Tuai nao radaih buýt di TP. HCM trun 38% duk haong tukvak ini thun 2019 kayua  Covid-19

Mesup ini, di Sang Quốc hội rah tabiak bruk brei thau blah thông tin điện tử, pandar angaok phone pan tangin saong bộ nhận diện di thun dang akaok kapul liên nghị viện ASEAN (AIPA) 2020. Brei panuac pak nan, akaok Quốc hội Nguyễn Thị Kim Ngân ndom lac, blah thông tin điện tử, pandar angaok phone pan tangin piah brei thau dom kadha AIPA, brei mboh labik di Quốc hội Việt Nam dalam bruk dang akaok AIPA 2020 tal bhap bini dalam taneh ia, urang Việt Nam daok di negar lingiu saong ayut sahabat dunya, tapa nan yaih khan thaot binguk palei negar, anek menuac Việt Nam. Anak bruk jit praong COVID-19 daok rah tabiak srau kadau dalam bhum saong angaok duya, patagok dom bruk ngak hu meng dom  nyaom biai online di ASEAN haong AIPA tukvak tapa, Quốc hội Việt Nam meda peih Nyaom roya AIPA mbang ka 41 tui jalan online meng harei 08-10/9 di pasak Hội nghị quốc tế.

Melam 12/8, di  Hà Nội, Tổng Liên đoàn Lao động Việt Nam pambuak bruk song mintri  Công an peih danak dak doh tako “Brei ka raidiuk sron mbon,” piah pok meyaom dom kapul nyaom, urang ngak, viên chức, urang ngak hadah krah dalam bruk tong abih bhap bini khik caga siam mekre palei negar. Meng  105 kadha batabiak, Tổng Liên đoàn Lao động Việt Nam hu palih ruah  47 kapul nyaom, 47 menuac urang piah likau akaok mintri  Công an brei harak pok meyaom. Dom thun tapa, dom pakat  công đoàn song gah công an dalam negar  kham merat peih ngak dom bruk pambuak gauk dalam bruk tong abih bhap bini  khik caga siam mekre palei negar ba mai siam mekre salamad pak di labik dok, labik ngak bruk ka urang ngak, viên chức, dong khik caga  an ninh chính trị, trật tự an toàn xã hội.

Dalam 3 harei lac meng harei 12 tal harei 14/8, di huyện Tiểu Cần, mBan bangsa tỉnh Trà Vinh peih nyaom biai pathau khan sarak, adat hukum ka patrun patakik bruk likei kumei taok gauk tuk oh ka tal umo thun tui hukum saong bruk tok gauk dalam but pajaih dalam bhum bhap bini bangsa takik thun 2020. Hu labaih 300 urang lac urang jakar pakat ủy, karja, mặt trận, kapul nyhaom, urang hu angan je saong lambaok sang bhap bini bangsa takik dalam huyện mai pataom mbaok. Nyaom biai piah paglaong akaok sahneng saong patagok trách nhiệm di meuac sia saong rahra bhum bangsa takik dalam bruk ngak tui adat hukum ka lakhah caga saong baoh sang; ngak jeng bruk pachreih tui di menuac sia piah pacang caga bruk likei kumei taok gauk tuk oh ka tal umo thun tui hukum saong bruk tok gauk dalam but pajaih, rik daong paglaong chất lượng menuac sia saong menuac ngak hu ilamu glaong bhum bangsa takik.

Mban tacei jalan pacang caga bala meng langik tasik – dong duah urang gaok bala tỉnh Hậu Giang brei thau, meng akaok thun tal ni, bala meng langik tasik ngak khat lihik ka tỉnh jiak 7 tỷ  đồng, tagok labaih 2 tỷ 100 triệu đồng dut song tuk vak ni thun dahlau. Taeng mbang ribuk ka 2 bahrau ni dok kan kandah song ngak khat lihik ka labaih 700ha padai Hè Thu dalam tuk yuak njauk jaoh jaleih song ngak dauh labaih 1.600ha padai Thu đông bahrau trun pajaih,  rilo mblang taneh tabau, phun mbang boh, jang yau ngak dauh taneh njam patam.

Hadei di labaih 3 bilan hu peih veik hadei di tuvak padeih kayua "daok paatah di gauk", tuai nao radaih buýt di TP. HCM hu labaih 29 triệu mbang, trun 38% duk haong tukvak ini thun 2019 kayua  Covid-19. Urak ini, TP. HCM hu 128 jalan radaih buýt, dalam nan hu 91 jalan hu daong yaom, 37 jalan oh hu daong yaom. Yaok thun, ban raya buh tabiak labaih 1.000 tỷ đồng daong yaom radaih buýt min menuac nao radaih buýt jeng trun daok takik. Harei  4/8 meng bloh, Pasak khik iek bruk nao mai TP HCM brei padeih radaih buýt oh daong yaom pambuak haong Đồng Nai kayua mboh jit yau daok tamuh veik

Harei  13-8, Thủ tướng New Zealand, muk Jacinda Ardern brei thau sruh jit COVID-19 bahrau di negar ni meda prong jang dahlau di tuk hu pacang veik dalam tuk negar  Thái Bình Dương nui hu 13 urang njom bahrau kayua njom mbak dalam bhap bini. Tong abih 13 urang njom bahrau ni jeng pagam tal 4 urang di boh sang di ban Auckland. Dalam tuk nan, 4 urang ni oh tabiak negar langiu jiak di ni. Bruk ni ngak srau kadau  ka New Zealand kayua negar ni oh hu urang halei njom dalam bhap bini dalam  102 harei. Dom urang jakar song urang ilamu New Zealand dok tui iek bruk ba tal dom urang njom mbak ni.

Hadei di kaya ikan ngak la-an blei meng negar lingiu, ban Thâm Quyến, tỉnh Quảng Đông, Trung Quốc tapa dut iek daok hu mboh SARS-CoV-2 angaok mbaok seok menuk ngak la-an blei meng negar lingiu. Yau nan, tal tukvak ini, hu takik di abih 9 tỉnh ban di Trung Quốc mboh hu vi rút ba tal jit praong Covid-19 angaok dom janih pandap blei meng negar lingiu. Urang ilamu Trung Quốc mboh lac, bruk ini pambuak tal jit Covid-19 daok tamuh khang di rilo taneh ia di dunya, dalam tuk bruk ngak pandap la-an biak mbuan njom nerak, kayau labik dak la-an, virus dak diuk hu lavik.

Labaih sa meteh dom cơ sở y tế di ban ine  Beirut di Liban "oh meda ngak bruk" hadei di mbang patuh khang di adit dahlau ngak ka labaih 171 urang metai, 6.000 urang njauk rambuac song 300.000 urang lahik sang danaok. Dalam nan hu  hu 3 sang iek ruak prong. Langiu di nan,  3 sang iek ruak dok ngak bruk takik veik yaok harei, tuk brei trun  500-600 gaghe ruak. Dom sang iek ruak di Beirut, lac labik taduan biak rilo urang ruak dok jiak tapen, dok gleih glar piah ngak bruk dalam tuk dok patrun pren khang jien ndua meng puac thun blaoh. 

Urang lang: M. Phương – Hani Pha – 13/08 15:45:58

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân