Tui Mintri ngak nong saong patagok palei pala, urak ini bhum taneran kraong CL hu 564 labik glut jaleih atah abih tih labaih 834 km, dalam nan hu 512 labik glut jaleih takai kraong atah abih tih jaik 566 km, rilo meng lac rah tui kraong Tiền, kraong Hậu, kraong Vàm Cỏ Đông, Vàm Cỏ Tây saong dom ribaong sit di dom kraong praong, daok veik lac dom labik glut jaleih takai tasik atah abih tih 268 km.

Rilo jalan ar tasik di dom tỉnh dalam bhum taneran kraong CL jeng gaok kan kandah 

Rilo jalan ar tasik di dom tỉnh dalam bhum taneran kraong CL jeng gaok kan kandah kayua bruk glut jaleih takai tasik. Hu yaok pluh kilômét ar tasik harei melam daok mbuan glut jaleih, dom glai pacang caga tapen tasik njauk ia ba seik. Tui yaok pataom, kuhria rah tapa yaok thun, glut jaleih ngak lahik jaik 300 ha taneh, glai dauk ia mbak tapen tasik dom tinh bhum taneran kraong CL. Bruk glut jaleih oh lac rah tabiak dalam bilan hajan bo daok hu dalam bilan pandiak, meng dom kraong praong tal dom kraong sit, dom ribaong saong dak harei dak kan kandah jang.

Abih di nyu nan lac, dalam 3 thun jaik ini, bruk glut jaleih takai tasik nyu mbang dalam tame baoh taneh, ba seik rilo glai dauk ia mbak, ngak kan kandah tal bruk ngak mbang ngak huak di yaok pluh rabau sang, oh siam ka bruk ngak nong saong raong pala kaya ikan dalam ia. Njauk caik hatai lac, bruk ini mboh yau dak harei dak pambak praong.

Anak dom kan kandah di bruk ini, abih di nyu lac di bilan 9, bilan 10 yaok thun, dom tinh dalam bhum taneran kraong CL yau ye: An Giang, Cà Mau, Kiên Giang, Sóc Trăng, Bến Tre, Long An… njauk tabiak bruk samar drah ka glut jaleih takai tasik, takai kraong dalam tỉnh

Brei panuac di var ngak bruk haong dom urang pan akaok 13 tỉnh, ban  bhum taneran kraong CL di akaok thun ini piah ginum biai dom jalan ngak piah patrun patakik dom khat lahik kayua glut jaleih, Thủ tướng Rajaei Nguyễn Xuân Phúc pandar peih ngak chip dom jalan ngak piah langyah ka nyu salah blaoh dom khat lahik di bruk glut jaleih, ndom lac Đảng, Karja meda ngak abih drei piah daong saong nao gam haong bruk cakrok di bhum taneh hu yaom glaong ini. Tui nan, dalam 10 thun jaik ini, Trung ương hu brei labaih 16.000 tỷ đồng piah padang ngak dom bruk pacang glut jaleih. Kuhria ta-eng thun 2018, lingiu di bruk parabha kadung jien karja tui bruk ba tabiak di dom tỉnh, ban padang ngak ar pacang caga glut jaleih, Thủ tướng Rajaei hu daong 1.500 tỷ đồng meng kadung jien caga di  Trung ương piah ngak 29 dự án samar drah glut jaleih takai kraong, takai tasik di 13 tỉnh, ban dalam bhum.

Dalam tuk glut jaleih biak trak di bhum taneran kraong CL yau urak ini, jalan pacang caga njauk,  lac brei taong yaom dom makna, hu jalan ieu pataom dom prein khang xã hội piah pacang caga hu siam, bruk buh jien tame padang ngak, khik caga bhum tapen kraong, tapen tasik njauk pambuak pagam haong cakrok patagok jalan ngak mbang duah jien ka bhap bini. Lingiu di nan, dom puk palei, dom tỉnh ban brei jhul khang bruk pandar ilamu  - công nghệ jeng yau peih praong talei pambuak bruk dunya piah pacang caga, roh duah ba pandar dom jalan ngak pasiam kraong saong padang veik takai tasik ka nyu lagaih haong bhum taneran kraong CL./.

(Urang lang: Mousa Phương – 22/05)

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân