Tung pơla kố nah, a cheăm Lát, tơring Lạc Dương, kong pơlê Lâm Đồng ai tơdroăng ăm mung liăn xo liăn rơkâ hên, pro tơdjâk ôh tá tơniăn tung pơlê pơla, pro hên rơpŏng hía tơnêi, hía hngêi. Ki má lối cho môi tiah jâ Kơ Să Ka Thêm, ối a thôn Dà Nghịt, cheăm Lát. Xua kal liăn thâ vâ tơleăng tơdroăng tung rơpŏng xua mê jâ Ka Thêm ai mung rĕng ing môi ngế tung cheăm ƀă kơxô̆ liăn 270 rơtuh liăn. Châ khât jâ bu châ xo 170 rơtuh liăn, kơxô̆ ki ê tro ngế ki ăm mung xo liăn rơkâ.

Pakĭng mê, jâ ối thế ăm mơ-éa pơkuâ tơnêi hngêi dêi rơpŏng ăm ngế ki ăm mung liăn. Mơhé kơ’nâi mê jâ Ka Thêm hiăng mung hngêi arak liăn chêl tâi tâng kơxô̆ liăn mung ăm ngế ki ăm mung liăn laga xuân tá hâi tâi chê̆n. Kơ’nâi mê, Hngêi tơleăng tơring Lạc Dương pơkâ jâ thế mơdrếo tơ’nôm ăm ngế ki ăm mung 4 rơtal liăn. Tơdroăng kố hiăng châ pôa Phạm S, Kăn phŏ hnê ngăn Vi ƀan kong pơlê Lâm Đồng pơkâ kŏng an kong pơlê thâ séa ngăn vâ mơnhên xiâm kối.