Tĭh vơ̆ djơ̆ ‘lơ̆ng lơ̆m groi tĕh tŭk jur, prăt sơnăm ‘năr rơngơp, Nguyễn Đăng Thiên Phi Long (Rơnĕh sơnăm 1992, oĕi tơ̆ pơlei tơm Đà Lạt, Lâm Đồng) hlôi iŏk đei nơ̆r hôn bơnê kơtang ăn rim mir pơgar ‘nhot kơ ŭnh hnam păng kon pơlei tơ̆ au. Lĕch ‘măng khoă hŏk jang vei lăng Jên hu-Hơnĭh mong jên, bơ̆ jang lơ̆m mĭnh Kŏng ty đei ƀơm trŭh tĕch răt tơmam drăm hăm tĕh đak đe găh tơmam chŏh jang sa, ‘nau jing jơ ‘năr ‘nhŏng đei rơvơn tơchă hơnĭh tĕch mơdro mư̆h vang năm jơnŭm kơchơ chŏh jang sa tơ̆ tĕh đak đe.

Sơnăm 2017, lăp đơ̆ng rŏng vang năm jơnŭm kơchơ tơ̆ Băngkok - Thái Lan, Phi Long năm tơ̆ Malaysia chă tơmang lăng tơring chŏh jang sa hăm kmăi kmok gơ̆h hơgei tômmatĭk. Ƀô̆h kơ măt dôm hơnĭh jang gơ̆h hơgei, Long tơchĕng trŭh kon pơlei chŏh jang sa tơ̆ pơlei kơ dĭh prăt sơnăm tăm kơrach glĕh hrat păng ‘mĕh vă trong jang kiơ̆ kmăi kmŏk lơ̆m chŏh jang sa hloi.

Đon tơchĕng jơ̆ng ti iung jang hloi, sơnăm 2018, Phi Long pơjing Kŏng ty Finom hăm tơdrong jang tơm ‘nŏh pơtrŭh ăn rim trong chŏh jang sa kmăi kmŏk hơgei ăn rim hơnĭh pơm tơlĕch păng rim trong jang vei lăng, lăng hơlen tơmam drăm.

Khei năr blŭng, Finom lăp akŏm chă pơlăp, đing đak, kmăi kmŏk tơruih, hnam hơdrau, hnam pơnĭl, rim trong jang jang kmăi kmŏk tommatĭk. Jang răh, dăr lăng răh păng tơchă hơnĭh răt, Long ƀô̆h hơdăh groi tĕh pơlei kơdĭh Lâm Đồng ‘nŏh đei rơvơn ăn hơnĭh mơdro sa atŏk tơ iung. ‘Nhŏng tơchơ̆t pơjing tơdrong jang đunh đai tơ̆ pơlei kơdĭh hloi.

Sơnăm 2021, Kŏng ty kơ Phi Long pơjing hơdrơ̆r pơtăm ‘nhot sa ăn hlŏh 150 ŭnh hnam kon pơlei, hăm hơgăt tĕh să 5ha tơ̆ dêh char Lâm Đồng păng hlŏh 40 ŭnh hnam chŏh jang sa tơ̆ dêh char anai. Hrei au Kŏng ty Finom ư̆h khan lăp pơtrŭh dôm trong chŏh jang sa hăm kmăi kmŏk hơgei ăn lơ̆m tĕh đak mă lei oei tĕch tơ̆ tĕh đak Malaysia. Trong jang au hlôi iŏk đei jơnei trŭh 11 ti 600 trĭu hlak jên lơ̆m 1 sơnăm, tơklăh pơđĭ kon jên tơmơ̆t jang oei iŏk đei 1 ty hlak jên lơ̆m 1 sơnăm păng tơmơ̆t 18 ‘nu hơdrŭh tơdăm mơ̆t jang. ‘Nhong ‘nŏh 1 lơ̆m 32 ‘nu bơngai hơgei đei sơng iŏk tơmam hơpăh Lương Ðịnh Của sơnăm au.  Phi Long tơbăt:“Tơdrong kăl hlŏh lơ̆m pơjing tơdrong jang ‘nŏh kăl hưch hanh ‘mơ̆i, đei jơhngơ̆m đon hơdrin vă yak hlŏh tơnap tap, tơchăr vă yak pran, đei trong jang kơdĭh bơ̆n. Mư̆h tơchơ̆t brŏk vĭh tơ̆ pơlei pơjing tơdrong jang sa, ĭnh hơpơi ‘mĕh vă pơjing đei tơdrong rơvơn vă dôm đe mơlô̆h nhen ba kĕ atŏk tơiung kơtă tơ̆ pơlei pơla kơdĭh bơ̆n hloi”.

‘Nao lăp 35 sơnăm, bơngai tơdăm hơdrung Tày, Lục Vân Anh oei tơ̆ thĭ trân Yên Thế, apŭng Lục Yên, dêh char Yên Bái hlôi iung jang chŏh jang sa rơgŏh ‘lơ̆ng iŏk đei kơ ti hlak jên. ‘Nhŏng ‘nŏh mĭnh lơ̆m dôm ‘nu bơngai chŏh jang sa - mơdro sa hơgei kơ lơ̆m tĕh đak đei Trung ương Đoàn pôk ăn tơmam hơpăh Lương Định Của.

