Harei 25/4/2024, Sang iek ruak Da khoa Pakat nagar Can Tho ngak jak jeng mbang pagam baoh ratak akaok meti di bhum taneran kraong Cuu Long. Bruk ini oh lac ba Sang iek ruak jeng sa pasak pagam tạng mbang ka 26 di taneh ia, bo daok lac labik piah daong ka yaok ribau urang ruak baoh ratak tukvak puac di gah Pai negar. Kayua baoh sang kan kandah, urang ruak hu doang jien taong ruak labaih 200 trieu dong saong jien taong ruak noi khoa 1 thun piah daong ka urang ruak dalam bruk mai pasang iek ruak gilac hadei tuk pagam baoh ratak.

Bruk ini tok lac 1 dalam 7.000 urang ruak njauk daong samar chip, urang ruak baoh sang kan kandah hu Kadung jien daong urang ruak kathaot di Sang iek ruak Da khoa Pakat nagar Can Tho daong dalam jaik 7 thun tapakuhria meng tuk padang di thun 2018, ngan haong bruk daong di dom urang ngak pahla, taong abih jien labaih 30 ty dong. Sa-ai Dương Hồ Trung, daok di tinh Ca Mau hu daong jien taong ruak ka urang dalam sang ndom meyai lac:

“Amaik dahlak hulin mebuh jaoh takai meng hu bilik ngak bruk rahra di Sang iek ruak Da khoa Pakat nagar daong 15 trieu 300 ribau piah hu jien buh tabiak ka bruk pasiam takai. Urak ini prein yava di amaik dahlak hulin dak harei dak hu siam, dahlak hulin biak thau dhar phol biak rilo.”

Langiu di bruk daong jien ka urang ruak kan kandah, Sang iek ruak Da khoa Pakat nagar Can Tho daok daong ka sang iek ruak karei dalam bruk patakik urang ruak. Dalam 20 thun padang – saong patagok, Sang iek ruak Da khoa Pakat nagar Can Tho mek hu rilo jak jeng naih gheih, ba asar siam y te, sangka prein yava rahra dalam bhum samu haong Dong Nam A saong dunya. Meng thun 2017 tal ini sang iek ruak hu padang Pasak gah Hatai baoh hu ngak tani tanat, bahrau saong tantu cambaih laih abih di Bhum taneran kraong Cuu Long; Pasak Barah lukar Chan thuong chinh hinh; gah dang darah Dot quy. Oh ka ginup 3 thun hadei tuk padang tabiak, khoa hu mboh tangin brei tanut Bach kim di Kapul Dot quy Dunya. Abih di nyu nan ieu lac, 1 thun hadei peih bruk pagam baoh ratak, tal ini sang iek ruak jeng hu pagam jak jeng hu 10 urang.

Langiu di bruk gam buh jien tame blei trang thiet bi bahrau, Sang iek ruak Da khoa Pakat nagar Can Tho patui veik lac sa labik pambak hatai ka rahra kan kandah, plaih di bruk duh hatai ka jien taong ruak meng bruk padang Kadung jien daong pasang iek saong taong ruak. BS.CKII Phạm Thanh Phong – Phaok Yam ndok Ben vien Da khoa Trung uong Can Tho brei thau, tukvak anak tal sang iek ruak brei jhul khang danak dak klah rabha anit ranam ka rilo urang baoh sang kan kandah:

“Piah klah rabha dom kan kandah di urang ruak jeng ye urang dalam sang di urang ruak dalam rilo thun tapa Sang iek ruak Da khoa Pakat nagar Can Tho tuk halei jeng hu sa danak dak Klah rabha anit ranam. Ini lac bruk hu yaom glaong, ndung bak anit ranam. Yaom lac drap ar jien padai oh rilo, min dalam bruk kan kandah, yaok sa bruk klah rabha, rilo meng lac klah rabha ka hatai ye daong ka urang ruak saong urang dalam sang kham merat truh tapa piah taong ruak biak siam abih, piah samar drah abih ruak gilac mai sang.”

Yam tame jaman bahrau, jaman pok drei patagok di taneh ia, Sang iek ruak Da khoa Trung uong pakat nagar di Can Tho ba tabiak jalan kuhria lac oh padeih salih bahrau, patagok, ngak habar piah ba mai dom meyit meyao y te tani tanat, bahrau abih, piah rahra gah Pei negar oh daok nao atah bo jeng daok hu taong ruak meng dom bruk naih gheih di y hoc di bhum palei. Gam haong nan, ieu veik rilo dom gah ngak pah hala rik daong tame dom kadung jien ngak pahla piah njauk ngak labik pambak ka rahra bhum taneran kraong Cuu Long./.