À UB Bhap bini Ban raya Ho Chi Minh bahrau mbaoh sarak daong sang daok ka urang ngak bruk katmang meng kal saong urang dalam baoh sang di bol lin plang lahik di jaman mesuh metak dalam bhum di thun 2025. Jalan ngak di danak dak ini lac daong tapak sang daok ka urang hu ngak bruk katmang meng kal saong urang dalam baoh sang bol lin plang lahik di jaman mesuh metak tapa dua bruk padang bahrau saong pasiam sang daok. Taong abih baoh sang hu daong dalam thun ini lac 23 baoh sang ngan haong jien padai piah ngak jaik 700 trieu dong meng kadung jien Ban raya Ho Chi Minh. Ban raya Ho Chi Minh ba tabiak jalan ngak khik kajap taong abih baoh sang dalam hu njauk piah daong jeng hu daong, salah blaoh dahlau harei 30-11-2025.

Tui Mban Tacei ba bruk pakacah tamat THPT tinh Dong Thap, mbang pakacah tamat THPT thun 2025 Dong Thap kuhria mboh dahlau hu labaih 17.700 anek saih tut angan pakacah, hu 39 labik pakacah, ngan haong 786 duk bilik pakacah. Tal tukvak ini, bruk ramik caga piah tame pakacah hu peih ngak njauk bruk, njauk tukvak ba tabiak. Abih di nyu lac bruk khik brei salamat, brei parabha jalan mbak, bruk y te, pandap mbang hacih sa-at, hu caga mac peih ndien di dom labik pakacah.

So Ngak nong saong Moi truong tinh Soc Trang bahrau ba tabiak bruk taong bhat 3 kadai kuan pablei salih pandap mbang Fresh Shop daok dalam Kongti Co phan Raong glang C.P Viet Nam (hu labik di Can tho) kayua harak mbaoh tangin hu bruk karo salamat hacih sa-at pandap mbang abih tukvak brei pandar saong taong bhat 105 trieu dong. Dahlau nan, tinh Soc Trang hu oh njauk hatai di rahra ka bruk medil dom kadai kuan CP Fresh Shop pablei salih ralaow pabui, ralaow menuk tabiak darak pasar oh khik kajap pacang khik hacih sa-at pandap mbang.

Di huyen Cai Be, tinh Tien Giang birau rah tabiak 2 labik glut jaleih taneh praong ngak 3 baoh gilang ndap nda di urang jaleih trun kraong ia. Patuah khat lahik drap ar, oh njauk hagait tal manuac. Urang ngak praong di So Ngak nong – Moi truong tinh Tien Giang hu mai iek kuhria  2 labik glut jaleih nan. Daok 3 baoh gilang nan jaleih trun ia kraong lac padang ngak suan hukum, lih tame jalan ar kraong ia, jalan tabak, karja palei hu pasang iek, mek ngak harak saong iew brei yah klak min dom po gilang nan oh ka ngak.

Jala pandiak harei 12/6, hajan praong pagam tui angin khang ngak papeih pabung 7 baoh sang, labik ngak bruk di rahra dalam ban Bac Lieu. Hadei tuk thau khau tin, karja dom bhum palei hu pandar kapul chuc nang samar drah hu mbaok piah kuhria khat lahik. Gam haong nan, daong rahra hu sang daok khut tayah hu samar drah pasiam bruk ini, samar drah tani tanat raidiuk.

Harei 12 bilan 6, sa sruh ahaok  di gah kapal ahaok Air India pajeng 242 tuai damuai laik trun di ban Ahmedabad, bang Gujarat, An Do biar harei 12 bilan 6. Ahaok  birau par tagok  ye kadun trun saong ginuk tame labik daok hu biak ralo sang danaok bhap bini jaik mblang kapal ahaok, labik nan daok hu ky tuc xa do sa sang bac cao dang y te. Tui khaw tin birau abih lac daok labaih hasa urang diuk. Bala ahaok laik ngak 25 urang daok ala njauk rambuac, rilo urang lac saih bac y khoa. Ini lac sa dalam dom bala jhak abih di An Do dalam jaik dua pluh thun tapa.

Thu tuong Campuchia Hun Hun Manet pathau khan negar ini padeih bruk blei phone saong Internet meng Thai Lan, hadei tuk rah tabiak khau tin ka dom baoh panuac gham kayua dom urang sanak di Thai Lan ba tabiak. Ong Hun Manet ndom meyai lac, kuhria meng kreh melam tapa, taong abih dom gah pabak jitvu Internet saong gah ngak internet cap quang di Campuchia brei padeih blei bang thong Internet meng Thai lan, ngan haong makna lac Campuchia urak ini meda ta-eng pabak jitvu ka drei.

Indonesia birau chap mek ndap pablei dauk hu yaok rituh ribau drei hadang hùm pajaih di mblang kapal ahaok. Tui Cảnh sát mblang kapal ahaok, dom thung hadang pajaih hu buh dalam kadung nhua bak oxi, blaoh buh tame dalam vali. Dom baoh vali nan hu paok gah langiu meng ba-ar carton saong khan bai piah payua tabiak negar langiu. Dom urang nan lac njuak duis ngak suan hukum pasang iek athur, ikan saong phun kayau tui asar kadha di Hukum Cong hoa Indonesia ka 6 thun 2030.