Tui Mentri Ngak nong saong Patagok palei pala, hadei jaik 5 thun peih ngak Danak dak pala 1 ti phun kayau hijao, dalam negar pala hu labaih 1 gti 439 trieu phun kayau, tapa jaik 44% dut saong bruk ba tabiak, bruk ngak di Danak dak. Dom bhum palei pala phun kayau hu jak jeng siam mekre lac: Phú Thọ, Lào Cai; An Giang; Lạng Sơn; Lâm Đồng; Tây Ninh; Quảng Ngãi; Gia Lai; Nghệ An; Đà Nẵng…Langiu di nan, bruk pala phun glai mek kayau praong, dom bhum palei pala phun mbang baoh, phun kaya  saong dom phun pala dalam medil do thi piah khik brei siam lavang langik, labik daok.

Trung uong  Kapol Dam dara Cong san Ho Chi Minh birau peih ngak danak dak meyaom, alin brei Yai “Halan hatian pakat negar” saong Yai “Dam dara hadah krah” pakat negar. Tapa 233 harak ho so, Hoi dong palih ruah hu 20 kapol urang urang, naih gheih dalam bruk halan hatian thun 2025. Urang daoh angan Hoà Minzy lac urang taduan yai “Halan hatian pakat negar”. Dom uranaih hu meyaom lac dom urang lambaok vakil naih gheih di dam dara Viet Nam, tuk halei jeng halan hatian hu mbaok di dom labik kan kandah, thau sahaneng atah, khang hatai ngak bruk birau.

Tukvak jaik ini, di ban Rarya HCM rah tabiak rilo mbang apui khuah glai, ngak khat lahik  biak trak ka anek manuac saong sang danaok. Tuk jaik Tet, rilo bruk kan tau dahlau. Đại úy Lê Văn Anh, urang jakar Kapol Padam khuah saong Daong urang gaok bala di bhum 7, kong an TPHCM ba tabiak rilo panuac kakei: Yaok bhap bini brei hu ndap nda binh padam apui khuah lagaih caik dalam sang, gai jan, kabat jaong piah daong, tanyiak pacang mbaok meta tuk bala rah tabiak. Brei ngak hu jalan caga piah tabiak tuk hu apui khuah.

Tinh Dong Thap abih bilan hajan, yam tame bilan thu pandiak, mikva urang ngak nong daok sangka labaih 140 ha taneh bein phun mbang baoh, tam drak pajaih yaok pluh hecta njam patam, pala yaok trieu yot bingu that piah pablei tabiak darak pasar Tet thun birau. Ong Võ Văn Thông, Pho Yam ndoc Jabat Khí tượng Thủy văn tỉnh Đồng Tháp kakei: Urak ini, daok hajan min hajan oh ralo, ngan haong rilo phun pala tuk hajan mikva takik pruh ia atau padeih tuh ia.

Rilo baoh sang bhap bini palei  Mai Hoa, xã Tân Tiến, tỉnh Cà Mau daok dalam huac glut jaleih ar tapen tathik daka harei dak trak. Tui pathau khan, hadei  danak dak dirn hangin kuac jalan buh talei cap  ala min oh ka ngak blaoh saong oh ka bayar veik labik, ar tathik labik ini dalam trun taneh biak suai, mbuan ba tal jaleih sang saong kan kandah tal bruk ngak mbang di mikva. Bruk buh jien tame ngak dien lac bruk njuak ngak piah patagok kinh te bhum palei. Yau nan min, bruk padang ngak meyah oh hu salamat saong bayar labik oh njuak tui ba tabiak dahlau meda ngak kan kandah tal bhap bini.

Gah Y te Dunya (WHO) khan lac, ruak la-ar dom ngak metai 610 ribau urang dalam thun 2024, ralo lac uranaih di bhum taneh jaik Sahara châu Phi. Urang dang ngak danak dak ruak la-ar dom di Gah Y te Dunya lac virut pacang jru taong ruak, pacang jru pametai jamoh, langik pandiak tagok saong bruk mesruh metak ba tal bruk pacang caga jit di rilo taneh ia kathaot. Langiu di nan, kuhria taong abih jien daong di dunya ka ruak la-ar dom hu 3ti 900 trieu USD dalam thun 2024, biar jang dut saong jien daong lac 9 ti USD saong oh ka kuhria tal dom jien birau cakak trun di My dalam thun ini.

Sa bala apui khuah di labik pablei salih melam pak bang Goa di Ấn Độ ba tal takik abih 23 urang metai. Goa lac sa bang sit daok jaik ar tathik gah pei, lac labik mai yulit hu rilo urang tuai negar langiu takre abih, hu tapen cuah tathik  saong ceik car siam gheih. Tui yaok kuhria di rajaei An Do, labaih 5,5 trieu tuai damuai mai tal Goa tuai damuai dalam meteh thun ini. Dalam nan, hu 271.000 lac tuai damuai dunya.  

Bilan Giang sinh - Noel thun ini di Bethlehem (di Bờ Tây) daok hu peih ngak yau bhian thun tuk urang Palestin saong tuai damuai di dunya daok tuh mai labik ini peih ngak dom bruk piah pahadar. Tuai damuai bilan 11 lac ralo abih kuhria meng tuk mesruh metak saong dom bilik katuai pah ndih daok No-el kuhria mboh dahlau labaih 70%. Yau nan min, dom tuai damuai  dunya  daok takik saong bruk peih ngak le hoi daok atah dut saong dom thun dahlau rah tabiak kalin kan di dai Gaza./.