T’coóh Phạm Ngọc Hiếu, Chi cục trưởng Chi cục thú y tỉnh Kon Tum đoọng năl: ngành thú y vel đông ơy choom zâl t’bil lơi pr’lúh ha tụ boóp tr’ploóc chr’coóp cóh t’rí c’roóc t’mêê dưr váih đhị chr’hoong Tu Mơ Rông. Pr’lúh dưr váih cóh t’rí c’roóc nắc vêy ngành thú y tỉnh Kon Tum bơơn lêy cóh t’ngay 22 c’xêê 4, cóh cr’noon Tu Thó, chr’val Tê Xăng, chr’hoong Tu Mơ Rông, lâng lấh 30 p’nong bh’năn. Xang bêl bơơn lêy pr’lúh, ngành thú y lâng chính quyền vel đông t’bhlâng lướt p’too pa choom apêê pr’loọng đông băn t’bil vi trùng, t’bil độc cóh c’rol băn lâng pa dứah đợ bh’năn crêê pr’lúh. Tước nâu cơy vêy 29 p’nong t’rí, c’roóc vêy ta pa dứah loon đơớh lâng doỌ dzợ vêy bh’năn hân đoo crêê pr’lúh. Ting cơnh t’coóh Phạm Ngọc Hiếu, râu choom k’rang lêy nắc la lay cơnh lâng pr’lúh ha tụ boóp tr’ploóc chr’coóp tuýp O l’lăm ahay, xang bêl xét nghiệm pr’lúh n’nâu nắc bơơn lêy g’lúh tr’nơớp vi rút tuýp A dưr váih. Đoọng g’đéch pr’lúh dưr trơơi boọ bấc ooy, đh’rứah lâng bh’rợ tiêm vắc xin tuýp A đoọng ha bh’năn đoọng zâl g’ving pr’lúh, UBND tỉnh Kon Tum công xay moon pr’lúh ha tụ boóp tr’ploóc chr’coÓp cóh bh’năn băn.