Balai Kuhria hajan ia sua (Mentri Ngak nong saong Alam langik) taduan hu bruk praong abih di ia sua, ia sua dalam thun ini tuk hu 20 kraong ia rah tabiak ia sua praong abih. Kuhria dom harei anak tal, Bien Dong brei raok ribuk ka 16. Hajan praong kayua mbuak haong mbang ribuk, ap thap nhiet doi, langik la-an ngak ka bruk ia sua trak rah tabiak di rilo labik, ngan haong ia sua glaong abih di dom kraong tapa tanut sajarah di gah Barak negar, Kreh negar, cao nguyen Kreh negar, bhum taneran kraong Cuu Long. Pabak tal akaok bilan 12, bala ngak khat lahik trak tuk hu 419 urang metai saong lahik; khat lahik kayua bala ngak tabiak kuhria labaih 97.000 ti dong.

Meng ini tal thun 2027, tinh Ca Mau kuhria caik tabiak jaik 580 ti dong piah daong bruk ngak mbang labaih 11.000 baoh sang kathaot, jaik kathaot, baoh sang sarak karja saong urang bangsa takik. Ca Mau kuhria daong brei “gai vah” piah dom baoh sang hu lagaih ngak mbang yam tagok dalam raidiuk, kinh te khang kajap, oh lac piah daong  phun jien ka urang kathaot. Yau nan ye tinh padang danak dak ini jeng 5 nyaom baoh sang khin daong karei di gauk. Urak ini Cà Mau hu 11.245 baoh sang dalam sarak daong.

Rilo danao raong ikan di tinh Dong Thap daok tame mbang yuak piah pabak pandap tamo ka dom gah ngak mbang pablei salih ngak ndap nda pablei tabiak langiu negar. Urak ini ikan pra pablei di danao meng 30 tal 32 ribau daong sa kilo, tagok labaih 10% dut haong tukvak ini thun dahlau. Ngan haong yaom tani tanat yau urak ini, yaok kilo ikan pra rahra hu laba jaik 10 ribau dong. Tinh Dong Thap khik tani tanat taneh danao raong ikan pra labaih 2.500 ha, rik daong labaih 35% ikan pra di dalam negar. Tinh Dong Thap ba tabiak jalan patagok gah ndap nda ikan pra tui jalan karo kajap ka gah ikan kuhria hu labaih 555.000 tan sa thun.(VOV)

Adit Yulit 2025 daok peih ngak di TPHCM. Ini lac mbang akaok meti, tuai damuai ba drei tame ma-in chreih chrai meng pasak meng 168 phuong, xa saong dac khu dalam ban raya. Bruk nan pamong tal thaok binguk sa Ban raya HCM birau sami samar, hu rilo ilamo siam gheih; gam haong nan ba mbuan lagaih ka bhap bini saong tuai damuai hu blei dom kaya ndap nda, jitvu saong danak dak tour oh labik halei hu, tapa nan pachreih bruk yulit khang kajap saong pakhang bruk pambuak bhap bini.

Harei raya Ilamo Kraong ia Can Tho 2025 ngan haong kadha “Can Tho – Sambo bar kraong ia” brei rah tabiak di dom harei puac bilan 12 ini. Harei raya hu caong khin oh lac ba mai bruk bui sambai di puac thun bo daok brei mboh veik bruk bui sambai di raidiuk angaok kraong. Tapa danak dak, Can Tho caong khin yaih khan tal tuai damuai dalam saong langiu negar ka ilamo karei di bhum taneh taneran, meng bruk di angaok kraong ia, kaya mbang bhap bini tal bruk seni nghe thuat ba tui sambo bar di bhum taneh. Ini jeng lac kein lagaih piah pambak tabiak bruk patagok jirah rivang karo kajap, pacang khik he sinh thai, khik ramik thaik thaot labik hijao – hacih - gheh ghang.

Tong thong Han Quoc birau ini brei mboh bruk ginum biai ka Mỹ brei adat ka Han Quoc blei menyek tui harak pambuak bruk hat nhan di dua negar, lac “ bruk jak jeng siam mekre”, daong brei mboh bruk ngak po khik iek caga taneh ia. Panuac nan hu ba tabiak dalam tuk Han Quoc daok iek kapal gilai ala ia hat nhan lac bruk piah caga meriak haong Trieu Tien,  abih di nyu lac ten lua đạn đạo cuh meng kapal gilai ala ia. Bruk nan kuhria brei ka salamat di chau A saong mbuan ba tal meriak gauk ngak tabiak phao karaong ala ia.

Tong thong Donald Trump daok tagok jalan ngak peih tabiak harak angan dom negar njauk pakauk panduan tame, meng 19 urak ini tagok tal 30 negar. Dahlau nan, harei 2/12, My anak meta brei padeih pasang iek mbaoh tangin ka harak gar likau panduan mai daok ngan haong rahra di 19 negar daok njauk bruk patakik nao mai. Tui So Daok pandaok saong Panduan tame negar My, labaih 1,4 trieu harak gar likau panduan mai daok cang langyah meda ciuk kan kandah meng bruk anak meta brei padeih bahrau ini.

Indonesia khan ka bruk ngak tabiak saong pabak kaya mbang ngan haong dom janih suai lavik yau brah saong tangei di harei 31 bilan 12 ini njauk bruk ba tabiak di taneh ia. Akok Mentri Ngak nong khan lac, bruk ngak tabiak saong pabak kaya mbang mai meng kaya ngak tabiak parilo tagok saong bruk pabak dak harei dak tani tanat, khik ginup padai brah di Indonesia hu labik dang kajap saong khik hu siam. Padai brah, Indonesia jeng ba tabiak bruk hu makna piah pambak praong bruk raong glang tui baoh sang.