaong thủy lợi.

Labaih sa bilan tapa, jaik 3 sào thanh long di ong Nguyễn Văn Thanh, xã Long Tân, huyện Đất đỏ tuk halei jeng kurang ia. Tui ong Thanh, bein thanh long daok tabiak bingu yau nan ye njauk pruh ia sa harei dua mbang, min ia dak harei dak thu lagu meda ngak ka ong njauk klaak bruk pruh ia.

Di Hợp tác xã (HTX) ngak nong An Nhứt, huyện Long Điền, kayua ia oh ganap nan ye bilan Hè thu thun ni HTX meda trun pajaih labaih 220 ha oh lac 420 ha padai yau yaok thun dahlau. Tal vaktu ni langik pandiak bhang dui atah ngak ka mikva xã viên jeng ka oh tam, drak, mayah bruk ni daok dui atah, bilan pala meda suai jang biak rilo. Urak ni jaik abih taneh di xã viên daok ngak taneh cang hajan trun meda pala drak. Ong Huỳnh Trung Thành, Chủ nhiệm HTX ngak nong An Nhứt, huyện Long Điền brei thau: “ Bilan Hè thu ni  trun pajaih meng 1/5 tal 1/6 min urak ni ia ka oh hu, mikva jeng daok maong tame danao ia Đá Bàng min urak ni danao ia daok trun jaik tanut thu ia abih. Urak ni danao ia Đá Bàng daok takik  ia, brei hu dua  klau mbang hajan trun meng ba ia pruh hu tuk hu ia meng binek Sông Ray meng pabak ia ptuh”.

Tui Sở ngak nong saong patagok palei pala tỉnh Bà Rịa – Vũng Tàu, bilan thu thun ni langik pandiak dui atah, ia hajan di labik hu dom danao ia jeng trun khang. Urak ni 15 danao ia, binek di tỉnh tal vaktu ni tok daok labaih 37 triệu m3 ia, trun jaik 82% dut haong prein padang ia di nyu. Dalam nan, danao Sông Hỏa, danao Suối Các, danao Châu Pha, danao Núi Nhang, danao Kim Long saong danao Sông Ray ia daok biak takik.

Gah ngak nong saong dom puk palei di Bà Rịa- Vũng Tàu hu kakei urang ngak nong pandar ia patak pataom, plaih palai pajua, hu jalan pruh ia lagaih, gam tui di nan oh pala karei bilan di dom bhum ceik glaong piah trun takik khat lahik kayua kurang ia. Ong Văn Thanh Hùng, akaok jabat ngak nong saong patagok palei pala huyện Xuyên Mộc brei thau huyện daok kuhria tal jalan ngak suai lavik: “Jalan ngak suai lavik, UB bhap bini huyện Xuyên Mộc jeng hu pok panuac likau saong hu UB bhap bini tỉnh brei ngak dom kraong, ribaong thủy lợi dalam huyện vaktu 2020-2022 pambuak haong danak dak palei pala bahrau, urak ni huyện jeng dak  peih ngak di dom puk palei piah bruk pandar ia hu siam lagai”.

Anak bruk langik pandiak bhang dui atah, karja dom palei hu kakei bhap bini tui iek catang dom khau tin, langik tasik, halau ia, abih di nyu nan lac kuhria tal hajan, ia nduac, halau ia khik caik di dom danao ia, kraong, ribaong. Urang nong jeng njauk caga ramik dom jamariak piah mek abih  ia ka pala drak saong piah pandar./.

(Urang lang: Thu Thảo – 20/05)

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân