Công an tỉnh Đắk Lắk bahrau duah mboh bruk pajeng ba labaih 67.400 blah patiah pacang mbaok  y tế oh thau asar di nyu

Patui danak dak mbang nyaom 47, mesup ini 11/8, UBTVQH pasang iek, brei panuac tame Sarak daong ka urang buh prein ka CM (pasiam veik). Dom urang dalam UBTVQH hu panuac caong khik tamo 12 gah hu mbang tui sarak daong urang buh prein ka CM yau sarak urak ini. Saong roh duah cambaih ka bruk hu pok brei angan liệt sĩ dalam saman sron mbon. Akaok Quốc hội jeng hu panuac caong khik tamo yaom jien daong piah ka dom urang amaik VNAH meda diukrai hu siam mekre, oh neh rabha bruk hu hadom anek lac liệt sỹ. Hu panuac caong patagok yaom jien daong bruk thờ cúng liệt sỹ. Jeng dalam harei ini, UBTVQH brei panuac ka Hukum pasiam, pabak dom paka di Hukum pacang caga njom vi rút ba tal patrun miễn dịch di urang (HIV/AIDS)  

Bier harei ni, di  Hà Nội, mintri Công Thương  peih nyaom biai pataom iek veik  danak dak patagok pablei salih bhum ceik, bhum atah bayah song bhum palao kaoh  (ieu katut lac danak dak  964) tuk vak  2015-2020. Dalam  5 thun tapa,  Danak dak mek hu siam lagaih dalam bruk dui ka nyu jaik gauk veik bruk atah di gauk di dom bhum ceik, rik dong jhul patagok  kinh tế - xã hội, tagok jien mek tame di bhap bini, khik  caga  an ninh quốc phòng song prong di abih lac brei mboh bruk sangka di Đảng song karja di dom labik kan kandah ni. Meng dom bruk ngak hu jang yau kan kandah batabiak, dalam tuk vak patui di nan karja hu dom sarak dalam bruk patagok pablei salih di bhum ni piah mek hu dom jak jeng prong jang.

Amuk Trần Lê Thanh Trúc, Yam ndok pasak kuhria mboh dahlau bruk caong hu menuac ngak saong brei thau ka darak pasar urang ngak ban raya Hồ Chí Minh (Falmi) mboh lac, darak pasar urang ngak di ban raya meng akaok thun tal ini hu rilo srau kadau kayua jit ruak. Abih di nyu lac, bruk caong hu urang ngak trun khang meng kreh bilan 2/2020 tal ini, trun labaih 28% duk haong vaktu ini thun 2019. Pasang iek di Falmi meng doanh nghiệp brei mboh, dom kan kandah dui atah mbiah tal urak ini lac bruk duah menuac blei, labik blei pandap kayua padeih ngak dom đơn hàng pablei tabiak negar lingiu, rahra dalam taneh ia cakak trun bruk pandar cai. Meng ini tal puac thun 2020, ban raya caong hu 105.000 labik ngak bruk, dalam nan rilo meng lac dom bruk: pablei salih, dịch vụ - duh tuai damuai, menyim jhik – ngak takhaok, ngak pandap mbang menyum, marketing… Dalam nan caong hu tal 84% urang hu tapa pato pakai blaoh

Harei 11/8, Jabat Cảnh sát giao thông, Công an tỉnh Đắk Lắk, brei thau bahrau duah mboh bruk pajeng ba labaih 67.400 blah patiah pacang mbaok  y tế oh thau asar di nyu . Dom blah patiah pacang mbaok ni hu duah mboh angaok radeih  tải peih meng  tỉnh Đắk Lắk nao tỉnh Đắk Nông. Di tuk pasang iek, Urang peih radeih  tải angan Võ Duy An (ndik tapui thun  1988, daok di  xã Cư Huê, huyện Ea Kar, tỉnh Đắk Lắk) oh hu harak gar hagait brei thau asar di dom patiah pacang mbaok nan. Jabat Cảnh sát giao thông - Công an tỉnh Đắk Lắk daok patagok bruk pasang iek piah duah dom urang mai song nao meng bhum jit, samar pambuak bruk song gah  chức năng ba nao dok paatah. Tapa pasang iek duah thau daok hu samar mboh dom urang pagam pambak tuk jit ruak piah pajeng ba pablei salih dom pandap  y tế oh thau asar di nyu, duah laba, meng nan langyah khang tui hukum. 

