UBND tỉnh Quảng Nam brei padeih bruk lac hu atau oh jeng hu meng 0h tuk harei ini 13/8 piah pacang caga jit Covid-19

Hu gac 3 urang njom bahrau Covid-19 di taneh ia drei, dalam nan hu 2 urang daok di Quảng Nam jeng hu pambuak tal Đà Nẵng haong 1 urang di Bạc Liêu hu brei daok paatah chip hadei di tuk tame negar. Dah page ini, urang metai ka 18 kayua COVID-19 kuhria meng di tuk jit praong tamuh tabiak di Việt Nam jeng hu khan brei thau. Urang ruak ka 485, lac kumei, 52 thun, daok di: Cẩm Lệ, Đà Nẵng. Urang ini hu dalam rup ruak suy thận mạn tuvak puac, tagok darah, me-ik saradang type 2. Tui Mintri Y tế, yaom lac mbang jit ini dak harei dak pacang hu saong takik pambak tabiak rahra, min anak tal jeng meda daok hu dom urang njom ruak meng njom virus SARS- CoV-2 oh ka hu duah mboh dalam bhap bini.

Peih mbaok nyaom biai tapak  Thường trực Rajaei  song dom mintri, dom gah  song 15 tỉnh ban ka bruk song dom jalan ngak bahrau pacang caga  jit COVID-19 peih tabiak di beir harei  12-8, Thủ tướng Nguyễn Xuân Phúc ndom lac meng bloh, dom mintri, dom gah , tỉnh ban, abih di nyu nan lac gah  y tế song dom tỉnh ban yau  Đà Nẵng, Quảng Nam, Quảng Ngãi jang yau dom tỉnh ban hu urang dương tính hu pacang veik bhum jit, abih di nyu lac dut iek samar biak rilo . Thủ tướng ieu dom tỉnh ban njauk sahneng kuhria ka sa jalan pacang caga jit siam lagaih  ka gah  kinh tế song abih di nyu nan lac y tế. Tui jalan lac oh iek lap min njauk caik hatai sangka bruk kreik pambah mbang khang tui jalan ngak biak prong oh lac padeih dom bruk kinh tế - xã hội bo dok pambak tal hatai sahneng, tal hatung hatian di bhap bini.

UBND tỉnh Quảng Nam bahrau brei padeih bruk lac hu atau oh jeng hu meng 0h tuk harei ini 13/8 dalam negar piah pacang caga jit Covid-19. Tui nan, tỉnh Quảng Nam brei padeih bruk pajeng ba tuai di dom radaih nao mai dom tỉnh, radaih peih tui pambuak bruk, radaih du lịch, taxi, radaih buýt meng Quảng Nam nao Đà Nẵng haong tỉnh Quảng Ngãi. Oh kuhria radaih ngak bruk karja, radaih pajeng pandap mbang, radaih pajeng urang ngak, urang ilamu di dom doanh nghiệp, radaih pajeng pandap ngak. Dahlau di nan, UBND tỉnh Quảng Nam jeng brei daok pataath tui sarak 16 di Thủ tướng rajaei di 6 huyện, ban sit daok hu jit Covid-19 daok rah tabiak srau kadau.

230 urang  Việt Nam mai meng  Malaysia angaok mbang par  VJ 7012 meng  Kula Lampur tal mblang kapan haoh  Cam Ranh, tỉnh Khánh Hòa di jala pandiak  harei ni  13/8 hu brei dok karei di  Trung đoàn Bộ binh 896 di  Ninh Thuận. mBan khik ramik dom labik brei dok karei  tỉnh Ninh Thuận hu peih bruk khik iek siam mekre, oh caik ka jit ruak njom mbak. Di pak ni, hadei di tuk pasang iek pren yava, urang halei mboh yau ruak hu jao ka pasak pasang iek ruak kik  tỉnh Ninh Thuận taduan , ba mai sang iek ruak  Đa khoa tỉnh atau sang iek ruak  Lao song ruak  phổi piah paatah di gauk, pasang iek ruak.

Maong 5h30 mesup ini, di Công ty JAANH Vina, daok di labik lô taneh ka 10, bhum ngak kong Yên Phong, tỉnh Bắc Ninh hu pui khauh praong. Taduan hu panuac khan, Gah Cảnh sát pacang khauh padam khuah saong daong duah urang njauk bala, Công an tỉnh Bắc Ninh pambuak haong Công an huyện Yên Phong ba samar nao padam pui. Min kayua labik khuah hu rilo pandap mbuan khuah, ngak ka nhà xưởng jaleih jaik abih, kham merat dalam 2 maong meng padam hu. Urak ini, dom gah chức năng daok pasang iek, duah thau, ngak brei cambaih laih makna ba tal khuah.

Tui blah Worldometers mesup 13-8, di dunya hu abih tih  labaih  20,7 triệu urang ruak  COVID-19, dalam nan hu labaih  751.000  urang metai song labaih 13,6 triệu urang hu pasiam veik . Mỹ urak ni lac negar dang akaok  hu labaih  5,3 triệu urang njom , labaih 168.000 urang metai kayua  COVID-19 song labaih  2,7 triệu urang hu siam veik . Patui di nan lac  Brazil hu labaih  3,1 triệu urang njom song  India hu labaih  2,3 triệu urang njom . Việt Nam dok di gah langiu nyom  150 negar  hu urang njom glong abih di dunya.

Nga brei thau yaom pablei tabiak negar lingiu vắcxin caga COVID-19 takik di abih lac 10 USD ka 2 mbang. Min vắcxin meda lap jang tuk hu ngak rilo. Harei 11-8, Tổng thống Vladimir Putin brei thau lac Nga hu tut angan janih vắcxin caga COVID-19 camereip abih di dunya hu angan ieu lac Sputnik V. Min urak ini hu dom taneh ia Tây oh ka jia tame vắcxin di Nga. Angaok dunya, rilo công ty daok pakacah gauk ngak vaccine min brei hu dom bilan tra piah ngak iek saong taong yaom puac di abih.

Cảnh sát Cô-xta Ri-ca harei kabroi  chap hu labaih  1 tấn cô-ca-in hupadauk gah dalam sa  công-ten-nơ pajeng boh menaih tapa negar ni. Công-ten-nơ ni kuhria pataok tame pambah lamnge  Rotterdam, Hà Lan, lac labik lô pandap meda  hu pablei ngan song yaom  dom  triệu ơ-rô. Ni lac lô pandap jru phiel  ka  9 hu dalam dom công-ten-nơ bo jabat  chức năng Cô-xta Ri-ca chap hu kuhria meng akaok thun  ni mai, samu song 9 tấn cô-ca-in. Lac taneh ia dok jiak tapen  Trung Mỹ song Nam Mỹ, Cô-xta Ri-ca hu thau tal yau sa  "gilang khik pandap" atau labik pajeng ba di dom  kapul nyaom kanyah jhak  piah pajeng ba jru pheil meng  Nam Mỹ tal  Bắc Mỹ song dom negar châu Âu./.

Urang lang: M. Phương – Hani Pha – 13/08 10:39:14

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân