Hăt vêy c’moo n’đoo, đô thị ty Hội An, tỉnh Quảng Nam năc ăt zâng bâc ơl g’luh đhí boo cơnh c’moo đâu. Năc đhêêng 2 c’xêê 9 lâng 10, đô thị n’nâu “ p’zay pa c’rơ a đay” z’lâh 6 g’luh tuh boo. Bâc c’kir truih apêê c’năt c’lâng đhị 2 toor k’ruung Hoài ăt zâng đhị râu đac tuh nong bâc t’ngay. Âi dưr vaih k’ha riêng c’moo lâng dzoọng đhị râu cr’đơơng ngân âng boo tuh âi bhrợ ha bâc c’kir coh Hội An xiêr hư zơch, choom đơơh bhrợ bhr’lậ lâng zư lêy.

Pr’lúh Covid-19 t’mêê ngoọp bil, boo túh, hr’cấh ha voóh k’tiếc nắc r’rộ r’răm chô moót đhị k’tiếc đha rứt miền Trung, bhrợ bil hư hi lêệng ooy manứih lâng pr’đươi cr’van. Đhị zâp chr’hoong k’coong ch’ngai tỉnh Quảng Nam, đợ t’ngay nâu, bơơn râu zooi zúp âng zâp c’bhúh vũ trang, chính quyền lâng đhanuôr cóh đâu dzợ ặt trâu boo chấc lêy đợ apêê dzợ bil tíc ooy bấc g’lúh hr’cấh ha voóh da ding, bhrợ pa liêm c’lâng lướt moót ooy zâp chr’val k’coong ch’ngai, đoọng ch’na đh’nắh zooi zúp đhanuôr bhr’lậ đông xang, pa dưr pa liêm bh’rợ tr’nêng. Hân đhơ cơnh đêếc, râu cắh liêm crêê âng boo đhí, túh bhlong bhrợ t’váih đoọng ha chính quyền lâng đhanuôr cóh truíh c’lâng Trường Sơn hi lêệng bhlâng, nắc đhr’năng chô đha rứt cớ xang boo đhí túh bhlong cóh đhanuôr acoon cóh dưr bấc lấh mơ.