Chr’ol âng đồng hồ tươc ooy pazêng giây x’rịa âng c’moo 2025. Coh cr’chăl tr’xăl bhlưa c’moo ty lâng c’moo t’mêê 2026, pazêng ahêê năc vêy đợ rau r’rơơm t’mêê, rơơm kiêng pazêng rau têêm ngăn, pr’đoọng pr’đhooi,  pr’loọng đong k’bhộ ngăn, bhươl cr’noon bhui har lâh mơ

Zập c’moo ơy lâh năc zêng đơc lơi coh loom hêê đợ xa nay bh’rợ căh choom ha vil. C’moo 2025 năc muy c’moo vêy bâc rau dưr vaih. Bha lang k’tiêc vêy đợ tr’xăl ga măc pa bhlâng, bâc xa nay bh’rợ dưr vaih đơơh lâng pr’hậc. Coh k’tiêc k’ruung Việt Nam ahêê công tươc ooy muy cr’chăl t’mêê, lâng rau t’bhlâng k’rơ pa bhlâng, cr’noọ xa nay t’bhlâng, tr’xăl t’mêê, mâng loom tươc ooy cr’chăl pa dưr t’mêê âng k’tiêc k’ruung.

C’moo 2025 đhí boo, tuh bhlong dưr vaih k’rơ pa bhlâng căh bool vêy, hr’lang hr’câh lâng tuh pr’hậc dưr vaih coh bâc zr’lụ lâng đhr’năng dưr vaih bâc lâng đơơh lâh mơ lâng bêl l’lăm ahay. Xa nul pr’toh chr’va chr’đhô coh da ding k’coong, k’tiêc hooi tơợ da ding k’coong dal dưr vaih cơnh đác tuh hooi tơợ tran chăng, p’loọng đong xang, ruộng bhươn, ha rêê đhuốch bhrợ t’bil rau têêm ngăn coh pr’ăt tr’mông âng k’r’bhâu pr’loọng đong. Tơợ pazêng bhươl cr’noon da ding k’coong n’đăh Bắc tước ooy crâng k’coong k’noong k’tiếc miền Trung, Tây Nguyên, đhanuôr năc dưr ăt lâng đhr’năng căh liêm crêê âng đhí boo, tuh bhlong, hr’lang hr’câh k’tiêc. Pazêng g’luh hr’lang hr’câh k’tiêc dưr vaih pr’hậc, k’rơ năc bhrợ t’vaih rau k’ăy loom, k’pân coh đhanuôr.