Amuk Nguyễn Thị Hai, daok di xã Dân Thành Long Hòa, ban sit Duyên Hải, tỉnh Trà Vinh brei thau, meng akaok bilan 7/2024 tal urak ini, dalam sang kuac mek 0,5 ha danao raong arieng tasik tui jalan raong pambuak haong hadom janih kaya karei, yau ye ikan, hadang su, hadang the takai putih… Dom arieng pajaih hu sang amuk palao raong jaik 6.000 drei, tui kuhria kuac mek arieng ralaow dalam mbang camriep ini labaih 0,8 tấn.

Tui amuk Nguyễn Thị Hai, arieng tasik raong meng tuk daok lac drei pajaih tal tuk mek pablei abih labaih 4 bilan. Mayah arieng tasik raong tui jalan chuyên canh meda raong hu 3 mbang dalam thun, daok raong tui jalan quảng canh njauk palao raong 2 mbang sa thun. Min, kein laba di bruk raong arieng tasik tui jalan quảng canh lac jien blei pandap mbang ka arieng biak takik, mbuan kuac mek piah pilih ruah dom drei arieng praong pablei hu yaom, oh kuac mek pablei sa mbang haong gauk.

Ong Nguyễn Văn Ngôn, daok di xã Long Hòa, huyện Châu Thành, tỉnh Trà Vinh bahrau kuac mek 2.000 m2 mbaok ia raong arieng tasik, tui kuhria dom arieng kuac mek hu labaih 300 kg. Yaom arieng ralaow hu ong Ngôn pablei ka urang kak kaiy di danao tui janih yau arieng ralaow saong arieng gạch janih I (meng 1 – 2 drei sa kg) yaom 400.000 đồng/kg, arieng ralaow janih II (3 drei/kg) yaom 180.000 – 200.000 đồng/kg, arieng janih III (meng 4 – 5 drei/kg) yaom 150.000 đồng/kg.

Ong Nguyễn Văn Ngôn brei thau, rilo thun ini mai, arieng tasik jeng janih raong praong di rilo urang ngak nong oh hu taneh piah raong hadang thâm canh pandar kong nghe glaong. Bruk salih meng raong hadang bán thâm canh tapa raong arieng tasik brei jien mek tame biak glaong kayua aireng ralaow hu darak pasa blei tame biak rilo, gam gah pablei tabiak negar langiu, yaom arieng tuk halei jeng tani tanat di tanut meng 200.000 – 250.000 đồng/kg. Thun ini, yaom lac akaok vu raong arieng gaok kan kandah ka ia mbak di mangaok kraong tagok glaong, bruk palao arieng pajaih suai jang jaik 2 bilan dut saong dom thun dahlau, min jaik abih urang raong arieng jeng mek hu rilo arieng saong jien laba.

Tui So Ngak nong saong patagok palei pala tỉnh Trà Vinh, meng akaok thun tal ini, urang ngak nong di dom bhum tapen tasik di tỉnh hu palao raong jaik 118 triệu drei arieng tasik pajaih, di mangaok mblang taneh praong jaik 20.000 ha, mek hu labaih 86% bruk ba tabiak di thun. Arieng tasik vu camriep dalam thun tal urak ini kuac mek hu labaih 3.360 tấn. Tui bruk ba tabiak, thun ini tỉnh Trà Vinh pachreih urang ngak nong khik kajap mblang taneh raong arieng tasik 23.000 ha, abih tih arieng tasik raong mek hu labaih 6.500 tấn./.