Rahra Viet Nam meng negar langiu mai palei negar mbang tet njauk brei daok karei njauk 14 harei

Thủ tướng Nguyễn Xuân Phúc bahrau hu sarak brei ka dom xã, palei dalam bhum bangsa takik (DTTS) saong bhum ceik daok hu mbang tui dom sarak an sinh xã hội hu tabiak blaoh. Thủ tướng jao ka UBND dom tỉnh, ban dit TW samar pasang iek, brei thau angan dom palei biak kan kandah, xã bhum III, bhum II, bhum I dalam bhum bhap bini DTTS saong bhum ceik tukvak 2021-2025 tui asal ba tabiak dalam Sarak 33 di Thủ tướng ka tanut parabha bhum bhap bini DTTS saong bhum ceik tui jalan patagok vaktu 2021-2025, pasiam harak gar payua tagok UB Bangsa dahlau di harei 20-1-2021.

Bahrau kuhria meng akaok bilan 1-2021 tal urak ni hu 1.130 rahra Việt Nam mai palei tapa pambah mbang negar dunya Hà Tiên. Urak ni dom labik brei daok karei pataom gauk di labik tapen negar daok hu brei daok karei 1.033 urang. Ong Lê Quốc Anh, bí thư Thành ủy, akaok UBND ban Hà Tiên, brei thau Hà Tiên hu 6 labik daok karei pataom gauk hu prein taduan 1.570 urang saong daok hu peih praong veik labik brei daok karei di sang ilamo di Mỹ Đức hu prein taduan veik 500 urang. Tui kuhria dalam dom harei jaik Tết sak kubao 2021, rahra Việt Nam meng Campuchia mai veik palei negar biak rilo, dom labik daok karei di labik tapen negar jaik haong Campuchia di tỉnh Kiên Giang daok hu peih praong abih prein piah rok rahra daok di negar langiu mai palei mbang Tết thun sak kubao 2021.

Mesup ini (20/1), labaih 1.500 rahra di Bình Dương hu mbaok tame Danak dak “Tết daong ka urang kathaot- Xuân sak kubao saong Harei roya Xuân hồng 2021” kayua Hội Chữ thập đỏ tỉnh haong UBMT negar Việt Nam tỉnh Bình Dương pambuak gauk peih tabiak. Di danak dak, dom urang ngak pahla, dom doanh nghiệp hu alin hadiah labaih 24 tỷ đồng piah ngak dom bruk pahla, daong ka urang kathaot dalam thun 2021. Dahlau di nan, Hội Chữ thập đỏ tỉnh haong UBMT negar Việt Nam tỉnh Bình Dương hu jak ba, alin hadiah labaih 3.000 pok pandap Tết, yaom labaih 5 tỷ đồng brei ka dom urang kan kandah, urang sup meta dalam tỉnh.

Harei ni, sang iek ruak Nguyễn Tri Phương-TPHCM hu peih pakak saong ba tame pandar pasak halang darah tui tanut chuẩn Nhật Bản. Ni lac labik halang darak pandar ia hu ngak pasiam meng jamriak pasiam ia  tui chất lượng glaong di abih, mek hu tanut chuẩn di Nhật Bản camriep abih di TPHCM, tal halang hu pandar veik 2 - 3 mbang. Bruk ni jeng hu daong ka chất lượng nduac thận nhân tạo khik hu tani tanat di tanut biak glaong saong yaom mbuan piah pablei jang. Meng bruk tabiak rai di pasak halang darah tui tanut chuẩn Nhật Bản, sang iek ruak Nguyễn Tri Phương hu pabak 16 mac halang darah blei meng Nhật Bản, duh hu ka labaih 100 urang ruak nudac thận/ sa adit.

UB MTTQ Việt Nam huyện Đức Linh, tỉnh Bình Thuận bahrau pataom iek veik mbang jak ba pacang caga jit Covid-19 saong daong ka dom tỉnh bhum kreh negar thun 2020. Tapa 2 mbang jak ba, rik pataom dalam urang jakar, urang đảng, tapon nyaom bol pan phao kraong haong bhap bini, hu jaik 2 tỷ 400 triệu đồng, dalam nan daong pacang caga jit Covid-19 labaih 813 triệuđồng, daong bhap bini bhum kreh negar jaik 1 tỷ 600 triệu đồng. MT huyện hu ba brei 4.000 pataih pacang mbaok, 120 klaok ia jru pametai anrek ruak ka urang ngak di 4 doanh nghiệp saong dom bilai pacang jit dalam huyện, padang kapul nao ravang, alin 1 tỷ đồng haong labaih 8 tấn pandap ka 4 huyện, 1 xã di dom tỉnh Quảng Bình, Quảng Ngãi, Quảng Nam njauk khat lahik kayua hajan ia sua.

Jabat pasang iek prein yava urang pandar di Nga  brei thau vắc xin COVID-19 ka 2 hu Nga ngak tabiak lac EpiVacCorona hu “siam lagaih 100%” dalam dom mbang ngak iek tukvak camriep. Panuac nan hu ba tabiak iek tui mbang ngak iek tukvak 1 saong 2, hu brei thau dahlau di tuk ngal iek tukvak 3 ngan haong yaok ribau urang hu mbaok tame. Nga ndem lac drei meda klauk ka 60% rahra dalam thun ni. Yaom lac vắc xin Sputnik V daok hu di Moscow min bruk peih klauk di dalam negar daok rahtabiak dalam suai damuai.

Ban ine Washington daok hu khik caga catang saong yaok rabau urang lin khik caga taneh ia daok nao mai pasang iek angaok dom jalan di ban ine negar Mỹ piah khik siam mekre salamat tuk rah tabiak bruk tagok rai di ong Biden, abih di nyu lac hadei di bruk sreau kadau rah tabiak di Quốc hội Mỹ ngak brei 5 urang metai di harei 6-1. Tui Hãng tin Reuters, hu jaik 25.000 lin khik caga taneh ia hu mbaok di ban ine saong vil val labik rah tabiak bruk tyagok rai di ong Biden. Lin Mỹ daok pambuak bruk haong Cục Điều tra liên bang (FBI) piah duah thau lac kol daok khin ngak srau kadau meda lac menuac di bol lin halei oh.

Rajaei bahrau di Tổng thống Mỹ bahrau hu pilih ruah lac ong Joe Biden daok khin taong yaom gilac veik sarak saong jalan pambuak haong Triều Tiên. Panuac ni hu ong Antony Binken – lac urang hu Joe Biden pilih ruah ngak Ngoại trưởng bahrau di Mỹ - brei thau di harei kabroi (19-01) dalam mbang ginum biai di Ủy ban Đối ngoại Thượng viện Mỹ. Tui ong Antony Binken, njauk taong yaom veik sarak haong Triều Tiên kayua ni lac sa bruk ngak kan kandah ka rilo rajaei Mỹ saong bruk ni ka oh hu siam tagok./.

Urang lang: M. Phương – T. Thảo – 20/01

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân