Mbang nyaom ka 10, page ini Quoc hoi biai di sa bilik ka jalan buh jien tame ka Danak dak jalan ngak pakat negar ka palei pala bahrau, patrun kathaot karo kajap, patagok kinh te – xa hoi bhum urang bangsa takik saong bhum ceik tal thun 2035. Rilo urang lambaok vakil ndom lac, bruk pataom klau danak dak lac brei njauk ngak samar chip piah pasiam dom bruk oh lagaih; gam haong nan pataom dom gah rik daong ka bhum kathaot, bhum atah bayah, labik hatai caong khin buh jien tame ka ha tang, bruk daok dang mbang ngui saong jitvu njauk hu jeng biak praong. Dom urang lambaok vakil brei ngak cambaih laih dom jalan ngak saong dom baoh sang kathaot rilo gah, dom xa palei pala bahrau, palei pala bahrau hadah krah dalam bruk dom asal kadha tukvak 2026–2030 daok hu padang.

Piah duh ka bruk pablei baoh kayau, njam patam, mbiah tal ini dalam negar brei hu labaih 9.200 ma taka so taneh pala  saong labaih 1.730 ma taka so labik papaok dom janih baoh kayau that yau thanh long, pa-ok, baoh ia tasau, patei, kruac aik oh hu asar, darang, vải, thạch jhuk, durien, bei bhong…pablei tabiak negar langiu…Dom labik papaok pandap di 33 tinh, ban dalam negar. Urak ini Dong Thap hu taneh pala saong papaok kaya rilo abih dalam negar ngan haong 387 labik papaok pablei tabiak negar langiu.

Hajan praong dui atah meng malam 3/12 ngak 1.750 baoh sang njauk dauk dalam, ngak kan kandah trak tal raidiuk rahra. Anak bruk rah tabiak trak saong srau kadau ini, Akaok UB Bhap bini tinh Lam Dong hu brei pandar samar chip, pandar dom po binek, thuy ndien di dalam tinh ngak siam dom asal kadha di bruk ngak danao bineik padang ia, dom danao bineik pambuak padang ia, ngak thuy ndien. Pathau khan dil samu tal dom bhum palei di ala ka jalan kuhria saong tukvak tathuak ia sua di dom danao binek padang ia, bineik kraong ribaong, thuy ndien; khik kajap khau tin hu khan brei thau ginup, njauk saong brei ngak gam gam.

Page harei ini di ar pacang kraong ia di kaoh pulao Thanh Long, tapen kraong Cổ Chiên (di palei Phước Lý Nhì, xã Quới Thiện, tỉnh Vĩnh Long) ngak glut jaleih, ngak talah ar atah labaih 10 met. Ia ndik tagok glong, ia sre tapa ar, ngak dauk biak dalam rilo taneh bein phun pala, danao raong ikan saong sang danaok di bhap bini. Bilan 11 meng blaoh, tinh Vĩnh Long khan brei thau bruk glut jaleih ar pacang pulao Thanh Long tuk ia ndik tagok glong ngak talah 1 met ar binek saong glut jaleih  labaih 225 met, ba tal 15 ha phun mbang baoh saong 6 baoh sang bhap bini.

Hadah page harei ini, apui katuak khuah tagok di sa tadai kuan mbang huak di jalan Trần Hưng Đạo, phuong Cầu Ông Lãnh, Ban raya Ho Chi Minh. Rahra hu pleu tagok saong daong padam apui meng tuk bahrau khuah min oh padam hu. Tukvak rah tabiak hu rilo urang daok gar dalam oh dil samu nduac tabiak. Kapul padam apui hu ieu rilo radaih padam apui, radaih gai lanyal gam haong yaok pluh urang jakar, urang lin mai tal labik apui khuah, peih bruk padam apui khuah. Tal jaik 7 tuk, apui khuah hu padam taong abih, brei mboh hu 4 urang metai saong 2 urang njauk rambuas hu ba nao sang iek ruak. Urak ini jabat karja daok patui veik pasang duah makna saong khat lahik ka drap ar.

Nhật Bản daok uan raok sa bilan la-ar biak la-ar. Jabat Khi tuong Nhat Ban khan lac kayua langik la-ar mai samar oh ka bhian mboh saong dak harei dak la-ar, taong abih dom dom bhum palei gah Barak saong Dong Bac taneh ia ini daok gaok tuyet laik rilo kapal. Rilo bhum palei la-ar trun -0,6 do C. Mbang la-ar mbang ini meda mbuan hangin  gaving, ribuk tuyet, tuyet jaleih kateik, sang danaok, klaok talei dien saong jaleih gang dien…

Kapul thuong nghi si rilo ndang di My hu ba tabiak sa hukum piah pacang cakak bruk taoh talaih ka dom adat hukum piah patakik pandar tri tue nhan tao (AI) di Trung Quoc dalam tukvak 2,5 thun. Dom thuong nghi si brei thau dalam sa panuac khan, bruk oh brei ka Bac Kinh pandar dom anek chip AI siam abih di My lac bruk njauk hu ka an ninh negar di My. Hukum ini hu daong hatai di rilo nghi si rilo ndang di My dalam nan hu dom urang meng ndang Cong hoa di ong Donald Trump.

Rajaei Tay Ban Nha parilo urang ngak piah pasang iek bruk njom mbak jit ruak  pabui chau Phi saong takik brei pabui glai tame daok labaih 1.000 drei. Bruk tamuh jit ruak ngak haduh hatai gah pablei salih rilo pabui tabiak negar Tay Ban Nha, phun jien meblah tal 1 angaok 4 binah rilo pabui di Lien minh chau Au. Adit dahlau, dua drei pabui glai di talei ceik Collserola mboh njom rual pabui chau Phi saong meng nan hu veik 7 drei tra metai kayua virus./.