Mbang nyom ka 47 di UBTVQH hu rah tabiak di sang praong Quốc hội

Meng maong 6 biar harei kabroi (9/8) tal maong 6 mesup ini (10/8) dalam negar drei oh ka hu urang halei njom bahrau Covid-19. Ini lac mang camereip oh hu urang njom bahrau hadei di labaih 2 adit tamuh sruh jit di Đà Nẵng. Min ini lac bruk oh ka thau yau habar, kayua urak ini, tapa dut iek, yaok harei jeng mboh hu labaih 20 urang dương tính. Tal maong 6h mesup ini (10/8): Việt Nam, hu abih tih 841 urang njom COVID-19, dalam nan hu 317 urang njom meng negar lingiu hu brei daok pa-ath chip. Dom urang njom bharau pambuak tal Đà Nẵng kuhria meng harei 25/7 tal urak ini, lac 384 urang. Dom urang metai lac 11 saong hu 395 urang hu taong thit ruak.

Tuk vak tapa ban raya HCM hu jhul pakhang bruk duah thau, pasang iek dom bruk ngak tabiak, pajeng ba  khẩu trang, gum tangin  oh hu hóa đơn chứng từ. Tui nan, dom jabat  chức năng duah mboh  12 mbang, khik hu  122 thung khẩu trang song  2 triệu gum tangin  pandar  bloh, ngak veik piah pablei tabiak drak pasa . Ong Ngô Minh Châu-Phó Chủ tịch UBND ban raya HCM – brei thau, ban raya  hu tacei ka jabat  pasang iek pathau khan  dom bruk ni. Bruk pasang iek urang tame suan hukum  tui ong Ngô Minh Châu, urak ni ban raya .HCM chap hu  123 urang.  Dom urang ni hu brei dok tah song dut drah mboh âm tính. Taphia di nan ban raya HCM jeng chap hu  2 jalan ba urang tame  suan hukum song dok tui iek harak gar  piah  khởi tố pasang iek.

Harei ini (10/08), mbang nyom ka 47 di UBTVQH hu rah tabiak di sang praong Quốc hội. Tui danak dak, mbang nyaom ini, UBTVQH pasang iek, brei panuac ka dom bruk daok hu hatai sahneng karei di gauk di 04 danak dak hukum, nan lac: Hukum Cư trú (pasiam veik); Hukum pasiam, pabak dom paka di Hukumlangyah ngak suan hành chính; Hukum Biên phòng Việt Nam; Hukum khik caga môi trường (sửa đổi). Di mbang nyaom, UBTVQH jeng hu pasang iek, brei panuac ka Hukum pasiam, pabak dom paka di Hukum Pacang caga njom vi rút ba tal patrun miễn dịch di urang (HIV/AIDS); Sarak daong urang buh prein ka  CM (pasiam veik) saong dom asal kadha praong karei. 

Thủ tướng Rajaei  bahrau hu harak  Công điện ka bruk khik caga siam mekre bruk nao mai dalam tuk rah tabiak kan kandah di jit ruak COVID-19.Dalam Công điện, Thủ tướng ieu dom mintri: Pajeng ba nao mai, Công an, pato megru,  dom mintri,  tỉnh, ban  song dom jabat pagam tal tacei pato song peih ngak siam khik caga siam mekre bruk nao mai song peih ngak siam dom hukum ka bruk pacang caga jit ruak COVID-19 ka thí sinh, amaik ame pajeng ba  song dom urang jakar palih ruah  dalam mbang pakacah  THPT pakat negar thun  2020 rah tabiak dalam harei 9 song harei  10.8; hu jalan pasang iek, tacei pato bruk nao mai di dom labik dok jiak  labik pakacah  song dom jalan prong ba tal labilk pakacah piah khik siam di abih song  palagaih di abih  ka  thí sinh nao pakacah.

Harei ini (10/08), jaik 867 rabau anek saih yam tame harei pakacah puac abih di mbang pakacah tamat THPT thun 2020. Mesup, anek saih pakacah bài tổ hợp Khoa học tự nhiên haong Khoa học xã hội, biar harei pakacah sap negar lingiu. Taong abih 3 kadha pakacah ini jeng hu pakacah tui jalan trắc nghiệm. Karei jang mbang pakacah THPT thun 2019, dalam mbang pakacah tamat THPT thun ini, anek saih tok hu pilih ruah pakacah tổ hợp Khoa học tự nhiên atau Khoa học xã hội kayua abih 2 kadah pakacah ini jeng hu brei pakacah dalam 1 tukvak haong gauk. Yaom lac harei pakacah puac di abih min Mintri Pato Megru jeng hu tacei dom tỉnh ban ngak catang adat pakacah, kayua dalam harei pakacah kabroi (09/08), hu 13 anek saih brei padeih pakacah kayua ba tui phon tanu saong tài liệu tame bilik pakacah. Urak ini hu labaih hu labaih 26 rabau 300 anek saih pakacah di 23 tỉnh, ban oh pakacah hu kayua jit COVID-19.

Bruk trun jalan di Li-băng harei kabroi dok tagok khang tuk yaok ribau urang tuh mai sang Quốc hội, oh tah di mblang bein  pasak di ban ine Bây-rút piah cagar veik karja. Jeng dreih yau harei dahlau di nan , bruk trun jalan samar jeng tong paoh gauk tuk hu dom urang am pui piah duah jalan meblah khik mek boh sang, gah patui ngak hukum brei padang ngak paga  pacang  an ninh song pandar  hơi cay piah giải tán. Dom urang trun jalan hu panuac ieu dom chính trị gia brei padeih bruk  song njauk  trừng phạt kayua bruk  tắc trách di drei  hu rah tabiak sa mbang patuh prong di abih dalam dak rai sajarah pakat negar  Trung Đông ni, ngak jiak 160 urang metai song labaih  6 ribau urang karei njauk rambuac. Jeng dalam harei kabroi, 2 akaok mintri Li-băng pok harak likau padeih ngak, dalam tuk khủng hoảng chính trị dok tagok. Thủ tướng Hassan Diab hu panuac ieu palih ruah avar , mong lac peih tabiak jalan siam mekre urak ni ka negar ni.

Takik di abih 11 urang metai saong 13 urang karei njauk rambus kayua pui khuah di harei kabroi (09/08) di chung cư daok di Bô-hu-min, labik tapen negar  Séc haong Ba Lan. Dalam 11 urang metai hu 3 uraniah saong 5 urang chat meng merang tabiak piah plaih pui khuah min laik trun mertai. Lambaok karja brei thau, pui khuah meda kayua menuac am, Urak ini, cap mek hu 1 urang mboh yau gam tal bruk pui khuah nan. Ini jeng lac mbang pui khuah hu menuac metai rilo abih di Séc kuhria meng thun 1990.

Tỉnh Si-ma-nê, Japon bahrau khan lac ban  Ma-chư-ê harei kabroi  (9/8) hu  91 urang njom bahrau. Njauk caik hatai lac hu tal  88 urang dalam ni lac anek saih di sa sang bac pakat 3. Urang pal akaok brei thau hu rah tabiak sa sruh jit njom mbak dom mbang di sang bac  trung học Sư-nan di Đại học Rít-xô.  Hu thau 80 dalam abih  88 anek saih  njauk njom mbak dok dalam  ký túc xá di sang bac. Karja ban song karja  tỉnh dok kham merat pambuak bruk duah thau janih njom mbak jang yau peih dom jalan pacang caga jit ruak dok njom mbak./.

Urang lang: M. Phương – Hani Pha – 10/08 10:44:15

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân