Meng hatai caong khin paglaong kein laba bruk ngak nong, urang nong Nguyễn Văn Năm (daok di ấp Phú Hưng, xã Phú Hựu, huyện Châu Thành, tỉnh Đồng Tháp) duah tabiak pajaih phun kandiuk hu baoh praong, trak 1 - 2 kg yaok baoh. Janih baoh kayau biak praong ini pahe bingi, takik asar nan ye tuk halei jeng kurang piah pablei saong hu yaom biak glaong. Kadha “urang ngak hamu caong thau” adit ini, daa mikva song taong abih guak mai rivang bein kandiuk di urang nong Nguyễn Văn Năm: ​

            

Gam ba khaol dahlak nao rivang iek bein kandiuk baoh biak praong pala hu labaih 5 thun, ong Năm gam brei thau dom thun dahlau, ong hu sa urang randap daok di tỉnh Bến Tre meyaih khan ka sa janih phun pala meda ba mai kein laba glaong, pajaih phun pala ini daok hu angan iew karei nan lac kandiuk nữ hoàng. Hadei di tuk duah thau, ong mboh ini lac pajaih phun kandiuk brei baoh prong, kanduh hu sambo màu kanjik katam, pahe bingi nan ye ong Năm ba abih phun jien patak pataom hu piah blei pajaih mai pala iek dalam bein sang drei.

Bruk njauk biai di phun pala ini nan lac tuk tasak  baoh biak pahe, kanduh langiu hu sambo màu kanjik katam, kalik catang; abih di nyu lac tal kanduh biak lapih, takik asal. Ralaow di janih kandiuk ini tapal, jamen, la-ar, pahe, bingi.

Thaik binguk phun pala sang ong Năm jeng dreh yau dom janih phun kandiuk karei, yau nan min baoh nyu trak jang 5 mbang, meng 1 – 2 kg sa baoh. Taong abih baoh hu mbao veik biak tani tanat, phun halei phun nan mbao baoh mbong abih, jeng brei mboh hatai kham merat di po bein. Pok mek yaok bịch bao baoh tabiak, ong Năm palih ruah dom baoh prong abih daok hu mboh angaok phun ka khaol dahlak mong iek. Biak di nyu, yaom lac hu nao tal rilo bein phun kandiuk min khaol dahlak oh ka mboh baoh kandiuk halei prong yau nan.

Ong Năm brei thau: "Urak ini dalam xã tok hu bein sang dahlak lac hu phun kandiuk ini". Pal angaok tangin sa baoh biak trak, daok jaik sa bilan tra meng ginup tasak piah paik pablei, ong Năm ndom lac: "baoh ini tal bilan ye baoh nyu prong labaih 1 kg, gaok mai tal 1,5 kg. Urak ini, kuhria rah tapa yaok phun brei tal 120 baoh, biak takik asal (tok samu 1/5 asar baoh kandiuk bhian mboh karei). Taphia di nan, baoh kandiuk ini nyu biak pahe, baoh prong gheih, mbang tame jamen nan ye yaom pablei biak glaong, hu rilo urang takre blei".

Nan ye baoh kandiuk biak praong di ong Năm hu yaom pablei tani tanat meng 70.000 - 80.000 đồng/kg. Daok dalam tukvak Tết, janih baoh ini hu yaom biak glaong meng 100.000 - 120.000 đồng/kg min jeng oh ginup piah pablei tabiak darak pasar. Ngan haong mblang taneh labaih 2 công, yaok vụ ong Năm paik hu jaik 2.000 baoh, duah hu labaih 100 triệu đồng meng pajaih kandiuk  baoh prong ini.

Langiu di bruk paik baoh pablei, ong Năm daok pabam phun anek piah pablei tabiak ka mikva urang nong daok dalam saong langiu tỉnh. Kayua nan ye, yaok thun, sang ong Năm pablei tabiak darak pasar labaih 100.000 phun anek kandiuk  dai brei baoh prong. Mai meng nan, tok kuhria ta-eng jien mek tame meng bruk pablei phun pajaih, yaok thun ong mek tame labaih 100 triệu đồng.

Tui ong Nguyễn Thành Minh, akaok UB bhap bani xã Phú Hựu, huyện Châu Thành, bruk pala kandiuk  baoh prong di sang ong Năm nan lac điển hình di puk palei dalam bruk salih janih phun pala angaok sa mblang taneh pala drak. Meng nan, peih tabiak jalan ka urang nong taom gaok hu pajaih phun bahrau ba mai rilo kein laba. Tukvak anak tal, puk palei meda hu dom bruk pasang iek duah thau, pataom yaok dom mblang taneh pala phun tạp piah daong urang nong salih tapa phun pala karei, daong paglaong jien mek tame./.

 

 

 

 

HỆ PAPAR SAP BANGSA VOV4 BHUM BAN RAYA HCM

Labik daok: 75 Trần Nhân Tôn, Phường 9, Quận 5, TP.Hồ Chí Minh
Yam ndok : Trần Văn Thao
Phaok yam ndok: Cao Thị Thoa, Trần Xuân Thân