Mesup ini, CA tỉnh Bình Dương brei thau lac daok pasang iek, duah thau, ngak brei cambaih laih bruk pambuak tal kol klaik mek cuah tuk melam di kraong Đồng Nai, ngak brei Đại úy Lê Thanh Hải, Phó Trưởng Công an xã Thạnh Hội, ban sit Tân Uyên, tỉnh Bình Dương, metai. Hu thau, maong 10 melam 10/8, Đại úy Lê Thanh Hải, Phó Trưởng Công an xã Thạnh Hội haong Công an ban sit Tân Uyên, tỉnh Bình Dương, nao khik iek labik tapen kraong, langyah ghe klaik mek cuah angaok kraong Đồng Nai labik di nao tapa ban sit Tân Uyên. Tuk gah Công an pasang iek ye mboh 1 baoh ghe daok patuh jamriak mek cuah angaok kraong Đồng Nai  nan ye pagui cap. Mboh Công an, kol klaik mek cuah nyu ngak brei ghe kram. Kayua tamejaik piah cap mek kol klaik cuah,  Đại úy Hải oh dil chat tabiak lingiu tuk ghe hu ngak brei kram, daok dom urang karei dalam kapul pasang iek patuah chat trun hu blaoh caluai tame gah nan ye oh njauk hagait. Tal  maong 4 dah page ini, meng duah mboh tau di Đại úy Lê Thanh Hải. Urak ini, gah chức năng daok duah thau, cap mek kol klaik mek cuah, mesuh veik haong urag jakar daok ngak bruk.

Labaih 50 kapul công nghệ Mỹ, dalam nan hu Amazon, Apple, Facebook… hu ba gauk mbaoh tangin tame harak  kiến nghị payua ka tòa án, ndom lac sarak di Tổng thống Mỹ Donald Trump padeih brei thị thực ka dom urang ngak hu ilamu glong ngak khat lihik ka rajaei  negar Mỹ. Kiến nghị hu payua tagok  tòa án liên bang piah pachreih tui harak pathau di jabat pablei salih  Mỹ song rilo gah pablei salih cagar veik  sarak di  Tổng thống Trump di bilan 6 meng bloh ka bruk padeih brei thị thực ka urang ngak negar langiu , dalam nan hu dom urang ngak hu ilamu glong bo dom gah  công nghệ dok duah.

Mintri Y tế Philippines khan lac hu 6.958 urang njom bahrau dalam harei 10/8, tui nan abih tih urang njom di pak ini tagok tal 136.638 urang. Ini lac bruk njom mbak bahrau dalam harei rilo di abih di taneh ia Đông Nam Á ini. Dom menuac metai hu gac 24 urang, tagok jeng 2.293 urang. Ban ine Manila lac bhum gaok kan kandah trak di abih ngan saong 4.163 urang njom bahrau dalam harei kabroi.

Tui pathau khan di Viện Hàn lâm Nhi khoa song  Hiệp hội dom sang iek ruak Mỹ, kuhria tal urak ni , hu labaih  338.000 uranaih  Mỹ njom  Covid-19, dalam nan hu tal labaih  97.000 uranaih Mỹ tapa dut iek mboh dương tính song vi-rút SARS CoV-2 tok dalam 2 adit puac di bilan 7. Harak pathau khan ndom lac, dom urang njom Covid-19 trak di uranaih  Mỹ urak ni biak takik, min, brei hu rilo tuk vak jang piah tui iek./.

Urang lang: M. Phương - Hani Pha - 11/08 15:56:51

 

 

 

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân