Tơklep hăm tơdrong jang pơtăm pơkao Têt vă jê̆ 10 sơnăm kơ au, ƀok Ôn Văn Khi, oei tơ̆ thôn 7A, tơring Ea Bar, apung Buôn Đôn tơbăt: pơyan têt au, ƀok pơtăm đei 100 kơchâu pơkao kŭk păh ai păng 70 kơchâu tih. Pơtăm pơkao têt jei tơgŭm ăn ŭnh hnam jang sa iŏk đei tŏ sĕt, adoi pơm pơchơt ăn kon pơlei chŏh jang sa. Hơgăt tĕh au hmă hmă ƀok chă pơtăm bơ̆n ‘nhot sa, truh khei 8 ‘nŏh pơtăm pơkao kŭk tĕch ăn khei ‘năr têt. Sơnăm au, hlôi yak hlŏh jĭ hơbuh Covid-19, tơdrong ‘mĕh vă răt pơkao Têt rŏ năng gô tŏk kơtang, ƀok Ôn Văn Khi jei chă pơtăm lơ pơkao dơ̆ng, hăm hơmŏ đei iŏk yua kơjăp:“Hơmet ăn lơ trong jang đơ̆ng chă tŭh hrau teh hăm rim kơloăi phŏng mơ̆r vi sinh, mă 2 ‘noh chă rơih hơdrĕch vă pơtăm vei lăng hiôk ƀiơ̆, ‘lơ̆ng ƀiơ̆. Vei lăng ‘nŏh hơnơ̆ng chă tơruih đak măh mai đĕch. Bơngai tĕch jei chhôk ‘nă, bơngai chă pơrŏ tơ̆ hnam jei hiôk chơt, sơnăm ‘nao iŏk đei jơnei hơ iă”.

Pơyan pơkao Têt sơnăm au, ŭnh hnam yă Nguyễn Thị Hiệu, oei tơ̆ thôn 3, tơring Hoà Xuân, pơlei tơm Buôn Ma Thuột, pơtăm 1500m2 pơkao kŭk đại đoá . Vă jê̆ 4 khei vei lăng tơnăp, dôm năr au, yă hăm ŭnh hnam hơnơ̆ng jang lơ̆m pơgar, chă kăt hơlĕh sơdrai, vei lăng năng tông pơkao ‘lơ̆ng păng ăn chôh pơkao ƀlep lơ̆m jơ ‘năr Têt.“ Dang ei tok bŏk chă rơ̆ih kăt bôp pơkao, bôp pơkao ayơ iĕ ư̆h kơ gan ‘lơ̆ng ‘nŏh kăt hŭt, ayơ ‘lơ̆ng ‘nŏh ba rong, dang ei tŏk bŏk vei lăng vă trŭh năr 22 đei mĭnh ƀar kơ loăi jei tĕch bơih păng pă dôm yơ ‘nŏh trŭh năr 28 têt ‘nŏh tĕch pơgŏh hloi”.

Găh hăm ƀok Nguyễn Ngọc Sung, oei tơ̆ phương Tân Lợi, pơlei tơm Buôn Ma Thuột, rim ‘măng Têt trŭh jei jing jơ ‘năr ƀok sơng iŏk đei đơ̆ng tơdrong hưch hanh hăm pơtăm ‘long pơkao rung reng. Sơnăm au, ƀok pơtăm đei vă jê̆ 400 dơnơm pơkao rung reng dơnơm tih đơ̆ng 5 trŭh 70 sơnăm vă tĕch mơdro. Ƀok tơbăt, vă đei dơnơm ‘long pơkao rung reng ‘lơ̆ng lơ̆m khei ‘năr Têt, ‘ngoăih kih thuơ̆t kăt sơdrai pơm pơrŏ, vei lăng, tang găn sơdrông pơrang pơrăm lei kăl đei ‘mi rŏ tŏ hơlăng vă chă pơprŏ mă trŏ ƀlep.“Lơ̆m sơnăm bơ̆n chă prôi tuh phŏng mơ̆r mă ‘lơ̆ng, tơruih đak, pơm pơrŏ mă ‘lơ̆ng, vă đĭ sơnăm ‘nŏh ba vei lăng hla hăp ƀlĭk ƀlăk ‘lơ̆ng vă kơ hăp rong bôp pơkao ‘lơ̆ng. Đơ̆ng khei 10 trŭh khei ning nơng ‘nŏh kăl hlŏh, ‘nŏh lăng trŭh chă phĕ hrĕt hŭt hla vă dơnơm pơkao”.

Tơ̆ rim pơgar pơơkao têt tơ̆ dêh char Quảng Nam, dôm năr au hlôi đei mơsuơ̆t mơsoăt bơngai mơdro păng tơmoi năm apĭnh răt pơkao. Sơnăm au ‘mi rŏ tŏ hơlăng kơna pơkao Têt tơ̆ dêh char au ‘lơ̆ng păng tĕch măt. Ŭnh hnam yă Trần Thị Thu, oei tơ̆ tơring Duy Trung, apŭng Duy Xuyên pơtăm vă jê̆ 200.000 kơchâu pơkao rim kơloăi nhen: Dạ yến thảo, Mai địa thảo, cúc Mâm xôi, Sao băng…hlôi đei bơngai mơdro pơkơ̆ng răt iŏk hlŏh 70%. Yă Trần Thị Thu tơbăt, pơkao sơnăm au đei kơjă, bơngai mơdro năm răt chơ đơ̆ng hrôih kơna kon pơlei jang sa iŏk đei sơđơ̆ng vă chă răt tơmam drăm ăn năr Têt:“Sơnăm au, pơkao ‘lơ̆ng hlŏh sơnăm sơ̆, bơngai ,mơdro trŭh pơkơ̆ng răt iŏk tĕch mơdro năr Têt, đe hăp ăn jên hơdrol. Pơtêng hăm sơnăm sơ̆, ba jang sa iŏk yua kơjap hlŏh, kơjă pơkao măt hlŏh sơnăm sơ̆. Akŏp đĭ đăng iŏk đei dang 1 ti 400 trĭu hlak jên, tơklăh pơđĭ kon jên tơmơ̆t jang oei iŏk đei dang 1 poăt kon jên au. Ba chă hơvơ̆h ăn 12 ‘nu bơngai jang, pơjing đei tơdrong jang sa hơnơ̆ng ăn đe sư.”

Apŭng Duy Xuyên, dêh char Quảng Nam đei dang 7 héc ta teh pơtăm pơkao tĕch lơ̆m khei ‘năr Têt hăm kơhrĕng ŭnh hnam pơtăm, găh lơ ‘nŏh pơkao vạn thọ, cúc, rim pơkao, akŏm lơ hlŏh tơ̆ rim tơring Duy Thành, Duy Trung, Duy Nghĩa, Duy Hải, thĭ trân Nam Phước. Jô̆ hơtŏ 1 ha teh pơtăm kơtao hơnhăk đei iŏk yua ăn bơngai jang hlŏh 200 trĭu hlak jên, lơ hlŏh pơtêng hăm chă rei pơtăm ‘long pơtăm păng ‘nhot sa anai. Ƀok Phan Xuân Cảnh, Kơdră chĕp pơgơ̆r Dơnŏ anih vei lăng kon pơlei apŭng Duy Xuyên, dêh char Quảng Nam tơbăt, pơtêng hăm dôm sơnăm hơdrol, sơnăm au hơgăt teh pơtăm pơkao lang să, tĕch mơdro sơđơ̆ng:“Apŭng tơgŭm djru găh tĕh vă pơ̆ih să jang sa. Rŏ năng vă pơma, lơ̆m khei ‘năr tŏk bŏk đei rơvơn păng tơdrong ‘mĕh vă răt pơkao sơnăm au tôch kơ lơ, vă pơjing đei tơdrong jang sa, iŏk yua kơjap ăn kon pơlei lơ̆m khei ‘năr tơnap tap găh jĭ hơbuh pơrăm.”

Dêh char Quảng Nam đei vă jê̆ 2.000 ŭnh hnam pơtăm pơkao Têt. Dơnŏ anih vei lăng chŏh jang sa dêh char Quảng Nam, Khul kon pơlei chŏh jang sa dêh char hlôi tơgŭm ăn bơngai pơtăm pơkao tŏk iŏk kon jên hăm jên chĕh păh ai, ƀơk ăn hơdrĕch ‘long pơtăm, tơgŭm ăn kon pơlei sơđơ̆ng jơhngơ̆m chă jang sa. Sơnăm au, ‘mi rŏ tŏ hơlăng, kơ jă sơđơ̆ng, tơdrong đe ‘mĕh vă răt lơ kơna bơngai pơtăm pơkao Têt tơ̆ Quảng Nam tôch chơt hơ iă ‘nă hal.