Mbang pakacah THPT thun 2025 peih tabiak di harei 26 saong harei 27 bilan 6 anak tal. Mbang pakacah thun ini peih tabiak dalam tuk dalam negar daok dak ramik, padang bruk ngak dom pakat chinh tri, ramik veik jabat karja ye dom gah peih bruk pakacah jeng hu ramik pasiam jang dut saong dom thun dahlau. Pagap yau, Mentri Pato megru  brei pambuak haong mentri dom gah brei ramik caga meng dahlau, hu yau nan tal tukvak ini, bruk ramik caga ka mbang pakacah di dom bhum palei hu blaoh blai, tani tanat njauk tui bruk ba tabiak.

Nyaom darak pasar Dunya Tinh Bien – An Giang thun 2025 birau hu peih ngak di melam harei 10/5 di xã Tịnh Biên. Darak praong hu labaih 330 labik pablei ndap nda di 15 tinh, ban dalam saong langiu negar. Nyaom darak pasar daong dom doanh nghiep, HTX, labik ngak tabiak ndap nda tinh An Giang saong dom tinh, ban karei peih praong darak pasar pablei kaya kan. Ini lac bingun piah dom bhum palei mai pataom mbaok, ngak mbang kinh te, pambuak bruk ngak mbang patagok, rik tame paglong prein ngak tabiak ndap nda - pablei salih jeng yau prein meriak gauk  dalam bruk ngak mbang pablei salih haong dom taneh ia karei di dunya.

Di Muyim My thuat Ban raya HCM daok parang iek kadha “Dak dalikan hadei harei tame hasa baoh negar” ngan haong 105 kadha nghe thuat. Parang iek mong veik dom bruk daok hadar kanal saong sahaneng ka bruk rah tabiak hadei thun 1975, lac bruk praong di tuk pahadar 50 thun Harei Peih paha gah Meraong negar, yasa taneh ia saong 135 thun Harei menek Chu tich Ho Chi Minh. Dom kadha brei mboh veik bruk rah tabiak di jaman mesruh metak saong salamat hadei di nan. Tui nan, brei mboh bruk mesruh  metak jeng yau caong khin hu sron mbon salamat.

Hoi dong doi Trung uong pambuak haong tinh Dak Lak birau peih Harei pataom mbaok “ Phu trach naih joi” dom Pasak ngak bruk Dam dara uranaih  di gah Meraong negar. Danak dak  hu meyaom 55 urang ngak bruk uranaih naih gheih  di dom tinh gah Meraong negar. Ngan haong kadha “ Dak Lak taduan raok ayut grauk bhum palei”, harei nyaom pataom  mbang ini hu peih ngak ralo bruk sambai piah bac megru ka dom adei…Ini daok lac lagaih ka dom urang ngak bruk uranaih brei mboh hatung hatai khang kadang saong anit ranam takre bruk ngak pato pakai dam dara uranaih.

Tatua Rạch Miễu 2 pambuak dua tinh Tien Giang saong Ben Tre kuhria jien buh tame  ngak 6.810 ti dong daok peih ngak sami samar piah sumu ba tame pandar njauk tame harei Negar- harei 2 bilan 9 anak tal. Urak ini danak dak nan hu dom gah tui ngak parabha 30 bruk, pataom labaih 150 mac moc jamraih peih ngak; 500 urang ngak saong yaok rituh  urang jakar, parabha gauk ngak bruk gam harei gam melam. Tui taong yaom, Danak dak ini ngak samar, tatua khang kajap yau bruk tacei ba di Thu tuong Rajaei. 

Tong thong My Donald Trump hu iew phone ginum biai haong Tong thong Nga Vladimir Putin. Tavak tagok mang xa hoi Truth Social hadei tuk ndem biai tamat blaoh, Tong thong Trump khan lac, ong birau ndem meyai haong Tong thong Nga Putin abih 2 mon saong jia lac yaok bruk rah tabiak dalam siam mekre. Nga saong Ukraine biai ka bruk anak tal padeih patuh phao saong makna praong lac padeih mesruh metak.

Dalam tuk nyaom biai di Istanbul oh yau hatai caong takre dalam bruk langyah mesruh gauk di Nga - Ukraine, Tòa thánh Vatican khan lac brei ngak manuac dang kreh saong lac labik peih bruk taom mbaok di dua gah piah samar ngak brei sron mbon, salamat. Giáo hoàng Leo XIV, urang hu palih ruah di adit dahlau, brei thau lac samar ngak brei salamat di Ukraina lac bruk njauk brei ngak dahlau.

Hajan praong di dua tinh Quảng Đông saong Quảng Tây di Trung Quoc dalam puac adit tapa ngak ka 5 urang metai saong dom urang karei lahik. Dalam tuk nan, karja hu pathau khan rilo mbang ka hajan praong, ia angaok ceik sua trun jeng yau glut jaleih taneh. Dalam tuk nan di dom tinh gah Barak Trung Quoc jaik tame  bilan pandiak catang di ralo labik pandiak tagok tal 400C atau glong jang. Dom labik  yau Hà Bắc, Hà Nam saong Thiểm Tây hu kuhria mboh dahlau pandiak meng 37 tal 390C di dom labik meda yam tapa 40 0C./.