Ban ray HCM birau ba tabiak dom jalan pacang caga jit COVID-19 kayua hu manuac ruak veik saong dut mboh bien chung Omicron XEC. Tui So Y te Ban raya HCM, bien chung XEC tui janih Omicron, hu mboh di dunya ini meng bilan 6 thun 2024 saong oh njauk lac anek ruak birau. Yau nan min, dalam tuk bruk ngak mbang nao mai saong bruk jirah rivang di dunya rilo tagok, mbuan ruak njom mbak, njauk brei tui iek tani tanat.

So Y te tinh Ba Ria – Vung Tau brei thau, prein yawa 3 anek saih ruak COVID-19 di sa sang bac THPT hu siam gilac saong abih tukvak iek ruak di sang. Gah y te daok pakhang bruk tui iek piah pacang caga ruak njom mbak. Dahlau di nan, Ban Bà Rịa hu 3 anek saih ruak COVID-19 bac dalam sa Sang THPT Nguyễn Bỉnh Khiêm, phuong Long Tâm. Dom adei  mboh ruak la-gah la-ar, pandiak saong dut iek mboh ruak COVID-19 di sang. Urak ini, oh ka hu thei ruak birau. 

Dalam klau bilan akok thun ini, baoh manuk ada di tinh Dong Nai ngak tabiak hu jaik 300 trieu baoh. Ngak tabiak rilo baoh manuk ada nan oh lac pablei dalam tinh bo daok pabak ka dom tinh, ban dalam negar. Yau nan min, anak bruk menek kadha oh njauk ka baoh manuk ada ja ba tal bruk pablei baoh manuk ada trun takik. Urak ini, yaom baoh manuk janih praong siam, meng 1.500 - 1.600 đồng sa baoh. Ini lac yaom biar abih saong daok trun veik, ralo kayua takik urang blei gam panuac kadha oh njauk tra.

Hajan oh bilan dui atah gam langik oh lagaih dalam bilan 4 saong 5 ba tal rilo bein phun kayau mbang baoh jeng yau baoh mang cut di ban Thuận An, tinh Binh Duong trun biak takik baoh. Yau nan ye, Roya baoh kayau tathak thun 2025 meda padeih. Roya baoh kayau tathak lac bruk jirah - ilamo bhian thun hu peih ngak di bilan 6 pak ban Thuận An. Dalam dom thun dahlau, roya pachreih hu yaok ribau tuai damuai mai rivang ma-in, mbang yaom baoh kayau di bein.

Urak ini daok tame bilan hajan gam ia hajan khang, yau nan ye mbuan glut jaleih taneh, ar kraong, ribaong biak kan thau dahlau. Gah chuc nang tinh Hau Giang kakei bhap bini tuk mboh dom bruk yau ye: ia gaving raoh jaik ar kraong, ribong; ra-ai talah ar kraong, ribaong; labik talah dalam trun, atah atau meda glut jaleih, ra-ai ar kraong…ye khan brei xã, phuong jaik abih hu thau. Meng akaok thun mbiah tal ini, Hau Giang rah tabiak 19 labik glut jaleih, talah ar kraong ribong kuhria abih tih atah 452met.

Urak ini urang ruak COVID-19 oh padeih tagok di Thai Lan hu jaik 50.000 mbang urang ruak di adit dahlau. Tui Cuc Pasang iek Jit ruak Thai Lan, yaom lac dom urang ruak COVID-19 daok tagok, min urang metai thun ini oh ralo yau mbang tamuh jit ruak camereip. Yau nan min, mbang tamuh jit ruak meda daok hu veik dalam 2 tal 3 bilan tra. Rajaei Thai Lan daok peih bruk brei klauk jru vaccine kum oh abih jien di dom labik iek ruak ka bhap bini gaok kan kandah saong hu ruak dalam rup dahlau.

Sarak birau di karja Tong thong Trump hu ba tabiak meda ngak takik urang My hu klauk jru vaccine COVID-19 di bilan thu jaik tal. Tui nan, vaccine hu brei pabak ka dom urang mbuan njom ruak jang, umo meng 65 thun tagok, uranaih saong urang dam dara hu ruak dahlau dalam rup. Dahlau di nan, negar Mỹ kakei brei klauk jru vaccine COVID-19 yaok thun ka taong abih bhap bini umo meng 6 bilan tagok.  

Dom baoh sang ngak nong di negar Campuchia dak harei dak takik, brei mboh bruk salih karei dalam bruk ngak mbang di taneh ia ini. Urak ini, baoh sang ngak nong tapak meblah labaih 54% taong abih bhap bini, sumu 1 trieu 8 rituh 50 ribau baoh sang dalam abih tih labaih 3 trieu  baoh sang negar Campuchia. Bruk ngak nong nan lac bruk ngak duah jien tame ralo khang kajap di Campuchia, jien mek tame 5 tỷ 3 rituh trieu dola My.