Hadei tuk taduan dom panuac hatai sahaneng rilo gah, Rajaei ba tabiak bruk patagok tanut jien je oh mek kak jien ngan haong po baoh sang pablei salih meng 200 trieu dong tagok 500 trieu dong sa thun. Tanut 500 trieu dong sa thun ini jeng lac tanut hu ta-eng kaoh kak je dahlau tuk kak je tui ty le jien mek tame. Rajaei jeng pandar pabak adat ngan haong menuac urang, baoh sang pablei salih hu jien mek tame labaih 500 trieu tal 3 ti dong sa thun pandar kuhria jien je tui jien mek tame (langiu di jien buh tabiak di jien mek tame) piah khik kajap mek jien je tui njauk adat hukum di jien je ka jien mek tame saong pandar jien je thuế suất 15%.

Hadei 3 adit ba tame ngak bruk, Sang iek ruak Từ Dũ jabat ka 2 di Cần Giờ tagok meng 2 tal 3 mbang. Tui So Y te TPHCM, bruk ngak Sang iek ruak Từ Dũ jabat ka 2 oh lac pabak tui hatai caong iek ruak anak meta bo daok pamong tal bruk patagok gah y te di ban raya di rilo gah, pambuak rilo khoa – rilo sang iek ruak. Bruk ngak nan daong ba tame ngak bruk hu lagaih, peih praong bruk iek ruak di bhap bini daok atah pasak, njauk ndem tal lac huyen Can Gio.

Hadei tukvak yaom glaong abih tagok tal 240.000 dong 12 baoh, yaom li-u thu hu trun yaom khang. Di tinh Vinh Long, urak ini li-u thu praong tok meng 80.000–100.000 dong 12 baoh. Yaom trun khang kayua akaok tabiak oh lagaih. Langiu di nan, li-u thu daok tame mbang paik baoh, dalam tuk rilo labik saong gah pablei salih patakik bruk pataom blei, patakik pablei li-u pandap tamo. Vinh Long urak ini hu jaik 120.000 ha pala li-u, hu labaih 50% taneh pala li-u di dalam negar.

Urak ini, ia ribuk di tinh Dong Thap trun ralo, ia angaok kraong trun samar. Yau nan ye, urang ngak nong dalam tinh brei kuhria caga pala drak njauk tukvak. Ong Võ Văn Thông, Pho Yam ndoc Jabat dut iek langik tathik tinh Dong Thap khan lac: Piah kuhria caga ka bruk pala drak, abih di nyu lac padai sang njam patam bilan Dong Xuan ini, urang ngak hamu di bhum ia sua brei kuhria ngak pakajap ar pacang, njuk pruh ia, brei beik kajap ar, tam drak padai. Bilan Dong Xuan thun ini, tinh Dong Thap kuhria trun labaih 227.000ha.

Dalam thun ini, dalam tinh An Giang rah tabiak 358 mbang gaok bala di jalan mbak, ngak metai 254 urang, njauk rambuac 156 urang. Dut haong sa tukvak, dom urang metai tagok 47 urang. Makna mai meng dom bruk gaok bala kayua oh maong iek tani tanat; urang peih nduac radaih menyum alak, mbie; nduac suan jalan, lih tapa jalan.

Bruk chreih chrai di SEA Games 33 daok pambak praong grauk ban ine Bangkok tuk negar Thái Lan dang tabiak peih ngak praong prang 10.000 labik daok iek oh mek jien di mblang caoh mbanh pakat negar  Rajamangala di harei 9/12 anak tal. Langiu di nan, Mban ngak bruk piah 1.000 ghaiy daok iek ka urang umo taha saong urang jaoh jo, brei mboh bruk anit ranam saong ramik caga bruk tani tanat. Hu kuhria tani tanat saong taduan raok tuai, Thai Lan daok kham merat ba abih prein ngak ka  SEA Games hu siam mekre, piah caik veik dalam hatai ka urang hu mai mong iek saong urang takre dalam dom taneh ia jaik taphia.

Akaok Mentri An ninh Dalam negar My, amuk Kristi Noem daok ba tabiak bruk brei pakauk nao mai ngan haong dom negar hu thau lac daok ba rahra rame My ngak kan kandah ka negar My. Tui dom khau tin di triuen thong My, bruk pakauk nao mai kayua amuk Noem ba tabiak lac brei pandar ka labaih 30 negar saong harak angan ini meda hu peih praong. Dahlau nan, Tong thong Donald Trump hu ba tabiak bruk pakauk rahra meng 7 negar panduan tame My.

Dom urang ilamo Cuba daok kham merat khik ramik veik dom drei ikan baya - cá sấu hỏa tiễn di danao Zapata di taneh ia ini. Janih ikan ini atah, lapih ngan haong cambuac tagei klik hanuk hu Lien minh Khik ramik Thien nhien Dunya ( IUCN) ba tame sarak angan mbuan lahik di thun 2020. Yau nan min, dom janih ikan nan daok biak takik kayua bruk taong mek ban glai ban glo, oh hu labik daok pandauk lagaih saong ikan kan Chau Phi meblak tame, ini lac janih ikan mbang ikan karei biak sahanak hu mboh di labik ini meng thun 1999./.