Coh 80 c’moo ahay, đhị rau k’đhơợng xay âng Đảng, k’tiêc k’ruung gung dưr pa chô độc lập, bhrợ t’vaih cr’chăl t’mêê - cr’chăl âng tự do, bhui har lâng k’bhộ ngăn. Tơợ đêêc tước nâu cơy, Tết Độc lập năc căh muy t’ngay bhiệc bhan ga măc âng k’tiêc k’ruung, ting n’năc năc bêl đoong đhanuôr pazêng acoon coh prang k’tiêc k’ruung đh’rưah ăt zazum, bhui har bhiệc bhan, pa gơi cr’noọ cr’niêng ooy pr’ăt tr’mông ha y chroo liêm pr’hay lâh mơ.

Coh t’ruih bêl đâu lâng pr’đớc “Đhanuôr pazêng acoon coh bhui har Tết Độc lập”, ahêê đh’rưah đương xơợng pazêng rau pr’hát xa nul bhui har, pazêng xa nay xay truih rau tr’xăl âng bhươl cr’noon, lâng rau mâng loom âng đhanuôr acoon coh lâng Đảng, lâng Ava Hồ chăp dêr. Pazêng rau đêêc năc k’rong t’vaih hân noo c’loọt bhui har pa bhlâng, ghít xa nay đoàn kết, đoọng pazêng ahêê năc bhui har lâh mơ bêl bơơn ting chroi đoọng g’lêêh c’rơ âng đay ooy xa nay bh’rợ pa dưr k’tiêc k’ruung.