Thu tuong Rajaei pandar dom tinh di bhum Kreh negar pathau khan tukvak ngak, ngak jeng meng bruk “Danak dak Quang Trung” padang, pasiam sang daok ka Rahra hadei ribuk ia sua. Dalam harak gal Thu tuong pandar UB Bhap bini dom tinh pathau khan Thu tuong ka jalan ngak dahlau harei 05/12/2025, dalam nan brei mboh cambaih laih: Dom baoh sang njauk padang, pasiam bahrau, njauk tukvak, jalan ba tabiak kuhria hu salah blaoh… Gam haong nan brei ka sa jabat karja pan bruk pasang iek, kuhria taong abih, pabak bruk ngak hu yaok harei, tukvak ngak saong pathau khan Thu tuong bruk ngak hu di “Danak dak” dahlau 15 tukvak harei Suk yaok adit, dalam nan brei thau cambaih laih: ka yaok baoh sang hu padang saong tukvak ngak bruk…

So Noi vu TPHCM caong khin doanh nghiep samar brei thau bruk bayar jien bilan, jien alin Tet thun 2026 saong khan brei thau tantu jien bilan thun 2025 dahlau harei 20 bilan 12. Dalam harak pathau khan brei hu taong abih dom khaw tin jien bilan, jien alin, dom jien daong yau alin pandap Tet, daong harak jien radaih, radaih pui nao pablei..tukvak padeih Tet, padeih tui adat hukum saong tukvak bayar jien bilan brei cambaic laic, ginup piah urang ngak hu thau. Bruk nan piah khik  brei urang ngak hu tani tanat tuk puac thun.

UB Bhap bini tinh Dong Nai bahrau peih Nyaom biai pok meyaom urang naih gheih dalam mikva urang bangsa takik tukvak 2023-2025. Ini lac bingun pok meyaom dom kapul, menuac urang naih gheih hu rilo rik daong dalam bruk padang saong patagok bhap bini, tapa nan brei mboh bruk hu makna di bhap bini bangsa takik dalam bruk patagok di tinh. Amuk Nguyễn Thị Hoàng, Phaok Akaok UB Bhap bini tinh Dong Nai pandar jhul khang bruk pathau khan, pambak tabiak dom bruk siam gheih meng dom urang naih gheih; dil samu pok meyaom, daong prein mikva dom bangsa patagok prein di drei, hatai ta-eng ngak, kham merat uak drei tagok dalam patagok kinh te – xa hoi.

UBND tinh Gia Lai birau ba tabiak Hukum padang ngak danak dak ngan haong 8 danak dak padang labik daok saong sa jalan pablak tame  piah brei ka bhap bini daok di dom bhum rah tabiak bala biak trak di bhum gah ia harei tagok di tinh. Kuhria abih tih jien buh tame ngak labaih 178 ti dong, meng kadung jien Karja saong dom phun jien karei njauk hukum. Dom danak dak  brei peih ngak  dalam vaktu 2025 - 2026, piah khik hu tani tanat rai diuk saong bruk ngak mbang pala drak  ka bhap bini bhum gaok ribuk ia sua.

Meng hu mbaok tame bruk rik daong meng bhap bini pambuak ngak bruk saong pablei padai asar siam, labaih 60 urang ngak nong di xa Long Bình, tinh Dong Thap hu gah ngak mbang pablei salih blei taong abih haong yaom glaong jang yaom di darak pasar. Tukvak anak tal gah chuc nang brei peih praong bruk pala padai pambuak dom xa, gah ngak mbang pablei salih haong dom bhum palei karei piah dak harei dak ngak jeng majam pambuak dalam pabak meng ndap nda kaya, tal akaok pablei tabiak di kaya ngak nong, daong urang ngak nong tani tanat kinh te.

Rajaei saong bhap ini di dom bhum palei di Indonesia kakei ka bruk ngak pahala daok daka harei dak trun samar, tuk dom jalan dhuan tame tabiak daong gaok kan kandah, ba tal yaok pluh palei oh taduan hu pandap daong. Dalam 10 harei tapa, 2 mbang ribuk tuh tame ba theik nao saong glut jaleih taneh di Sumatra ba tal 770 urang metai, labaih 531.600 urang brei panduan ba nao labik karei saong 463 labik. Dom bhum palei khan brei thau chip ka bruk bala dalam negar piah jak ba saong daong dunya, rajaei pakat negar  khan lac bruk nan oh ka ngak urak ini.

Di Hàng Châu, sa dalam dom pasak ilamo kong nghe di Trung Quoc, karja hu ngak iek jalan langyah pandar robot piah daong bruk palagaih jalan mbak. Hu caga caik camrea saong cảm biến độ phân giải glaong, canh sat jalan mbak robot meda hu cuak gilac dom bruk ngak suan rah tabiak rilo tui yaok tukvak. Ndap nda jeng hu pandar majam sap ndom hadah krah piah kakei ka urang peih nduac jalan mbak ngak njauk adat hukum. Ini lac banah dalam tukvak ngak iek saong canh sat jalan mbak robot kuhria brei patui veik hu paglaong pakat dalam tukvak anak tal.

Hoi dong chau Au khan brei thau bruk ginum biai haong Nghi vien chau Au ka jalan padeih abih bruk blei khi cuk meng Nga di thun 2027. Tui bruk ginum biai, Lien minh chau Au brei pakauk tui tukvak dalam hukum ba tabiak haong Nga, dalam nan pakauk pablei khi ia meng puac thun 2026 saong pakauk klaoh bruk blei khi cuk ba tui brong khi meng thun 2027. Urak ini, khi cuk meng Nga daok labaih 12% kuhria taong abih  khi cuk Lien minh chau Au blei tame./.