Lăp đơ̆ng rŏng chă hơlen kơtang găh tŏ ‘mi kial, groi tĕh kơ tơring, bơngai tơdăm Tày Lục Vân Anh hlôi tơlĕch trong jang pơjing Hơp tak xah Sáu Không Farm, joăt chă pơtăm păng tĕch mơdro ‘nhot, ƀum , plei rơgŏh ‘lơ̆ng. Khei 8/2018, ‘nhŏng pơtăm pơlong năng lơ̆m 1 ha; sơnăm đơ̆ng rŏng, ‘nhŏng hơnơ̆ng pơ̆ih să hnam hơdrau, hnam pơnĭl să hlŏh 5 sao păng jang hơdoi hăm rim ŭnh hnam kon pơlei tơ̆ thĭ trân Yên Thế, vei lăng păng răt iŏk tơmam drăm.“Iŏk đei đơ̆ng hưch hanh chŏh jang sa, đơ̆ng ‘lơ̆p ba hơdrin hŏk pơhrăm vă mơ̆t hŏk đei hnam Trương Đăi hŏk Nông nghiệp I Hà Nội. Lơ̆m khei ‘năr hŏk jei hơpơi ‘mĕh vă đơ̆ng rŏng au kơnh brŏk vĭh tơ̆ pơlei pơla atŭm hăm kon pơlei chŏh jang sa iŏk yua kơ jăp. Đơ̆ng mă nŏh, ba hlôi hơdrin hŏk pơhrăm, jang hơdoi hăm rim ŭnh hnam chŏh jang sa vă pơjing đei tơmam drăm ‘lơ̆ng tĕch măt”.

Blŭng sơnăm 2022, Lục Vân  Anh hơnơ̆ng pơ̆ih să tĕh pơtăm rim ‘long sa plei, adoi iung jang hơdoi hăm rim hơnĭh răt iŏk tơmam drăm rơgŏh ‘lơ̆ng păng rim siu thĭ ‘lơ̆ng vă tĕch mơdro tơmam drăm. ‘Ngoăih kơ ‘nŏh, ‘nhŏng jei hơdrin pơrô̆ pơrôp, pơtho tơbăt trong jang sa ăn rim đoàn viên, hơdrŭh tơdăm anai lơ̆m apŭng păng apŭng anai. 

Hrei au, Vân Anh hlôi jang hơdoi hăm 3 ‘nu đoàn viên pơ̆ih să dơ̆ng hơgăt tĕh hnam hơdrau, hnam pơnĭl trŭh 1 ha 3 sao tơ̆ tơring Tân Lập păng Thĭ trân Yên Thế. ‘Nhŏng Nguyễn Ngọc Khuyến, đoàn viên thôn São, tơring Tân Lập, apung Lục Yên tơbăt:“Hlŏh dăr lăng păng đei ‘nhŏng Lục Vân Anh chă pơtho ăn đơ̆ng tơmam drăm, găr hơdrĕch trŭh kih thuơ̆t, trong chă prôi phŏng mơ̆r lơ liơ, vei lăng năng tông lơ liơ... trŭh dang ei ŭnh hnam tôch hơ iă găh trong jang au”.

Jang kiơ̆ răh khoa hŏk kih thuơ̆t lơ̆m pơtăm, vei lăng ‘long pơtăm, adoi iung jang kiơ̆ hloi lơ̆m kmăi kmŏk pơre nơ̆r vă tĕch mơdro tơmam drăm hlot lơ hlŏh dơ̆ng, jô̆ hơtŏ lơ̆m 1 sơnăm, Hơp tak xak Sáu Không Farm kơ Lục Vân Anh hlôi tĕch mơdro hlot đơ̆ng 60-80 tân ‘nhot, ƀum, plei, iŏk đei 1 ti 500 trĭu hlak jên lơ̆m 1 sơnăm; tơklăh pơ đĭ kon jên tơmơ̆t jang sa oei iŏk đei dang 500 trĭu hlak jên. Kiơ̆ đơ̆ng Ƀĭ thư Đoàn apŭng Lục Yên - Nông Thanh Sơn,  Hơp tak xah kơ ‘nhŏng Lục Vân Anh hlôi pơjing đei tơdrong jang pơyan jang sa ăn dang 10-15 ‘nu bơngai păng tơgŭm djru 15 ŭnh hnam vang jang hơdoi păng đei iŏk yua kơ jăp. “Lục Vân Anh ‘nŏh bơngai tơdăm pơnam, hơbĕch hơbal, gơ̆h hơgei, phăl hơlăng hlŏh. Đơ̆ng kơ dĭh jang sa lơ liơ ‘nŏh, ‘nhŏng hlôi krao hơvơn rim đoàn viên, hơdrŭh tơdăm đei mĭnh jơhngơ̆m đon hưch hanh chŏh jang sa vă pơjing hơp tak xah. Trong jang đơ̆ng ‘nhong ư̆h khan lăp ba ăn rim bơngai răt yua đei tơmam drăm rơgŏh ‘lơ̆ng mă lei oei tưk hơtŏk tơdrong hơdrin jang sa kơ hơdrŭh tơdăm lơ̆m apŭng Lục Yên dơ̆ng”.

Đơ̆ng tơdrong hơdrin đơ̆ng kơ dĭh, năr 4/11, ‘nhong Lục Vân Anh hlôi jing 1 lơ̆m 32 ‘nu hơdrŭh tơdăm jang sa gơ̆h hơgei đei sơng iŏk tơmam hơpăh Lương Định Của kơ yuơ Trung ương Đoàn pôk ăn.