Labaih 10 thun ini mai, di sang iek ruak Chợ Rẫy (TP.HCM), rilo urang siam hatai buh tabiak yaok rituh triệu đồng, gaok mai yaok pluh tỉ đồng piah daong ka yaok ribau urang ruak kan kathaot

Sa urang ruak uranaih khang kadang hadei di blac raih baoh hatai 

Labaih 10 thun kak kajap haong sang iek ruak Chợ Rẫy, thạc sĩ Lê Minh Hiển (Akaok jabat công tác xã hội ) khan lac sa-ai gaok oh thau hadom urang ngak pah la, daong ka manuac urang ruak. Sa-ai Hiển brei thau, hu dom urang ngak pah la sa-ai oh ka mboh mbaok. Gaok mai rilo urang ngak pah la dom mbang akaok mereip oh caik veik angan je atau labik daok, oh caong khin vak phiếu thu. Sa-ai Hiển iew dom urang ngak pah la gandi gandang nan lac ân nhân.

Thạc sĩ Lê Minh Hiển khan veik sa-ai hadhar miat sa van biar harei sup puac thun 2019, tuk sa-ai si nao sang ye hu 3 urang kamei umo labaih 30 thun taih pabah mbang jabat, ndom lac caong khin daong ka urang ruak kathaot. Klau urang kamei nan mek tabiak 100 triệu đồng, ndom lac piah daong ka dom urang kan kandah di abih. Hadei di tuk caik veik jien, klau urang kamei nan samar drah yam takai nao, oh caik veik angan je, oh caong khin harak ndua dhal phol. Sa-ai Hiển hadhar gilac: Dahlak likau labik daok piah payua phiếu thu, payua harak ndua dhal phol min dom sa-ai lac oh cang mek. Saong nan  oh njauk lac sa mbang duy nhất. Akaok jabat công tác xã hội Sang iek ruak Chợ Rẫy ndom lac hu biak rilo hatai ameh di dom urang ngak pahla ngak ka sa-ai mboh drut droi. Nan lac 1 urang ngak pah la sit thun daong ka urang ruak kathaot di sang iek ruak Chợ Rẫy meng di tuk daok lac anek saih Sang bac chuyên Lê Hồng Phong (TP.HCM). Yaok mbang hu taduan mek pok jien bac, ayut jeng ba nao tal sang iek ruak. Urak ini anek saih nan lac sinh viên Sang bac ĐH Y dược TP.HCM. Bac biak naih joi, thun halei jeng hu 1-2 mbang taduan mek pok jien bac saong mbang halei ye anek saih likei ini jeng ba tame ini piah daong ka urang ruak kathaot.

Pagap yau dalikan ka sa urang ngak pah la ranaih umo, jaik 25-27 thun, mong rah tapa oh saneng lac urang hu jien kayua lac angui cuk biak bình dân. Thạc sĩ Hiển ndom lac: Anai D.M. thun ini jaik 70 thun, lac po di dom sang bac sap negar langiu daneiy angan di TP.HCM. "6 thun ini mai, dua hadiuk pasang gru D.M. hu daong ka Sang iek ruak Chợ Rẫy 5,5 tỉ, oh lac tok daong viện phí ka urang kathaot bo daok brei mac móc, pandap panda y tế chất lượng piah iek ruak siam di abih. Diuk pasang gru bahrau brei ka khoa blac raih baoh hatai uranaih 5 mac yaom 200 triệu đồng. Anak tal, diuk pasang gru meda daong ka khoa nduac thận nhân tạo dua mac nduac thận yaom jaik 2,4 tỉ tra. Njauk di nyu diuk pasang gru daong 6 mac, min daok daong ka bhap bani miền Tây njauk tua riya njaom mbak, nan ye anai gru pagol veik 4 mac meda daong brei hadei. Buh tabiak yaok tỉ đồng daong manuac urang min tal harei ini angaok mạng oh hu thông tin hagait ndom ka anai D.M. Oh ka tuk halei anai tabiak mbaok tuk pok brei jien bo tok tapa urang lambaok. Anai ndom lac caong khin ngak gandang, oh khin ndom rilo ka bruk drei ngak pah la ka rilo manuac urang thau.  

Yau dalikan ndom ka đại gia H.U.D. daok di Bình Dương. Meng thun 2015 tal ini, ong D. hu daong ka Sang iek ruak Chợ Rẫy labaih 12 tỉ đồng. Labaih 400 urang blac raih baoh hatai, dom urang blac raih, daok cấp cứu, dom urang ruak hu brei nao cấp cứu min oh hu gauk gar jeng hu daong. Thạc sĩ Lê Minh Hiển khim klao lac "bilan 6-2016, tuk peih bruk pahadar harei  Chợ Rẫy saong công ty ong mboh tangin sanya kadung jien ngak pah la H.H – angan anek likei ong, ong mai kuen dahlak, blaoh ndom lac: ndua dhal phol anek hu daong ka ong daong urang ruak kathaot. Hu thei ngak kadha cagar veik yau nan halei oh? Ong buh tabiak yaok pluh tỉ đồng piah daong ka urang ruak kathaot bo ong gilac ndua dhal phol drei.

Akaok jabat công tác xã hội Sang iek ruak Chợ Rẫy brei thau daok hu biak rilo urang ngak pah la padauk mbaok yau nan. Dom urang nan oh takre yaih khan,  oh khin pok angan, oh takre ndom rilo. Dom urang nan oh mek angan Chợ Rẫy piah ngak hadah angan je di drei. Rilo menuac biak mbuan metai lahik hu dom urang ngak pah la nan daong paklah di metai, hu diuk veik./.

Urang lang: Jasi - 30/3

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân