Dom urang hu mbaok tame klauk iek vaccine Nanocovax 75mcg prein yava jeng hu tani tanat

Di tuk pahadar 91 thun Harei padang Đảng Cộng sản Việt Nam (3-2-1930 - 3-2-2021), pamaong tal nyaom roya pakat negar mbang ka XIII di Đảng, harei 19-1, di Hà Nội, Miuyim sajarah negar pambuak haong Cục Khik piah jabat TW Đảng peih parang iek “Đảng Cộng sản Việt Nam – Meng Nyaom roya tal Nyaom roya”. Meng labaih 200 pandap, harak gar, thaot binguk, parang iek yaih khan bruk tabiak rai di Đảng Cộng sản Việt Nam; 12 mbang nyaom roya Đảng haong dom jalan ngak njauk, khang kadang, hadah hadai, dom jayah, dom jak jeng saong dom ilamu di CM Việt Nam ala bruk pan akaok ba jalan di Đảng; bruk jum pataom, yasa, kham merat, sa hatung hatai haong gauk di taong abih urang Đảng, bhap bini haong bol lin drei.

Tui pathau khan di Bkav, bruk an ninh mạng Việt Nam 12 bilan tapa hu rilo labik pandiak. Yaok rituh tỷ đồng khat lahik kayua bruk taong tame an ninh mạng pambuak tal gilang pariak; bruk mbuan lahik an ninh mạng meng dom bruk main di mangaok mạng xã hội; rilo kapul, doanh nghiệp njauk taong tame tui jalan baharu. Tui yaok pataom brei mboh, dalam thun 2020, khat lahik kayua virus komputer ka urang pandar di Việt Nam lac glaong di abih kuhria meng dahlau mai, yam tapa tanut 1 tỷ USD (lac labaih 24.000 tỷ đồng).

Tui kuhria, menuac sia di ban Thủ Đức hu labaih 2 triệu urang di thun 2040 saong tagok 3 triệu menuac di thun 2060. Meng 4 kadha hạ tầng hu ngak samu gauk, ban Thủ Đức meda hu labik hijao, gam hu ilamu bangsa saong dunya, lac 1 pasak ilamu praong di Việt Nam saong dunya. Ban Thủ Đức hu ramik ngak tui jalan “ban 15 minit”. Tui nan, Thủ Đức hu ramik ngak tui jalan lac meng sang daok, bhap bini tok abih 15 minit piah nao tal dom labik hu dom bruk drei caong khin. Bruk ini hu ba tabiak dalam nyaom biai pathau khan ngan saong kadha “Padang ban Thủ Đức jeng ban hadah krah, pambuak gauk glaong, ban ilamu, pasak patagok bhum kinh tế 4.0 gah meraong” kayua mBan Tuyên giáo Thành uỷ TPHCM peih tabiak di biar harei kabroi.

PGS, TS Chử Văn Mến, urang pan akaok pasak ngak iek angaok menuac saong samu haong sinh học, Học viện Quân y brei thau, 20 urang halain hatain hu mbaok tame klauk iek vaccine Nanocovax 75mcg prein yava jeng hu tani tanat, oh pandiak, hu dom urang pandik di labik klauk jru. Tal urak ni, abih tih dom mbang klauk jru vaccine ngak iek di Nanocovax jeng mboh salamat, ngak ginup njauk adat. Urak ni, dom urang halain hatain ni hu mai sang piah tui iek prein yava. Ong Mến jeng brei thau, tui kuhria harei ni (20-1), 3 urang halain hatain camriep klaik mbang 1 di mbang klauk 50mcg meda hu klauk mbang ka 2 saong 17 urang daok veik dalam kapul klauk 25mcg meda hu klauk mbang ka 2.

Lac labik nao dahlau dalam bruk pabak brei harak brei thau salamatka dom labik pah ndih, dom bruk du lịch, kuhria tal harei 14-1, Sở Ilamu, TT saong DL Bình Thuận hu brei harak brei thau lac salamat ka 19 labik brei pah ndih daok, bruk duh ka du lịch ngak njauk tui dom tanut ka bruk pacang caga jit Covid-19, khik siam mekre salamat ka tuai damuai. Bruk brei harak nan hu rik daong pacang. Caga jit ruak, khik siam mekre salamat ka tuai damuai bo daok lac jalan pamoang tal bruk padang Bình Thuận salamat, rap ar tuai damuai. Maong tame harak brei thau lac salamat, tuai damuai meda thau lac labik halei ngak siam bruk pacang caga jit, meng nan sahanag hatai pilih ruah labik daok.

Dahlau di tuk tagok rai, Tổng thống bahrau hu pilih ruah di Mỹ lac Joe Biden saong Phó Tổng thống bahrau hu pilih ruah lac Kamala Harris bahrau hu mbaok tame harei pahadar dom urang matai kayua Covid-19. Harei pahadar hu peih tabiak kayua Ủy ban bahrau tagok rai di mblang bien pakat negar di ban ine Washington. 400 mbaik gom hu truac hadah vil tamdar  danaok ia anak rup tau pahadar Lincoln Memorial piah pahadar tal labaih 400 ribau urang Mỹ njauk metai kayua Covid-19. Melam ni (tui maong Mỹ), gam haong mblang bien pakat negar, dom labik hu makna praong karei di grauk negar Mỹ jeng hu truac gom saong Nhà thờ pakat negar Mỹ jeng danei tagok 400 mbang taong sap chuông piah pahadar dom urang metai kayua jit praong biak trak damak abih dakam sa abap.

Kuhria tal harei ini, Trung Quốc daok hu 5 labik biak mbuan njaom saong 63 labik mbuan njaom jit Covid-19, dalam nan Bắc Kinh hu 5 labik mbuan njom. Anak bruk lac tukvak jaik ini, dom urang tame negar Trung Quốc hadei di tuk abih tuvak brei daok paatah di labik pataom gauk praong 14 harei bahrau tamuh ruak, saong jit tamuh tabiak di rilo tỉnh ban di Trung Quốc ye harei 19/1, karja ban Bắc Kinh hu ba tabiak rilo jalan ngak piah pasang iek menuac tame negar, urang di tỉnh karei tame ban ini.

Iran hu pandar dom sarak adat taong phat yau haong Tổng thống Donald Trump saong 9 urang jaka Mỹ ngan haong bruk hu mbaok tame dom mbang khủng bố mesuh haong negar ni. Tổng thống Trump saong 9 urang jaka Mỹ njauk Iran taong phat kayua hu ngak bruk khủng bố pacang mesuh saong negar ni dalam nan hu gam bruk pametai Tướng Qassem Soleimani di I-rắc di thun dahlau. Dom jalan taong phat di Iran meda oh hu pandar rilo tuk dom urang jaka Mỹ oh hu dom talei pambuak pablei salih ngan haong negar ni./.

Urang lang: M. Phương – T. Thảo – 20/01

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân