Thủ tướng Nguyễn Xuân Phúc ieu kakei ka oh peih pambang rok tuai rivang main dunya

Patui danak dak mbang nyaom ka 10, mesup ni, dom urang Quốc hội ginum biai tapak ka dom asar kadha dok hu panuac karei di gauk di dự thảo hukum pasiam veik, pabak dom pakak di hukum langyah bruk ngak suan hành chính. Tui nan, Dự thảo hu pabak “bruk padeih pabak dom dịch vụ điện, ia di labik ngak suan ngan song menuac kapul nyaom ngak mbang pablei salih, dịch vụ ngak suan”. Dom urang ndom lac, sarak ni hu peih ngak di labik halei ngak suan song ngan song menuac urang, kapul nyaom njauk langyah meng bruk mek veik quyền pandar harak adat hu tuk vak atau brei padeih bruk hu tuk vak; jang yau batabiak pandar jalan ngak ni oh gaok hagait tal menuac urang, kapul nyaom karei oh pagam tal.

Jabat rajaei hu brei thau panuac di Thủ tướng Nguyễn Xuân Phúc ieu kakei ka oh peih pambang rok tuai rivang main dunya. Thủ tướng jao ka dom mintri: Ngoại giao, Y tế, jalan mbak pambuak gauk hu jalan ngak cambaih laih, njauk gauk, mbuan lagaih dalam bruk peih viek dom jalan par pablei salih dunya, pathau khan rajaei pasang iek, brei ngak.

Harei ni yam tapa harei ka 5 urang di bhum njauk ia sua di Lệ Thủy song Quảng Ninh (Quảng Bình) tram drei dalam ia. Yaom lac palei dok pataom menuac urang jamriak pandap panda gam hu mbaok di rilo gah dong duah min oh ka pabak hu abih kayua urang dok khin dong biak rilo, song biak kurang pandap khik caga siam mekre .Tỉnh ủy Quảng Bình hu panuac caong mintri Quốc phòng brei padang jalan par, padang bruk parabha pandap mbang menyum tal bhap bini bhum ia sua . Saong ieu Quân khu 4, Mintri ngak nong song patagok palei pala dong brei radeih, pandap mbang menyum , jru tavao, dong ka yaok ribau bhap bini dok gar dalam bhum ia sua. Daok di Hà Tĩnh, kuhria tal harei 21/10, dok labaih 20.000 boh sang njauk dauk dalam ia. Tỉnh hu dong ka bhap bini 2.000 thùng mỳ tôm song 4.000 két ia menyum.

Mban pato tacei pacang caga bala langik tasik, daong duah urang njauk bala saong khik caga ka bhap bini tỉnh Kiên Giang brei thau, kayua njauk kan kandah di ribuk ka 6, ka 7 yau nan ye rilo labik dalam tỉnh hu hajan khang, gam saong hangin, riyak praong saong triều cường tagok glaong, ba tal khat lahik trak. Labaih 8.300 baoh sang njauk ia dauk saong par tapung sang; hu 115 labik sang bac njauk ia dauk; labaih 92 km jalan mbak njauk khat. Langiu di nan, labaih 7.600 ha padai, njam patam, baoh kayau, labaih 2.800 ha raong kaya ikan, hadang njauk ia dauk saong 2.420 m ar tasik njauk glut jaleih. Daok di Bạc Liêu, hajan dui atah ngak ka 20.000 ha padai thu đông ia dauk mbruk gha, ngak jaleih abih.

Cục Cảnh sát hình sự - C02, Mintri Công an brei thau lac dok padang ngak iek balik duah thau siam mekre piah mek panuac khan di uranaih umo ala 18 thun di 18 tỉnh, ban dalam negar. Tui C02, 4 thun tapa hu labaih 80% bruk rapeik rapai rup thaik, tong paoh uranaih lac xâm hại tình dục. Kayua yau nan ye bruk hu balik duah thau siam mekre ini hu dong ka điều tra viên dong brei urang gaok bala tani tanat hatai sahneng, ndom nyai nao mai salah salai . Balik pasang iek anit ranam khik panuac khan biak kanduak tui jalan khik caga siam di abih ka urang gaok bala, ka urang umo ala 18 thun.

Tapa dom mbang pasang iek mboh lac labaih 40 triệu cử tri di Mỹ hu nao buh phiếu aval, brei mboh lac bruk buh phiếu thun 2020 meda glaong jang duk saong 4 thun dahlau. Buh phiếu dahlau harei pilih ruah hu peih tabiak praong kayua Covid-19 saong ni jeng lac pilih ruah bo 60% dom cử tri hu mbaok tangin tame caong maong. Hu dom bang mbang camriep hu brei ka bhap bini buh phiếu tapa bưu điện. Dalam tuk nan, dom cử tri nao buh phiếu tapak dahlau harei pilih ruah jeng tagok jang biak rilo saong dom bang hu gam Texas brei dui atah tuk vak buh phiếu aval viek 1 adit.

Dalam 5 thun tal, robot meda blah mek 85 triệu bruk ngak di dom doanh nghiệp prong song mbiah, makna prong lac kayua kan kandah di jit Covid-19. Ni lac bruk pasang iek song roh duah kayua Diễn đàn Kinh tế dunya (WEF) peih ngak ka jiak 300 công ty di dunya. Tui nan, 80% urang pal akaok doanh nghiệp dok jhul samar dom kadha số hóa bruk ngak song peih ngak dom công nghệ bahrau. Tui kuhria dahlau mboh lac, tal thun 2025, gah kinh tế iek glang, dalam nan hu dom bruk pgam tal hatai khin iek glang rup pabhap, akaok sahneng hatai ranam ka menuac sia, dom bruk trí tuệ nhân tạo song hadah krah meda ba tal labaih 97 triệu bruk ngak bahrau. 

Liên minh châu Âu (EU) daok peih ngak dom bruk tui hukum ngan haong dom danak dak di pulao Cyprus saong Malta pabak “hộ chiếu ameh” ka urang buh jien tame ngak mbang hadei dom panuac chỉ trích jalan ni daok njauk tội phạm pandar ngak. Dom adat tố tụng hu peih tabiak meng harei 20/10. Langiu di Cyprus saong Malta, 2 negar dalam EU karei lac Bulgaria saong Bồ Đào Nha jeng pabak hộ chiếu saong 12 quyền daok pablei salh tapa danak dak “hộ chiếu ameh”./.

Urang lang: Thu Thảo – Hani Pha – 22/10 16:09:25

 

 

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân