Pambuak tal asal kadha panduan nao veik jabat bahrau, ngak samu harak gar hadei tuk ramik radak jabat karja, dalam taneh ia daok 34 tinh, ban, Dai ta Vũ Văn Tấn – Akaok jabat Canh sat Pasang iek karja ka siam mekre xa hoi (Mentri Kong an) brei thau: “Rahra oh njauk ngak gilac can cuoc cong dan hadei pagam jabat karja, langiu dom bruk tui adat hukum njauk brei ngak gilac”. Kapul chuc nang brei pathau khan du lieu rahra, srap gap pabak salih ka rahra hadei tuk hu sarak bahrau. Jalan ngak brei hu lagaih, oh klaih klaoh. Hadei tuk hu sarak brei pasiam taneh riya karja, khau tin salih brei hu ba tagok angaok ung dung VneID.

Mbang akaok meti hu dom gah bol lin dieu binh di tasik pahadar Harei negar 2/9. Dai tuong Phan Văn Giang, Akok Mentri Quoc hoi khan lac, Pahadar 80 thun CM bilan 8 saong Quoc khanh 2/9, mbang akaok meti hu brei ba bol lin dieu binh di tasik, nan: Bol lin tasik,  Canh sat tasik, Urang khik tasik, Bol lin kapal haok, tasik…Bingun ini jeng lac pahadar 80 thun padang Bo Tong Tham muu Bol lin bhap bini Viet Nam, kayua yau nan ye dom taneh ia ayut sahabat hu mbaok tame dieu binh, dieu hanh, yaom lac oh hu rilo min brei mboh Viet Nam lac taneh ia piah ayut sahabat di dunya ini iek praong saong pok meyaom.

 Di dom sang iek ruak uranaih di Ban raya Ho Chi Minh urak ini hu rilo urang ruak pandiak tabiak darah Dengue trak rah tabiak gam gam. Uranih tane sang iek ruak tuk ruak mek, srau kadau jalan tung pruac, mbuan ngak metai meyah oh daong taong ruak dil samu. Piah pacang cakak taong jit ruak, patakik metai, gah y te Ban raya peih bilan tabung glaong ngak bruk saong pandar dom kapul, ndoan the saong taong abih dalam rahra brei ngak dom bruk pacang caga ruak pandiak tabiak darah dengue. So Y te Ban raya Ho Chi Minh ieu pandar rahra brei ngak dom bruk bhian pacang caga ruak. Tuk mboh pandiak dalam rup, brei nao tal dom jabat y te piah pasang iek ruak saong taong ruak, oh ta-eng taong ruak di sang.

          Akok UB bhap bini tinh Dong Nai birau taong pahat gah alam moi truong ngan haong Kong ty Co phan Patagok do thi kong nghiep ka 2 ( Kong ty D2D) ngan haong jien 710 trieu dong. Kong ty D2D hu ngak suan 5 bruk nan lac: tathuak nerak tabiak alam moi truong min oh hu harak gal gah alam moi truong, Oh ngak tui asar kadha dut iek hareik nerak tathuak tabiak gah langiu 2023; Oh dut iek ia nerak tathuak tabiak thun 2024 tui danak dak kuhria iek, alam moi truong hu mbaoh harak; Oh padang saong payua harak khan brei ka ka khik iek alam moi truong thun 2023. 

Chi cuc Athur bhum VII (Ban raya Can Tho) hu pathau khan payua ka Chi cuc raong glang saong Athur tinh Bac Lieu ka bruk kuhria hu di bruk pasang iek mẫu phủ tạng mek meng tapol pabui 120 drei oh hu harak adat pasang iek ruak. Kuhria brei mboh, dom mẫu jeng hu mboh virus ngak tamuh jit ruak aih caraoh pabui chau Phi saong ruak srau kadau bruk menek, thuak yava di pabui chủng Bắc Mỹ. Dom drei pabui kayua ong Võ Trung Kiên daok di huyen Củ Chi, Ban raya Ho Chi Minh pajeng ba. Gah chuc nang hu am cuh klak taong abih tapol pabui piah pacang caga bruk mbuan pambak jit ruak. Gam haong nan, taong bhat karja saong pandar po pabui brei pagun sanya oh brei rah tabiak veik bruk ini.

Israel daok ngak salih birau mbaok meta dunya tapa bruk mesruh metak taong kalin kan biak khang di Iran. Panuac nan hu Thu tuong Israel Benjamin Netanyahu ba tabiak dalam mbang javap calei Đài Kan melam karoi. Urang ngak praong di Rajaei Israel mboh lac taneh ia ini oh ngak salih karei abih Trung Dong, bo daok ngak salih mbaok meta  dunya. Ong Netanyahu jeng khan lac Israel  cara caga tani tanat ka bruk taong tame Iran, min oh ka thau tuk halei padeih. 

Dom urang ilamo khoa hoc pathau khan ka athak CO₂ tathuak tabiak urak ini daok ngak ka jalan pasang iek pandiak dalam dunya tagok ala 1,5 do C dak harei dak kan ngak hu. Bruk ini samu haong bruk meng akaok thun 2028, bruk pandiak meda tapa tanut brei tabiak lac hu tapa tanut 50%. Tui dom urang ilamo khoa hoc, piah hu 66% kein lagaih khik hu tanut 1,5 do C, meng thun 2025 ba nao, dunya tok brei hu tathuak rilo abih 80 ty tan CO₂ - biar jang 80% dut haong tanut hu brei di thun 2020.

Gah bol lin an  ninh Mexico birau duah mboh jalan kandauk pajeng ba jru phien matuy di kreh ban taphia negar Tijuana tal ban San Diego, bang California di Mỹ. Danak dak atah 600 met saong dalam trun 13,5 met hu duah mboh dalam sa baoh sang. Jalan lubang ala hluk hu dom kol duis pandar pajeng ba matuy saong ba manuac nao negar langiu suan hukum tame My tui jalan negar atah labaih 3.100 km di dua taneh ia.