Mentri Ngak nong saong Alam langik hu pandar Cuc Raong glang saong Thu y payua harak piah ka Mentri Kong an pasang iek, langyah dom khau tin oh njauk di angaok mang xa hoi ka baoh menuk ada ja. Tukvak jaik ini, dom blah fanpage mang xa hoi ba tagok khau tin oh njauk ka “baoh menuk ada ja”, “baoh menuk hu dua anek”. Bruk ini ngak duh hatai ka rilo urang blei pandar saong ngak kanjah jhak tal bruk ngak mbang, pablei salih baoh menuk ada dalam negar. Tui ong Nguyễn Thanh Sơn, akaok Kapul Menuk ada Viet Nam, piah ngak tabiak baoh menuk ja, jien buh tabiak daok chiat jang haong baoh menuk ada biak pablei di darak pasar.

Mentri Padang ngak hu mbaoh Sarak Mbaoh tangin Quy hoach cambaic laic patagok bhum taneh, bhum ia pabah tasik Sóc Trăng vaktu 2021-2030, pamong tal thun 2050. Tui Quy hoach, dom pabah tasik Soc Trang meda hu dom labik mblang pabah tasik praong yau Kế Sách, Đại Ngãi, Trần Đề saong dom tapen phao, labik pataok gilai, labik  pajeng ba saong labik plaik njiak ribuk. Quy hoach pamong tal thun 2030, ndap nda tapa pabah tasik hu labaih meng 30 tal labaih 41 trieu tan. Tuai damuai tapa pabah tasik kuhria hu labaih 500 ribau mbang.

Ngak bruk ramik jabat karja pakat xa, dom bhum palei di Ban raya Ho Chi Minh brei mek panuac ndom di cu tri ka bruk salih angan 4.861 khu pho, ap. Asal kadha mek panuac ndom di cu tri hu: Bruk salih taong abih angan khu pho, ap kayua UB Bhap bini Ban Thủ Đức, 5 huyen, 16 quan padang; hu ba tagok labik khau tin ndien tu atau blah web khau tin ndien tu di dom bhum palei; mbat tauk ba-ar di jabat UB Bhap bini pakat xa, dom labik daok dang me-in di bhap bini saong hu pathau khan, pambak tal rahra di khu pho, palei.

Klau anek saih njom ruak COVID19 di Ba Ria - Vung Tau hu siam veik, tinh jeng oh ka mboh urang halei njom ruak ini veik. Dahlau di nan, tapa bruk pasang iek jit ruak di phuong Long Tam, Ban Ba Ria, gah chuc nang mboh hu 3 anek saih rauh la-ar, pandiak dut iek mboh ruak COVID-19 di sang. Piah pakhang bruk pacang caga jit ruak, So Y te Ba Ria - Vung Tau tacei ngak bruk tui iek tani tanat jit ruak, tui nan paglong dom bruk pasang iek jit ruak.

Rahra tinh Tra Vinh daok mek hu kein laba glaong meng bruk raong aring tasik. Kuhria meng akaok thun tal ini, yaom aring janih 2 drei/kg hu yaom 400.000 dong/kg. 3 thun jaik ini, taneh raong aring tasik dalam tinh Tra Vinh meng 1-3 bilan/thun mek hu labaih 23.000 ha, taong abih aring tasik mek hu kuhria rah tapa labaih 6.500 tan/thun.

Sa labik praong di Australia daok dang anak bruk ia ribuk dauk biak trak kayua hajan praong dui atah rilo harei. Urak ini, 5 urang metai saong lahik dalam tuk nan hu yaok pluh ribau urang ia cakak oh nao mai hu, ia daoh tagok veik. Di bang New South Wales,  abaih 50 ribau urang daok gal tavak tuk ia di labik ini tagok glong kayua hajan oh padeih.

Dalam dom harei tapa di Gaza hu 29 uranaih saong urang taha metai kayua eik lipa, dalam tuk nan hu mbang pajeng ndap nda jeng oh ka ba tame Gaza. Urang Ndom meyai di Jabat Dui ba dom asal kadha siam mekre Lien Hop Quoc ndom lac, bruk takik radaih tai daong pajeng lac “panuac da-a pametai urang” kayua mbuan rah tabiak paoh blah saong taong tame. Israel pacang cakak bruk daong tame Gaza meng akaok bilan 3/2025 saong tok brei ka dom bruk daong takik dalam adit ini.

Akaok mentri Y te cong cong Thai Lan Somsak Thepsutin birau ini ba tabiak caong khin urang pandar can sa di negar ini brei hu harak adat y te piah khik bruk can sa njauk brei pandar la bruk y te. Langiu di nan, hukum adat nan jeng hu ndem cambaic laic  ka bruk brei pandar can sa dalam sa bilan. Ini lac peih tabiak bruk hu makna praong pambuak tal dom hukum khik iek gah kong nghiep can sa di Thai Lan./.